Asoo Ɔwɔ Kɛ Ɛzonlenlɛ Fa Ɔ Nwo Wulowula Maanyɛlɛ Nu?

Wɔ ewiade ɛleka biala, menli dɔɔnwo mɔɔ ka kɛ bɛle Gyisɛse Kelaese ɛdoavolɛma la ɛva bɛ nwo ɛwula maanyɛlɛ nu. Bie mɔ gyinla maanyɛlɛ nu sonla anzɛɛ eku bie anzi amaa menli anwu bɛ ɛzonlenlɛ ne anu diedi anzɛɛ ɛbɛlabɔlɛ nu ngyinlazo mɔɔ bɛfa bɛyɛ gyima la. Yɛɛ maanyɛlɛma ta dua ɛbɛla kpalɛ ɛbɔlɛ nwo edwɛkɛ anzɛɛ ninyɛne mɔɔ ɛlɛkɔ zo la azo amaa menli mɔɔ wɔ ɛzonlenlɛ nu la anye alie bɛ nwo. Ɛzonlenlɛ nu mgbanyima bie mɔ lɛ dibilɛ wɔ arane nu. Yɛɛ wɔ maanle bie mɔ anu, “Kilisiene” asɔne bie mɔ bɔbɔ lɛ dibilɛ titili wɔ arane nu anzɛɛ bɛlie bɛ bɛdo nu kɛ maanle ne anu asɔne.

Kɛzi ɛdwenle nwo ɛ? Asoo ɔwɔ kɛ Gyisɛse Kelaese ɛdoavolɛma fa bɛ nwo wulowula maanyɛlɛ nu? Saa ɛnea neazo mɔɔ Gyisɛse yɛla la a ɛbanwu mualɛ ne. Ɔhanle kɛ: “Meyɛ neazo memaa bɛ amaa kɛ mɔɔ meyɛ bɛ la, bɛdabɛ noko bɛayɛ zɔ.” (John 13:15) Neazo boni a Gyisɛse yɛle wɔ maanyɛlɛ nwo a?

Asoo Gyisɛse vale ɔ nwo wulowulale maanyɛlɛ nu?

Kyɛkyɛ. Gyisɛse anva ɔ nwo anwulowula ewiade maanyɛlɛ nu.

Gyisɛse amkpondɛ maanyɛlɛ nu tumi. Yeanlie yeando nu kɛ ɔbanlea alesama tumililɛ zo wɔ mekɛ mɔɔ Seetan Abɔnsam vale “ewiade arelemgbunlililɛ kɔsɔɔti” hilehilele ye la. (Matthew 4:8-10)a Wɔ mekɛ fofolɛ nu mɔɔ menli ne nwunle kɛ Gyisɛse lɛ subane mɔɔ maa ɔkola ɔdi menli nyunlu la bɛbɔle mɔdenle kɛ bɛpiepia ye bɛamaa yeava ɔ nwo yeawulowula maanyɛlɛ nu. Baebolo ne ka kɛ: “Mɔɔ Gyisɛse nwunle kɛ bɛkpondɛ kɛ bɛkye ye bɛsie ye belemgbunli la, ɔhwenle ɔ nwo na ɔ ngome ɔhɔle boka ne azo bieko.” (John 6:15) Gyisɛse anyɛ mɔɔ menli ne kulo la. Emomu ɔkpole kɛ ɔbava ɔ nwo yeawulowula maanyɛlɛ nu.

Gyisɛse angyinla afoa biala wɔ maanyɛlɛ edwɛkɛ nu. Kɛ neazo la, mɔɔ Gyisɛse wɔ azɛlɛ ye azo la ɛnee Dwuuma ne ɛngulo kɛ bɛtua adwule bɛmaa Wulomu arane ne na bɛnwunle ye kɛ ɔle nzisi. Mekɛ mɔɔ bɛbɔle mɔdenle kɛ bɛmaa Gyisɛse agyinla afoa wɔ edwɛkɛ ɛhye anu la yeanva ɔ nwo yeanwulowula maanyɛlɛ edwɛkɛ ɛhye anu yɛɛ yeanzu kpolera kɛ adwule ne le nzisi anzɛɛ ɔnle nzisi. Ɔhanle ɔhilele bɛ kɛ: “Bɛva Siza ɛdeɛ bɛmaa Siza, na bɛva Nyamenle ɛdeɛ bɛmaa Nyamenle.” (Mark 12:13-17) Yeangyinla afoa biala, emomu ɔmaanle bɛnwunle kɛ ɔwɔ kɛ bɛtua adwule bɛmaa Wulomu maanle kpanyinli ne mɔɔ gyi ɛkɛ ne maa Siza la. Mekɛ ko ne ala ɔmaanle ɔlale ali kɛ tieyɛ mɔɔ yɛyɛ yɛamaa arane mgbanyima la lɛ ye ɛweɛne. Ɔnle kɛ awie fa ɛzonlenlɛ mɔɔ fɛta Nyamenle la maa Maanle ne.​—Matthew 4:10; 22:37, 38.

Gyisɛse hanle anwuma belemgbunlililɛ mɔɔ le Nyamenle Belemgbunlililɛ ne la anwo edwɛkɛ. (Luke 4:43) Yeanva ɔ nwo yeanwulowula maanyɛlɛ nu ɔluakɛ ɛnee ɔze kɛ Nyamenle Belemgbunlililɛ ne a bamaa Nyamenle ɛhulolɛdeɛ ayɛ ɛkɛ wɔ azɛlɛ ye azo a na tɛ sonla arane biala ɔ. (Matthew 6:10) Ɛnee ɔze ye kɛ Nyamenle Belemgbunlililɛ ɛnrɛlua sonla arane zo ɛnrɛli tumi, emomu ɔbaye ye yeavi ɛkɛ ne.​—Daniel 2:44.

Asoo alimoa Kilisienema vale bɛ nwo wulowulale maanyɛlɛ nu?

Kyɛkyɛ. Gyisɛse ɛdoavolɛma lile ye mɛla mɔɔ se “bɛnle ewiade ne afoa” la azo. (John 15:19) Bɛlile ye neazo ne anzi na bɛanva bɛ nwo bɛanwulowula ewiade ne maanyɛlɛ nu. (John 17:16; 18:36) Kɛ anrɛɛ bɛbava bɛ nwo bɛawulowula maanyɛlɛ nu la, bɛyɛle gyima mɔɔ Gyisɛse vale maanle bɛ la​—bɛhilehilele menli Nyamenle Belemgbunlililɛ ne anwo debie na bɛbɔle ye nolo.​—Matthew 28:18-20; Acts 10:42.

Alimoa Kilisienema vale tieyɛ mɔɔ bɛyɛ bɛamaa Nyamenle la limoale bɛ ɛbɛlabɔlɛ nu noko ɛnee bɛze kɛ ɔwɔ kɛ bɛbu arane mgbanyima. (Acts 5:29; 1 Peter 2:13, 17) Bɛlile mɛla zo yɛɛ bɛduale adwule. (Romans 13:1, 7) Bɛanva bɛ nwo bɛanwulowula maanyɛlɛ nu ɛdeɛ noko bɛnyianle mɛla nee ngyehyɛleɛ mɔɔ arane ne mɔ yɛle la azo nvasoɛ.​—Acts 25:10, 11; Philippians 1:7.

Kilisienema ɛngyinla afoa biala ɛnɛ

Baebolo ne maa ɔda ali wienyi kɛ Gyisɛse anzɛɛ ye ɛdoavolɛma mɔɔ limoa la anva bɛ nwo anwulowula maanyɛlɛ nu. Ɛhye ati, kɛ Kilisienema la, Gyihova Alasevolɛ mɔɔ wɔ ewiade amuala la ɛngyinla afoa biala. Bɛle kɛ alimoa Kilisienema la, bɛyɛ gyima mɔɔ Gyisɛse ɛva ɛmaa bɛ la​—bɛbɔ ‘Belemgbunlililɛ ɛhye anwo edwɛkpa nolo.’​—Matthew 24:14.