Sogyanli Bie Nee Kakula Raalɛ Ekyi Ne

Bɛvale Yizilayɛnli kakula raalɛ ekyi bie bɛhɔle Selea maanle nu. Ɛnee ɛkɛ ne ɛmbikye ye sua zo fee. Selea sogyama vale ye vile ye awovolɛ anwo na kɛkala, ɔle sogya kpanyinli Neeyaman aye ne sonvolɛ. Kakula ekyi ne sonle Gyihova noko menli mɔɔ ɔ nee bɛ de la ɛnzonle ye.

Ewule ɛzulolɛ bie guale Neeyaman anwo ɔmaanle ɔdele nyane dahuu. Ɛnee kakula raalɛ ekyi ne kpondɛ kɛ ɔboa ye. Ɔhanle ɔhilele Neeyaman aye ne kɛ: ‘Meze awie mɔɔ bahola ayɛ ɛ hu ayile a. Gyihova ngapezonli bie wɔ Yizilayɛ, bɛfɛlɛ ye Yilaehya. Ɔbahola yeayɛ ɛ hu ayile.’

Neeyaman aye ne hanle mɔɔ kakula raalɛ ne hanle la hilele ɔ hu. Neeyaman liele dole nu na ɔhɔnwunle Yilaehya wɔ Yizilayɛ. Ɛnee Neeyaman anye la kɛ Yilaehya balie ye kɛ sonlakpole bie la. Noko Yilaehya zoanle ye sonvolɛ ne maanle ɔhɔyiale Neeyaman na ɔzele ye kɛ: ‘Kɔbia Azule Dwɔdan ne anu fane nsuu na ɛbade kpɔkɛ.’

Neeyaman arɛle bɔle na ɔhanle kɛ: ‘Ɛnee medwenle kɛ ngapezonli ne bavɛlɛ ye Nyamenle ne, na yeava ɔ sa yeawɔza me ewule ne azo yeayɛ me ayile. Noko ɔse mengɔmbia azule ɛhye mɔɔ wɔ Yizilayɛ la anu. Yɛlɛ azule kpalɛ wɔ Selea. Duzu ati a mengɔ nehane a?’ Neeyaman vale ɛya na ɔvile Yilaehya sua nu ɛkɛ.

Neeyaman sonvolɛma ne boale ye maanle ɔdwenlenle nwolɛ kpalɛ. Bɛbizale ye kɛ: ‘Saa ɔhanle kɛ ɛyɛ debie ɛsesebɛ bie a, anrɛɛ ɛnrɛyɛ ɔ? Mɔɔ ngapezonli ne se ɛyɛ la ɛnyɛ se. Duzu ati a ɛnrɛyɛ a?’ Neeyaman diele bɛ. Ɔhɔdɔle Azule Dwɔdan ne anu fane nsuu. Mɔɔ Neeyaman wiele la, akee ɔdele kpɔkɛ bɔkɔɔ. Ɔ nye liele kpole na ɔhɔyɛle Yilaehya mo. Neeyaman hanle kɛ: ‘Kɛkala, menwu kɛ Gyihova a le nɔhalɛ Nyamenle ne a.’ Mɔɔ Neeyaman dele kpɔkɛ na ɔhɔle sua nu la, ɛnea a kɛzi Yizilayɛnli kakula raalɛ ne dele nganeɛ ɛ?