Da Nwunu Ali Na ‘Ɔbawie Wɔ Boɛ’

1-2. Duzu a le nwunu, na kɛzi ɔbahola yeaboa yɛ ɛ?

WƆDE nganeɛ ɛlɛ kɛ awie ambu wɔ ɔ? Asoo awie ɛnyia ɛ nwo adwenle mɔɔ ɛndenrɛ anzɛɛ awie ɛyɛ debie ɛmaa yegyegye wɔ ɛlɛ ɔ? Anzɛɛ wɔhɔ tɛnlabelɛ bie mɔɔ ɔhanle wɔ ɛzulolɛ la anu ɛlɛ ɔ? Saa ninyɛne ɛhye mɔ bie ɛdo wɔ ɛlɛ a, ɛnee ɛze kɛzi ɔnla aze kɛ ɛbayɛ wɔ ninyɛne nrɛlɛbɛ nu wɔ tɛnlabelɛ zɛhae mɔ anu la. Mɔɔ yɛ anyelielɛ la a le kɛ Ngɛlɛlera ne maa yɛnwu subane bie mɔɔ ɔbaboa yɛ wɔ tɛnlabelɛ ɛhye mɔ nee gyɛne dɔɔnwo anu la; yemɔ a le nwunu.

² Saa yɛlɛ nwunu a, yɛngyinla mɔɔ yɛnwu ye la azo yɛnsisi kpɔkɛ, emomu ɔmaa yɛneɛnlea tɛnlabelɛ ne anu kpalɛ. Nwunu maa yɛte deɛmɔti bie a edwɛkɛ bie zile anzɛɛ deɛmɔti bie a awie yɛle ye nyɛleɛ wɔ adenle fɔɔnwo bie azo la abo. Na ɛhye maa yɛyɛ yɛ ninyɛne nrɛlɛbɛ nu. Kɛ neazo la, ɔkola ɔboa yɛ ɔmaa ‘yɛnea yɛ nloa boɛ’ na yɛnwu mekɛ mɔɔ ɔwɔ kɛ ‘yɛyɛ koonwu’ la. (Mrɛ. 10:19; Edw. 4:4) Ɔkola ɔboa yɛ ɔmaa yɛkomo yɛ ɛya zo na yɛbu yɛ nye yɛgua nvonleɛ zo. Eza ɔkola ɔboa yɛ ɔmaa yɛdie folɛdulɛ nee ɛdenrɛdenrɛlɛ yɛto nu. (Mrɛ. 19:20) Saa yɛda nwunu ali a, tɛ Gyihova angomekye a yɛmaa ɔ nye die a, emomu ɔboa yɛdayɛ mumua ne yɛɛ bɛdabɛ mɔɔ yɛ edwɛkɛ nee yɛ nyɛleɛ ka bɛ la. Na subane ɛhye hyia kpalɛ wɔ mekɛ mɔɔ yɛbahɔ tɛnlabelɛ mɔɔ ɔbahola yeamaa yɛadendɛ ɛya zo anzɛɛ yɛnrɛhola yɛnrɛhomo yɛ nwo zo la anu la. Maa yɛzuzu Baebolo ne anu kɛlɛtokɛ nsa mɔɔ ɔbamaa yɛanwu kɛzi nwunu bahola aboa yɛ yeamaa yɛabɛlɛ yɛ nwo aze, yɛazie yɛ nwo dii na yɛava yɛ nwo yɛado Gyihova anwo zo bɔkɔɔ la anwo.

BƐLƐ Ɛ NWO AZE, MMAMEMAA Ɛ NWO ZO

3. Nwane a le Neeyaman?

³ Amaa yɛayɛ mɔɔ tenrɛ la, ɔnle kɛ yɛyɛ anwomemaazo. (1 Pita 5:5) Na nwunu a baboa yɛ amaa yɛanyɛ anwomemaazo a. Wɔ adenle boni azo? Fa Neeyaman kɛ neazo. Ɛnee ɔde Selea, maanle bie mɔɔ wɔ Yizilayɛ sɔlɔ la. Ɛnee Neeyaman le sonla titili, ɔle Selea sogyama kpanyinli. Noko kokobɛ guale ɔ nwo amuala.—2 Arl. 5:1.

4. Kɛzi Neeyaman lale nrɛlɛbɛ bie ali ɛ?

⁴ Ɛnee Neeyaman aye ne lɛ Yizilayɛnli akɛlɛ kakula raalɛ bie, na ɔhanle ɔhilele ye kɛ ngapezonli bie wɔ Yizilayɛ mɔɔ ɔbahola yeayɛ ɔ hu ayile a. (2 Arl. 5:​2, 3) Anrɛɛ Neeyaman bahola aha ye ɔ ti anu kɛ, ‘Asoo akɛlɛ kakula ɛhye mɔɔ vi yɛ agbɔvolɛ maanle nu la bahola ayɛ debie aboa me?’ Noko Neeyaman lale nrɛlɛbɛ bie ali. Kɛ anrɛɛ ɔbabu ɔ nye yeagua edwɛkɛ biala mɔɔ kakula ne hanle la azo la, yeanyɛ zɔ, emomu ɔbɛlɛle ɔ nwo aze na ɔyɛle nwolɛ debie. Ɔzɛlɛle Selea belemgbunli ne adenle kɛ ɔmaa ɔhɔ Yizilayɛ ɔhɔkpondɛ ye ewule ne anwo ayile.—2 Arl. 5:​4, 5.

5. Mɔɔ Neeyaman dwule Yizilayɛ la, duzu a zile a?

⁵ Neeyaman hɔdwule Yizilayɛ Belemgbunli Gyɛholam sua nu na ɛnee ɔ nye la kɛ bɛbayɛ ye kokobɛ ne ayile wɔ ɛkɛ. Noko ɛnee Gyɛholam suzu kɛ Selea belemgbunli ne kulo kɛ ɔfa butule ɔtoa ye la ati a ɔlɛyɛ zɔ a. Mɔɔ ngapezonli Yilaehya dele edwɛkɛ ne la, ɔhanle ɔhilele Gyɛholam kɛ ɔmaa bɛva Neeyaman bɛrɛlɛ ye. (2 Arl. 5:​6-9) Ninyɛne angɔ ye kɛ mɔɔ ɛnee Neeyaman anye la la. Yilaehya anvi ye sua ne anu anvinde amba Neeyaman anwo ɛkɛ na ɔ nee ye adendɛ bɔbɔ. Emomu ɔzoanle soanvolɛ bie kɛ ɔhɔha mɔɔ ɔwɔ kɛ Neeyaman yɛ amaa yeade kpɔkɛ la ɔhile ye.—2 Arl. 5:10.

6. (a) Duzu ati a ɛnee Neeyaman ɛngulo kɛ ɔbayɛ mɔɔ sonvolɛ ne hanle kɛ ɔyɛ la ɛ? (b) Kɛzi Neeyaman sonvolɛ ne lale nwunu ali ɛ, na duzu a vi nu rale a? (2 Arelemgbunli 5:​13, 14)

⁶ Mɔlebɛbo ne, Neeyaman anyɛ mɔɔ sonvolɛ ne hanle la. Ɔvale “ɛya kpole” na “ɔhakyile ɔ nwo” kɛ ɔkɔ. (2 Arl. 5:​11, 12) Duzu ati ɔ? Bie a kɛmɔ ɔle sogya kpanyinli la ati, ɔdele nganeɛ kɛ bɛ nee ye anli ye boɛ yɛɛ bɛambu ye. Eza bie a Neeyaman dele nganeɛ kɛ Yilaehya edwɛkɛ ne kile kɛ ɔmbu Seleama. Kɛzi ɔde ye biala la, ɛnee Neeyaman kulo kɛ ɔfa ye ewule ne ɔsia ɔkɔ sua nu. Noko akee, ye sonvolɛma ne lale nwunu ali na bɛhanle bɛhilele ye kɛ ɔdwenle ye kpɔkɛzilɛ ne anwo bieko. Akee Neeyaman bɛlɛle ɔ nwo aze na ɔyɛle mɔɔ Yilaehya hanle la. Ɔlua ɛhye ati ɔdele kpɔkɛ!—Kenga 2 Arelemgbunli 5:​13, 14.

7. Duzu a yɛbahola yɛazukoa yɛavi Neeyaman edwɛkɛ ne anu a? (Mrɛlɛbulɛ 22:4) (Eza nea nvoninli ne mɔ.)

⁷ Duzu a yɛbahola yɛazukoa yɛavi edwɛkɛ ɛhye anu a? Saa yɛdwenle ninyɛne nwo yɛkɔ moa na yɛannea mɔɔ yɛ nye nwu ye la ala a, ɔbamaa yɛala nwunu ali. Eza saa yɛammaa yɛ nganeɛdelɛ ne mɔ anvo yɛ nwo zo a, ɔbamaa yɛala nwunu ali. Nwunu bahola amaa yɛabɛlɛ yɛ nwo aze. Saa yɛbɛlɛ yɛ nwo aze a, ɔkile kɛ yɛdie yɛto nu kɛ tɛ debie biala a yɛze a. Bie a yɛbahyia moalɛ yɛavi menli gyɛne ɛkɛ, titili Gyihova. Ɛnee Neeyaman ɛnzonle Gyihova; noko ɔ ye akɛlɛ kakula raalɛ ne mɔɔ ɔle Yizilayɛnli, ɔdaye mumua ye sonvolɛma ne, yɛɛ mɔɔ tɛla biala la, Yilaehya mɔɔ gyi Gyihova agyakɛ anu mɔɔ ɔdiele bɛ la maanle ɔlale nwunu ali. Neeyaman holale lile ye anwomemaazo ne azo. Awieleɛ bɔkɔɔ ne, ɔmaanle ɔholale ɔzile kpɔkɛ kpalɛ mɔɔ maanle ɔdele kpɔkɛ a. Ɔti, kolaa na yɛaha edwɛkɛ anzɛɛ yɛayɛ debie bie la, ɔwɔ kɛ yɛgyinla na yɛdwenle nwolɛ. Kɛ neazo la, bie a awie bagyinla Baebolo ne azo adu yɛ folɛ bie mɔɔ yɛnlie yɛndo nu anzɛɛ yɛbanyia adehilelɛ bie mɔɔ yɛnde ɔ bo la. Saa ɔba ye zɛhae a, ɔwɔ kɛ yɛdwenle nwolɛ kpalɛ yɛnea kɛ asoo kɛzi yɛbayɛ yɛ nyɛleɛ wɔ nwo la kile kɛ yɛbɛlɛ yɛ nwo aze anzɛɛ yɛmemaa yɛ nwo zo ɔ?—Kenga Mrɛlɛbulɛ 22:4.

SIE Ɛ NWO DII, MMAFA ƐYA

8. Tɛnlabelɛ boni mɔ anu a wɔannea a ɔbayɛ se kɛ yɛbazie yɛ nwo dii a?

⁸ Nwunu bahola aboa yɛ yeamaa yɛazie yɛ nwo dii amaa yɛanva ninyɛne mɔɔ gyegye yɛ la anwo ɛya. Nɔhalɛ nu, tɛ dahuu biala a ɛhye ɛyɛlɛ la aze a, titili saa awie nee yɛ anli ye boɛ a. (Ɛfɛ. 4:26) Nea kɛzi Devidi nee Abegɛle lale nwunu ali wɔ tɛnlabelɛ mɔɔ anu yɛ se kpalɛ anu la.

9. Subane boni a Neebale lale ye ali hilele Devidi a?

⁹ Pɛ tɛnlabelɛ ne anwo nvoninli nea: Ɛnee Sɔɔlo ɛlɛkpondɛ Devidi nee ye menli ne ahu bɛ ɔti bɛnriandile bɛhɔle Peelan fienemgbole ne anu. (1 Sa. 25:1) Mɔɔ bɛwɔ ɛkɛ ne la, bɛbɔle nrenyia sukoavolɛ bie mɔɔ bɛfɛlɛ ye Neebale la mboaneneavolɛma nee ye mboane ne anwo bane. (1 Sa. 25:​15, 16) Mɔɔ mekɛ mɔɔ bɛfa bɛpepɛ mboane nwo enrinli la dwule la, Devidi zoanle ye sonvolɛma wɔ Neebale ɛkɛ na ɔhanle ɔhilele bɛ kɛ bɛha bɛhile ye kɛ anzodwolɛ ɛha ye, na ɔvile mɛlɛbɛnwoaze nu ɔzɛlɛle Neebale kɛ ɔmaa bɛ debie biala mɔɔ ɔ sa kɛdɔ zo la. (1 Sa. 25:​6-8) Noko Neebale angile mɔɔ Devidi nee ye sonvolɛma ne yɛle maanle ye la anwo anyezɔlɛ fee. Yeanli mɔɔ Devidi bizale ye la anwo bie fee, na ɔbɔle Devidi nee mrenyia mɔɔ ɔ nee bɛ lua la aholoba bɔbɔ.—1 Sa. 25:​10, 11.

10. Kɛzi Devidi nee Abegɛle lale nwunu ali ɛ? (1 Samoɛle 25:​32, 33) (Eza nea nvoninli ne.)

¹⁰ Saa ɛdawɔ a Devidi edwɛkɛ ɛhye dole wɔ a, anrɛɛ kɛzi ɛbade nganeɛ ɛ? Ɔnyɛ se kɛ ɛbade deɛmɔti Devidi vale ɛya kpole zɔhane la abo. Nɔhalɛ nu, ɔvale ɛya kpole mɔɔ ɛnee ɔkulo kɛ ɔku Neebale! (1 Sa. 25:​13, 21, 22) Nɔhalɛ ne a le kɛ, ɛnee ɔlua adenle nu ɔlɛkɔ yeahu Neebale nee ye sua nu amra yɛɛ Neebale aye Abegɛle mɔɔ ze nrɛlɛbɛ la zile ye adenle a. Kɛzi Abegɛle lale nwunu ali ɛ? Ɔnwunle kɛ Devidi le sonla kpalɛ ɔnva nwo kɛ ɛnee yeva ɛya kpole la, ɔti ɔyɛle biala mɔɔ ɔbahola la ɔboale ye ɔmaanle ɔhomole ye ɛya ne azo. Ɔvale ahyɛlɛdeɛ dɔɔnwo ɔrɛlɛle ye na ɔvile mɛlɛbɛnwoaze nu ɔdule ye folɛ. (1 Sa. 25:​18, 23-31) Devidi diele Abegɛle vale hilele kɛ ɔlɛ nwunu, ɔluakɛ ɔdele Abegɛle edwɛkɛ ne abo kɛ zɔhane a Gyihova noko nwu tɛnlabelɛ ne a. Ɛhye maanle Devidi hanle ye ahonle dole ye azule nu na yeammaa yeanyɛ nvonleɛ kpole mɔɔ anrɛɛ ɔyɛ la.—Kenga 1 Samoɛle 25:​32, 33.

11. Saa awie ka yɛ ɛya na yɛda nwunu ali a, kɛzi ɔbaboa yɛ ɛ? (Mrɛlɛbulɛ 19:11)

¹¹ Duzu a yɛbahola yɛazukoa yɛavi edwɛkɛ ɛhye anu a? Saa awie yɛ yɛ debie na amgba ɔwɔ kɛ yɛfa ɛya bɔbɔ a, yɛda nwunu ali a ɔbahola yeamaa yɛali tɛnlabelɛ ne anwo gyima wɔ adenle kpalɛ zo. Ɔbahola yeaboa yɛ yeamaa yɛazuzu mɔɔ bavi yɛ edwɛkɛ nee yɛ nyɛleɛ nu ara la anwo. (Kenga Mrɛlɛbulɛ 19:11.) Mɔɔ Abegɛle hakyele Devidi adwenle mɔɔ Gyihova lɛ wɔ edwɛkɛ ne anwo la, ɔboale ye ɔmaanle ɔhomole ɔ nwo zo. Saa awie yɛ debie ɔmaa ɔgyegye wɔ a, mmafa ɛya ɛbua ye. (Gye. 1:19) Sɛlɛ Gyihova na maa ɛ nwo mekɛ amaa wɔanwu adwenle mɔɔ Gyihova lɛ wɔ edwɛkɛ ne anwo la, saa ɛyɛ ye zɔ a, ɔbahola yeaboa wɔ yeamaa wɔazie ɛ nwo dii.

12. Kɛ ɔkɛyɛ na awie mɔ aboa yɛ bɛamaa yɛala nwunu ali na yɛazie yɛ nwo dii ɛ?

¹² Kɛ mɔɔ Gyihova luale Abegɛle anwo zo boale Devidi maanle ɔdwenlenle edwɛkɛ ne anwo ɔhɔle moa la, ɔbahola yealua awie mɔ anwo zo yeaboa yɛ yeamaa yɛanwu adwenle mɔɔ ɔlɛ wɔ edwɛkɛ bie anwo la. Ɔti kolaa na wɔayɛ tɛnlabelɛ mɔɔ gyegye wɔ la anwo debie la, bɔ mɔdenle suzu edwɛkɛ ne anwo kile Kilisienenli bie mɔɔ yenyi sunsum nu—awie mɔɔ ɔbahola yeaboa wɔ yeamaa wɔadwenle ninyɛne nwo kɛ Gyihova la. (Mrɛ. 12:15; 20:18) Wɔ adenle fofolɛ zo, saa ɛ gɔnwo bie fa debie bie anwo ɛya na ɛnyia nwolɛ adenle kɛ ɛboa ye a, ɛbahola wɔazukoa Abegɛle neazo ne ɔ? Ɛbahola wɔaboa ɛ gɔnwo ne wɔamaa yeanwu adwenle mɔɔ Gyihova lɛ wɔ edwɛkɛ ne anwo la ɔ? Gyihova baboa wɔ wɔ mɔdenle biala mɔɔ ɛlɛbɔ kɛ ɛboa awie mɔ wɔamaa bɛala nwunu ali na bɛazie bɛ nwo dii la anwo.

NYIA ANWODOZO, MMASULO

13. Kɛzi nwunu bahola aboa yɛ amaa yɛanzulo ɛ?

¹³ Ɔdwu mekɛ ne bie a yɛkɔ tɛnlabelɛ mɔɔ maa ɛzulolɛ ka yɛ la anu. Noko saa yɛkakye kɛzi Gyihova lɛ tumi tɛla debie biala nee awie biala la a, ɔbahola yeaboa yɛ yeamaa yɛava yɛ nwo yɛado ɔ nwo zo ɔnva nwo kɛ ɛzulolɛ ka yɛ la. (Edw. 27:1) Gyihova bahola aboa yɛ wɔ tɛnlabelɛ biala anu, saa bɔbɔ yɛsuzu kɛ yɛnlɛ anyelazo biala a. Edwɛkɛ ɛhye bie a dole ngapezonli Dwona la. Ɛnee yenyi sunsum nu, noko ɛnee ɔhyia nwunu dɔɔnwo amaa yeahola yeayɛ gyimalilɛ bie mɔɔ yɛ se la.

14. Duzu ati a ɔbayɛ kɛ ɛnee Dwona ɛngulo kɛ ɔbalie gyimalilɛ bie mɔɔ Gyihova vale maanle ye la yeado nu a?

¹⁴ Gyihova maanle Dwona gyimalilɛ bie mɔɔ yɛ se kpalɛ la: kɛ ɔhɔbɔ ndɛnebualɛ edwɛkɛ bie nolo ɔhile menli mɔɔ de Nenɛvɛ la. (Dwona 1:​1, 2) Saa ɛdawɔ a bɛvale gyimalilɛ ɛhye bɛmaanle wɔ a, anrɛɛ kɛzi ɛbade nganeɛ ɛ? Ɛnee ɔwɔ kɛ Dwona tia pɛ kɛyɛ siane ko adenle fi Yizilayɛ kɔ Aseleama suakpole Nenɛvɛ azo. Ɛnee Aseleama ɛlie duma kɛ bɛyɛ basabasa. Ɛnee bɛfɛlɛ Nenɛvɛ bɔbɔ kɛ “suakpole ne mɔɔ ka mogya gua la!” (Nahum 3:​1, 7) Kɛ anrɛɛ Dwona bahɔyɛ gyimalilɛ ne la, ɔzile kpɔkɛ kɛ ɔnriandi.—Dwona 1:3.

15. Duzu a maanle Dwona nyianle Gyihova anu anwodozo kpole a? (Dwona 2:​6-9)

¹⁵ Mɔɔ Dwona ɛlɛnriandi la, Gyihova luale nwanwane adenle zo liele ye na ɛhye maanle Dwona nwunle kɛ Gyihova lɛ tumi kpole. (Dwona 1:​15, 17) Dwona zukoale debie vile nu. Ɔnwunle kɛ ɔnle kɛ ɔsulo kɛ ɔbahɔ Nenɛvɛ ɔluakɛ Gyihova bahola abɔ ɔ nwo bane avi esiane biala anwo. (Kenga Dwona 2:​6-9.) Mɔɔ Gyihova zoanle Dwona bieko la, akee yeannriandi. Ɔhɔle Nenɛvɛ, menli ne diele ye edwɛkɛ ne ɔti bɛanzɛkye bɛ.—Dwona 3:5.

16. Saa ɛzulolɛ ka yɛ a, kɛzi nwunu bahola aboa yɛ ɛ? (Mrɛlɛbulɛ 29:25) (Eza nea nvoninli ne mɔ.)

¹⁶ Duzu a yɛbahola yɛazukoa yɛavi edwɛkɛ ɛhye anu a? Yɛngulo kɛ yɛmaa debie biala, titili sonla nwo ɛzulolɛ ka yɛ na ɔmaa yɛtwenlehwenle yɛ bo aze wɔ Gyihova ɛzonlenlɛ nu. (Kenga Mrɛlɛbulɛ 29:25.) Nwunu mɔɔ Dwona lale ye ali la boale ye ɔmaanle ɔnwunle kɛ ɔnle kɛ ɔdwenle ngyegyelɛ mɔɔ ɔbayia wɔ ye gyimalilɛ ne anu la anwo, emomu Gyihova baboa ye. Yɛdayɛ noko, yɛngulo kɛ yɛfa yɛ adwenle yɛsie ɛzulolɛ mɔɔ ka yɛ la azo, emomu yɛbadwenledwenle kɛzi Gyihova boale yɛ wɔ dɛba ne na ɔbɔle yɛ nwo bane la anwo. Eza yɛbahola yɛadwenledwenle mediema mɔɔ bɛlile tɛnlabelɛ mɔɔ ka bɛ ɛzulolɛ la azo anzɛɛ bɛvale bɛ nwo bɛdole Gyihova anwo zo na ɔboale bɛ ɔmaanle bɛyɛle gyimalilɛ bie mɔɔ yɛ se la neazo ne anwo.a (Hib. 13:6) Bɛmaa yɛla nwunu ali ɔlua yɛ nwo mɔɔ yɛbava yɛado Gyihova anwo zo bɔkɔɔ na yɛaboa awie mɔ yɛamaa bɛdabɛ noko bɛayɛ zɔ la azo.

NYIA NWUNU NA MMAMAA ƆFI Ɛ SA

17. Kɛ ɔkɛyɛ na yɛanyia nwunu kpole ɛ?

¹⁷ Kɛ mɔɔ yɛzuzu nwo la, saa yɛda nwunu ali a ɔbahola yeaboa yɛ yeamaa yɛali ngyegyelɛ mɔɔ yɛbayia la anwo gyima kpalɛ. Kɛ ɔkɛyɛ na yɛanyia nwunu kpole ɛ? Gyihova angomekye a bahola amaa yɛanyia nwunu a, na ɔdua ye Edwɛkɛ ne nee ye sunsum nwuanzanwuanza ne azo a ɔfa ɔmaa yɛ a. (Nih. 9:20; Edw. 32:8) Ɔfa folɛdulɛ mɔɔ baboa yɛ yeamaa yɛasisi kpɔkɛ kpalɛ na yeamaa yɛahomo yɛ nwo zo la ɔmaa yɛ. (Edw. 119:​97-101) Saa yɛdwenledwenle mɔɔ Baebolo ne ka la anwo na yɛsɛlɛ Gyihova kɛ ɔva ye sunsum ne ɔboa yɛ a, ɔmaa yɛnyia nwunu. Ɛhye maa yɛte edwɛkɛ bie abo kpalɛ yɛɛ ɔmaa yɛnwu kɛzi yɛbali nwolɛ gyima kpalɛ la amaa edwɛkɛ mɔɔ yɛbaha nee mɔɔ yɛbayɛ la ahile kɛ yɛdwenle ninyɛne nwo kɛ Gyihova la.—Mrɛ. 21:​11, ɔbdw.

18. Duzu a wɔbɔ kpɔkɛ kɛ ɛbayɛ a?

¹⁸ Bɛmaa yɛhɔ zo yɛkpondɛ nwunu yɛvi Gyihova ɛkɛ na yɛzɔ nuhua boɛ. (Edw. 14:2) Saa yɛyɛ ye zɔ a, ɔnrɛmaa yɛnrɛhwe yɛ nwo yɛnrɛvi “nwunu adenle nu” ɛlɛ. (Mrɛ. 21:16) Emomu, ɔbamaa yɛabɔ kpɔkɛ ɛsesebɛ kɛ yɛbala nwunu ali wɔ mekɛ biala nee tɛnlabelɛ biala anu. Ɛhye bamaa ‘yeawie yɛ boɛ.’