Asoo Amumuyɛyɛlɛ Bara Awieleɛ?

Saa basabasayɛlɛ si a, bie a ɛbabiza ɛ nwo kɛ: ‘Asoo Nyamenle dwenle yɛ nwo? Duzu ati a ninyɛne ɛhye mɔ sisi a? Asoo amumuyɛyɛlɛa bara awieleɛ? Kɛ ɔkɛyɛ na meali me ɛzulolɛ zo ɛ?’ Baebolo ne fa kpuya ɛhye mɔ anwo mualɛ mɔɔ tɔ ɛnzolɛ nu la maa.

Kɛzi Nyamenle bu amumuyɛyɛlɛ ɛ?

Nyamenle kyi basabasayɛlɛ nee amumuyɛyɛlɛ. (Edwɛne 11:5; Mrɛlɛbulɛ 6:16, 17) Yɛɛ Gyisɛse mɔɔ le Nyamenle agyakɛnugyinlavolɛ la noko deanle ye ɛdoavolɛma ne wɔ mekɛ bie mɔɔ bɛbodale awie la. (Mateyu 26:50-52) Bie mɔ ka kɛ bɛko wɔ Nyamenle duma nu ɛdeɛ, noko ɔnlie nyɛleɛ zɔhane mɔ ɔndo nu. Nɔhalɛ nu, ɔndie bɛ asɔneyɛlɛ bɔbɔ.—Ayezaya 1:15.

Nyamenle dwenle menli kɔsɔɔti anwo, bɔbɔ bɛdabɛ mɔɔ amumuyɛyɛlɛ ti bɛlɛnwu amaneɛ la. (Edwɛne 31:7; 1 Pita 5:7) Baebolo ne eza ka kɛ Nyamenle bamaa basabasayɛlɛ kɔsɔɔti ara awieleɛ.—Ayezaya 60:18.

Mɔɔ fa amumuyɛyɛlɛ ba la

Baebolo ne maa yɛnwu deɛmɔti amumuyɛyɛlɛ kɔ zo la: “Sonla di sonla nwo zo tumi maa ɔnwu amaneɛ.” (Nolobɔvo 8:9) Ɔvi tete ne bɛdabɛ mɔɔ bɛlɛ tumi la dua amumuyɛ adenle zo sisi menli. Bie mɔ dua amumuyɛyɛlɛ zo ko tia menli mɔɔ ɛlɛsisi bɛ la.—Nolobɔvo 7:7.

Amumuyɛyɛlɛ bavi ɛkɛ

Nyamenle ɛbɔ ɛwɔkɛ kɛ ɔbaye ɛzulolɛ nee basabasayɛlɛ yeavi ɛkɛ na yeamaa anzodwolɛ ara azɛlɛ ye azo. (Ayezaya 32:18; Maeka 4:3, 4) Mɔɔ ɔbayɛ la ɛne:

Ɔbaye mɔɔ fa amumuyɛyɛlɛ ba la yeavi ɛkɛ. Nyamenle baye alesama tumililɛ yeavi ɛkɛ na yeava ye arane ne mɔɔ banlea ewiade kɔsɔɔti azo la yeazie ɛkɛ. Gyisɛse Kelaese mɔɔ bali zolɛ Belemgbunli la bali pɛlepɛle yɛɛ ɔbaye nzisi nee basabasayɛlɛ yeavi ɛkɛ. (Edwɛne 72:2, 14) Zɔhane mekɛ ne, awie biala ɛnrɛyɛ amumuyɛ. Menli ‘anye balie kpalɛ wɔ anzodwolɛ dɔɔnwo anu.’—Edwɛne 37:10, 11.
Ɔbaye debie biala mɔɔ ɛvi amumuyɛyɛlɛ nu ɛra la yeavi ɛkɛ. Nyamenle baye ngyegyelɛ mɔɔ amumuyɛyɛlɛ ti menli gyi ɔ nloa la. (Ayezaya 65:17; Yekile 21:3, 4) Eza yebɔ ɛwɔkɛ kɛ ɔbadwazo mowuamra na bɛadɛnla azɛlɛ mɔɔ anzodwolɛ wɔ zo la azo.—Dwɔn 5:28, 29.

Baebolo ne maa yɛnwu deɛmɔti ɔwɔ kɛ yɛdie yɛdi kɛ ɔnrɛhyɛ Nyamenle bayɛ zɔ la. Noko bie a ɛbabiza kɛ, ‘Duzu ati a Nyamenle ɛtɛyele amumuyɛyɛlɛ ɛtɛfile ɛkɛ a?’ Amaa wɔanwu muala ne la nea vidio ne mɔ se, Duzu Ati A Nyamenle Maa Amaneɛnwunlɛ Nwo Adenle A?

a “Amumuyɛyɛlɛ” kile basabasayɛlɛ anzɛɛ maanlema mɔɔ bɛnwunlonwunla bɛ amaa ɛzulolɛ aha bɛ na ɔlua zo bayɛ nzenzaleɛ wɔ maanyɛlɛ, ɛzonlenlɛ nu anzɛɛ ɛbɛlabɔlɛ nu la. Noko, menli lɛ adwenle ngakyile wɔ nyɛleɛ bie mɔɔ kile amumuyɛyɛlɛ la anwo.

Baebolo ne boa menli maa bɛgyinla ɔ nloa

Ninyɛne nwiɔ mɔɔ Baebolo ne ka nwolɛ edwɛkɛ mɔɔ bahola aboa wɔ la ɛne.

Sɛlɛ Nyamenle.—Felepaema 4:6, 7.
Fa wɔ adwenle sie anyelazo edwɛkɛ mɔɔ wɔ Baebolo ne anu la azo.—Hibuluma 6:19.

Amaa wɔanwu nzuzulɛ dɔɔnwo mɔɔ gyi Baebolo ne azo la, nea edwɛkɛ “Kɛzi Ɛbade Wɔ Adwenleadwenle Zo La.”

Gyihova Alasevolɛ mɔɔ bɛyɛ bɛ amumuyɛ la bie mɔ eza ɛnyia moalɛ ɛvi bɛ mediema diedima ɛkɛ. Suzu neazo nwiɔ anwo:

Ɛnee Natalya nee ɔ ra nrenyia Aslan mɔɔ ɛli ɛvolɛ ngɔnla la wɔ sukulu bie anu wɔ Beslan mɔɔ wɔ Russia la yɛɛ menli bie mɔɔ dedɛ adu la rahyele menli mɔɔ bo 1, 000 la ziele a. Mɔɔ yɛ alɔbɔlɛ la a le kɛ bɛ nuhua dɔɔnwo wule na ɛnee bɛ nuhua dɔɔnwo le ngakula. Ɔwɔ nuhua kɛ Natalya nee Aslan anwu ɛdeɛ noko mɔɔ zile la gyegyele bɛ kpalɛ. Nea mɔɔ boale bɛ la.
Pablo nee Sophie ara nrenyia wule wɔ mekɛ mɔɔ bɛbubule Twin Towers ne wɔ New York la. Nea vidio ɛhye amaa wɔanwu mɔɔ boale bɛ nee menli gyɛne mɔɔ amumuyɛma ɛmaa bɛnwu amaneɛ la.