Asoo Awie Biala Ezukoa Gyinlabelɛ Bayɛ Kpalɛ?
Menli dɔɔnwo ɛlɛyɛ yɛkile wɔ maanle dɔɔnwo azo ɔluakɛ bɛte nganeɛ kɛ bɛnnyia ezukoa mɔɔ ɔfɛta kɛ bɛnyia la. Yɛɛ COVID-19 ewulenzane ne ɛmaa asetɛnla ne ɛzɛkye bɔkɔɔ, ɔluakɛ yemaa menli ɛha sua nu, bɛnnyia aleɛ dɔɔnwo yɛɛ bɛnlɛ kpɔkɛdelɛ kpalɛ. Na ɛhye ɛmaa ngakyile kpole mɔɔ wɔ sukoavolɛma nee ehyianvolɛma avinli la ɛla ali wienyi.
Asoo mekɛ bie bara mɔɔ awie biala banyia asetɛnla kpalɛ wɔ ewiade amuala ɔ? Ɛhɛe. Baebolo ne kilehile mɔɔ Nyamenle bayɛ ali ngyegyelɛ mɔɔ yɛlɛyia la anwo gyima la anu.
Ezukoa nwo ngyegyelɛ mɔɔ Nyamenle bali nwolɛ gyima la
Ngyegyelɛ: Alesama ɛtɛkolale ɛtɛyɛle ezukoa nwo ngyehyɛleɛ mɔɔ boa awie biala a.
Sɔbelɛ: Nyamenle baye alesama arane ne mɔ yeavi ɛkɛ na yeava ye ɛdeɛ ne mɔɔ bɛfɛlɛ ye Nyamenle Belemgbunlililɛ la yeazie ɔ gyakɛ anu. Ɔbadɛnla anwuma na yeali tumi wɔ azɛlɛ ye kɔsɔɔti azo.—Daneɛle 2:44; Mateyu 6:10.
Mɔɔ bavi nu ara la: Nyamenle Belemgbunlililɛ ne bali tumi wɔ ewiade amuala na yeanlea yeamaa ninyɛne ahɔ zo pɛpɛɛpɛ wɔ azɛlɛ ye azo. Menli ɛnrɛli ehyia bieko yɛɛ bɛnrɛyia ezukoa nwo ngyegyelɛ. (Edwɛne 9:7-9, 18) Emomu, bɛ nye balie bɛ sa anloa gyima nwo na bɛ nee bɛ mbusua anyia asetɛnla kpalɛ mɔɔ yɛ ahunlundwolɛ la. Baebolo ne bɔ ɛwɔkɛ kɛ: “Bɛbasisi azua na bɛadɛnla nu, yɛɛ bɛbayɛ vanye egyinli na bɛali nuhua ma. Bɛnrɛsisi azua na awie gyɛne adɛnla nu, yɛɛ bɛnrɛlua na awie gyɛne ali.”—Ayezaya 65:21, 22.
Ngyegyelɛ: Menli yia tɛnlabelɛ mɔɔ maa bɛnwu amaneɛ na bɛdi ehyia la.
Sɔbelɛ: Nyamenle balua ye Belemgbunlililɛ ne azo aye ninyɛne mɔɔ maa ɛzulolɛ ka yɛ na yɛnnyia anwobanebɔlɛ la yeavi ɛkɛ.
Mɔɔ bavi nu ara la: Nyamenle banlea kɛ ɔbaye ninyɛne mɔɔ ɛmmaa alesama asa ɛnga ninyɛne mɔɔ bɛhyia nwo la yeavi ɛkɛ. Kɛ neazo la, konle konle, ɛhɔne nee ewulenzane bavi ɛkɛ. (Edwɛne 46:9; 72:16; Ayezaya 33:24) Nyamenle se: “Me menli ne badɛnla anzodwolɛ ɛleka, tɛnlabelɛ mɔɔ banebɔlɛ nee anwodɔlɛ wɔ ɛkɛ la.”—Ayezaya 32:18.
Ngyegyelɛ: Menli mɔɔ bɛle angomedi nee anyebolo la ta sisi awie mɔ.
Sɔbelɛ: Nyamenle Belemgbunlililɛ ne maanlema bahulo awie mɔ na bɛnrɛyɛ angomedi.—Mateyu 22:37-39.
Mɔɔ bavi nu ara la: Wɔ Nyamenle Belemgbunlililɛ ne abo, awie biala bazukoa Nyamenle ɛlɔlɛ ne mɔɔ ‘ɛnle angomedi’ la. (1 Kɔlentema 13:4, 5) Baebolo ne ka kɛ: “Bɛnrɛboda awie anzɛɛ bɛnrɛzɛkye debie wɔ me boka nwuanzanwuanza ne azo amuala, ɔluakɛ Gyihovaa anwo nrɛlɛbɛ bayi azɛlɛ ye tɛkɛɛ kɛ mɔɔ nzule keda nyevile zo la.”—Ayezaya 11:9.
Baebolo ne ka kɛ yɛde ngyehyɛleɛ ɛhye mekɛ mɔɔ li awieleɛ la anu na ɔnrɛhyɛ ɛwɔkɛ mɔɔ Nyamenle ɛbɔ kɛ ɔbaye ezukoa nwo ngyegyelɛ yeavi ɛkɛ la bara nu.b (Edwɛne 12:5) Noko kɛkala bɔbɔ Baebolo ngyinlazo bahola aboa wɔ yeamaa wɔagyinla ezukoa nwo ngyegyelɛ nloa. Kɛ neazo la, nea edwɛkɛ “Ɛbahola Wɔava Ezukoa Ekyi Wɔanlea Ɛ Nwo Ɔ?” yɛɛ “A Balanced View of Money.”
a Baebolo ne maa yɛnwu kɛ Nyamenle duma a le Gyihova.—Edwɛne 83:18.
b Amaa wɔanwu deɛmɔti ɛbahola wɔalie Baebolo ne wɔali la nea edwɛkɛ, “Baebolo Ne—Buluku Mɔɔ Ka Nɔhalɛ.”