Fa Edwɛkpa Brohyua Ne Kilehile
1. Kɛzi bɛyɛle Edwɛkpa brohyua ne ɛ?
1 Kɛ mɔɔ yɛzuzule nwolɛ wɔ July Yɛ Belemgbunlililɛ Gyima ne anu la, debie bieko mɔɔ yɛfa yɛkilehile la a le Edwɛkpa Mɔɔ Vi Nyamenle Ɛkɛ! brohyua ne. Bɛanva ngɛlɛlera mɔɔ wɔ nu la anu edwɛkɛ ne mɔ bɛamba amaa ahenle mɔɔ ɔlɛsukoa la agenga bɛ wɔ ye Baebolo ne anu. Yɛ mbuluku dɔɔnwo wɔ ɛkɛ mɔɔ bɛhɛlɛ ye mɔɔ saa awie asa ka bie a, ɔ ngomekye ɔbahola yeazukoa, noko Edwɛkpa brohyua ne ɛdeɛ, kyesɛ awie nee bɛ sukoa. Yemɔti, saa yɛfa bie yɛmaa suamenle bie a, ɔwɔ kɛ yɛkile ye kɛzi bɛsukoa ye la amaa ɔ nye alie nwolɛ kɛ ɔbazukoa ninyɛne mgbalɛ dɔɔnwo yeavi Baebolo ne anu.—Mat. 13:44.
2. Kɛzi yɛbahola yɛava Edwɛkpa brohyua ne yɛali gyima wɔ mekɛ mɔɔ limoa la anu ɛ?
2 Mekɛ Mɔɔ Limoa La: Ɛbahola wɔaha kɛ: “Mera ɛke ɔluakɛ menli dɔɔnwo ɛnnwu kɛzi ewiade ɛhye ɛlɛkɔ ye a. Ɛnea a tɛnlabelɛ ne bayɛ kpalɛ ɔ? [Maa ɔbua.] Edwɛkpa bie wɔ Baebolo ne anu mɔɔ ɔbahola yeamaa yɛanyia anyelazo a. Kpuya mɔɔ Baebolo ne fa nwolɛ mualɛ maa la bie mɔ ɛne.” Fa brohyua ne maa suamenle ne na maa ɔkpa kpuya ne mɔɔ wɔ ɔ nzi la ko. Akee fa ɛdendɛkpunli ne mɔɔ limoa wɔ zɔhane ɛzukoalɛdeɛ ne anu la kile ye kɛzi bɛsukoa ye la. Eza ɛbahola wɔakpa ɛzukoalɛdeɛ ne ko na wɔagyinla zo wɔabiza suamenle ne kpuya mɔɔ bamaa ɔ nye alie nwo la na akee wɔahile ye kɛzi brohyua ne baboa ye yeamaa yeanwu mualɛ ne wɔ Baebolo ne anu la. Saa zɔhane ɛzukoalɛdeɛ ne anwo vidio wɔ jw.org azo a, nolobɔlɛma bie mɔ eza ye kile suamenle ne.
3. Ka kɛzi yɛbava Edwɛkpa brohyua ne yɛayɛ debiezukoalɛ la.
3 Kɛzi Bɛyɛ Debiezukoalɛ Ne La: (1) Kenga kpuya ne mɔɔ bɛyɛ ye bile kpalɛ mɔɔ nɔma wɔ nwo la amaa yeaboa suamenle ne yeamaa yeava ye adwenle yeazie edwɛkɛ titili ne azo. (2) Kenga ɛdendɛkpunli ne mɔɔ doa zo la. (3) Kenga ngɛlɛlera ne mɔ mɔɔ bɛhyea bɛ la na biza kpuya kpalɛ mɔɔ baboa suamenle ne yeamaa yeanwu kɛzi ngɛlɛlera ne bua kpuya ne mɔɔ nɔma ne wɔ nwo la. (4) Saa ɛdendɛkpunli bieko doa zo a, yɛ ɔdaye noko kɛ mɔɔ bɛhile ye wɔ anwuma ɛke la. Saa vidio bie bua kpuya ne na ɛtɛyele ɛtɛkilele suamenle ne a, ye kile ye wɔ debiezukoalɛ ne anu. (5) Ɛwie a, biza suamenle ne kpuya ne mɔɔ nɔma ne wɔ nwolɛ la maa ɔbua na nea kɛ ɔte ɔ bo.
4. Nzɔne a baboa yɛ yeamaa yɛava brohyua ɛhye yɛali gyima kpalɛ a?
4 Nwu brohyua ɛhye anu edwɛkɛ ne kpalɛ. Nwolɛ adenle biala ba a fa di gyima. Kolaa na ɛ nee sukoavo bie azukoa debie la, dwenle sukoavo ne nee adenle kpalɛ mɔɔ ɛbalua zo wɔava ngɛlɛlera mɔɔ wɔ ɛzukoalɛdeɛ ne anu ɛ nee ye azuzu edwɛkɛ nwo la anwo. (Mrɛ. 15:28; Gyi. 17:2, 3) Mekɛ mɔɔ ɛlɛnyia anwubielɛ nee anyuhɔlɛ la, ɛbanwu ye kɛ brohyua ɛhye boa kpalɛ maa yɛkilehile awie mɔ nɔhalɛ ne!