Ninyɛne Awolɛ Ɛlɛyɛ Se Kpalɛ Wɔ Ewiade Amuala​—Duzu A Baebolo Ne Ka A?

Kpanyinli mɔɔ nea World Bank Group ne azo la hanle ye wɔ June 2022 amaneɛbɔlɛ ne anu kɛ, “Ewiade amuala ezukoa gyinlabelɛ ɛlɛsɛkye bieko. Ninyɛne awolɛ ɛlɛkɔ ɔ nyunlu ndɛndɛ noko mekɛ ko ne ala menli ɛnlɛ ezukoa.”

International Monetary Fund ne hanle kɛ, “Patulo, aleɛ nee ninyɛne gyɛne awolɛ ɛhɔ ɔ nyunlu ndɛndɛ, na menli mɔɔ wɔ maanle wɔ bɛnlɛ ezukoa azo la a ɛlɛnwu amaneɛ kpalɛ a.

Baebolo ne boa yɛ maa yɛnwu deɛmɔti yɛlɛyia ezukoa nwo ngyegyelɛ kpole zɛhae la, kɛzi yɛbahola yɛagyinla ɔ nloa yɛɛ anyelazo mɔɔ yɛlɛ kɛ bɛbazɔ ɔ nloa bɔkɔɔ la.

Ninyɛne awolɛ ɛlɛyɛ se wɔ “mekɛ mɔɔ li awieleɛ” la anu

• Baebolo ne ka kɛ yɛde “mekɛ mɔɔ li awieleɛ” la anu.​—2 Timote 3:1.

• Gyisɛse hanle kɛ “ninyɛne ɛzulolɛ” basisi wɔ mekɛ ɛhye anu. (Luku 21:11) Ninyɛne awolɛ mɔɔ ɛlɛyɛ se la ɛmaa ɛzulolɛ ɛha menli. Menli dwenle bɛ kenle bie nwo na bɛngola bɛnnwu ye saa bɛbahola bɛanlea bɛ mbusua a.

• Yekile buluku ne hanle dole ɛkɛ ne kɛ aleɛ bolɛ bayɛ se wɔ mekɛ ɛhye anu. Ɔse, “Mendele debie mɔɔ dielie kɛ ɛnelɛ la. . . . Ɔhanle kɛ, ‘Bɛbava kenle ko ahatualɛ bɛadɔ hwiiti koate ko anzɛɛ baale koate nsa.’”​—Yekile 6:6, Easy-to-Read Version.

Amaa wɔanwu “mekɛ mɔɔ li awieleɛ” nee ngapezo ne mɔɔ wɔ Yekile buluku ne anu anwo edwɛkɛ dɔɔnwo la, nea Ewiade Ɛhakyi Ɔvi 1914 Mɔɔ Ba La vidio ne na kenga “Mgbɔnwɔkavoma Nna Ne​—Bɛmɛ A Le Nwane Mɔ?”

Ezukoa nwo ngyegyelɛ kɔsɔɔti anwo sɔbelɛ

• “Bɛbasisi azua na bɛadɛnla nu, yɛɛ bɛbayɛ vanye egyinli na bɛali nuhua ma. Bɛnrɛsisi azua na awie gyɛne adɛnla nu, yɛɛ bɛnrɛlua na awie gyɛne ali.”​—Ayezaya 65:21, 22.

• “Aleɛ babu azɛlɛ ne azo; ɔbabu awoka ne mɔ azo.”​—Edwɛne 72:16.

• “‘Ɔluakɛ bɛsisi mɔɔ nyane ɛha ye la, yɛɛ ehyiavolɛma ɛkponlenlɛ ne ati, mebadwazo meayɛ nwolɛ debie,’ Gyihova a se a.”​—Edwɛne 12:5.a

Ɔnrɛhyɛ, Nyamenle bamaa ezukoa nwo ngyegyelɛ ara awieleɛ, tɛ maanle ko azo ala emomu wɔ ewiade amuala. Amaa wɔanwu kɛzi ɛhye bayɛ zɔ la, kenga “Asoo Awie Biala Ezukoa Gyinlabelɛ Bayɛ Kpalɛ?”

Noko ɛnɛ bɔbɔ, Baebolo ne bahola aboa wɔ yeamaa wɔagyinla ninyɛne awolɛ mɔɔ ɛlɛyɛ se la anloa. Wɔ adenle boni azo? Ɔfa folɛdulɛ kpalɛ mɔɔ baboa yeamaa wɔanlea wɔ ezukoa zo boɛ la ɔmaa. (Mrɛlɛbulɛ 23:4, 5; Nolobɔvo 7:12) Amaa wɔanwu nwolɛ edwɛkɛ dɔɔnwo la, kenga “Protect Your Livelihood” nee “Ɛbahola Wɔava Ezukoa Ekyi Wɔanlea Ɛ Nwo.”