Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Yɛfa Baebolo Ne Kilehile Buluku Ne Yɛmaa

Deɛmɔti Ɔhyia La: Baebolo ne Kilehile buluku ne a le buluku titili mɔɔ yɛfa yɛkilehile a. Noko, ɔwɔ kɛ yɛdimoa yɛfa bie yɛmaa awie na yɛ nee ye azukoa. Ɛhye ati, ɔwɔ kɛ yɛ muala yɛbɔ mɔdenle kɛ yɛbava Baebolo ne Kilehile buluku ne yɛamaa wɔ daselɛlilɛ nu. (Mrɛ. 22:29) Yɛlɛ ndenle ngakyile dɔɔnwo, na ɔwɔ kɛ nolobɔlɛma fa mɔɔ baboa bɛ la di gyima.

Kɛzi Bɛyɛ Ye La:

Biza kpuya mɔɔ yɛ anyelielɛ mɔɔ ɛbahola wɔalua zo wɔahwe suamenle ne adwenle wɔahɔ buluku ne tile fɔɔnwo bie azo la. Bie a ɛbahola wɔava kpuya mɔɔ wɔ tile biala mɔlebɛbo la anu ko. Saa suamenle ne bua a, kenga ngɛlɛlera mɔɔ fɛta la na kile ye ɛdendɛkpunli mɔɔ fale edwɛkɛ ne anwo la na ɛ nee ye ɛzuzu nwolɛ sikalɛ.
Adenle fofolɛ a le kɛ ɛbamaa suamenle ne anye alie mukenye mukelɛ ne mɔ anwo na maa ɔnwu mualɛ mɔɔ Baebolo ne fa maa la wɔ buluku ne anu. Kɛ neazo la, ɛbahola wɔaha esiane bie mɔɔ ɛzi kenlensa ye mɔɔ bɛbɔ nwolɛ nolo la na kilehile nu kɛ menli dɔɔnwo ɛnnwu kpuya ne mɔɔ wɔ mukelɛ 3 la anwo mualɛ ne. Anzɛɛ ɛbahola wɔaha kɛ yɛlɛkpɔla yɛ gɔnwo mɔ na yɛaha kenle bie asetɛnla kpalɛ mɔɔ yɛbanyia la anwo edwɛkɛ yɛahile bɛ. Akee fa nvoninli ne mɔɔ wɔ mukelɛ 4-5 la kile ye na biza ye kɛ, “Ɛwɔkɛ ɛhye mɔ boni a ɛ nye balie nwo kɛ ɔbara nu a?” Bieko, ɛbahola wɔaha kɛ wɔra ɛke kɛ ɛbaboa menli wɔamaa bɛanyia ɛbɛlabɔlɛ nu kpuya mɔɔ hyia la anwo mualɛ. Akee fa kpuya ne mɔ mɔɔ wɔ mukelɛ 6 ne abo la kile ye, na maa ɔhile mɔɔ ɔ nye die nwo la.
Dua adenle sikalɛ zo bɔ Baebolo ɛzukoalɛ bo. Ɛbahola wɔaha kɛ: “Yɛlɛfa buluku ɛhye mɔɔ yɛfa yɛsukoa Baebolo ne la yɛahile yɛ gɔnwo mɔ. Asoo wɔnwu bie ɛlɛ ɔ? [Maa ɔbua.] Saa ɛlɛ mekɛ ekyii a, anrɛɛ mebahile wɔ kɛzi ɛbalua buluku ɛhye azo wɔazukoa wɔ Baebolo ne la.”

Sɔ Ɛhye Nea Wɔ Siane Ɛhye Anu:

Bɛzukoa ɛhye wɔ bɛ abusua ɛzonlenlɛ ne abo.
Saa ɛwɔ daselɛlilɛ nu a, ka mɔɔ wɔzuzu nwo kɛ ɛbaha la anwo edwɛkɛ kile nolobɔlɛma gyɛne. (Mrɛ. 27:17) Saa wɔ mukenye edwɛkɛ ne ɛnrɛboa a kakyi nu.