Anwubielɛ
◼ Australia: John, nrenya bie mɔɔ hɔle sukulu la, ɛnee kɔ asɔne wɔ ye ngakula nu noko ɔyɛle ɔ nwo “awie mɔɔ ɔnlie Nyamenle ɔnli fee.” Adekpakyelɛnli bie vale brohyua ne mɔɔ se Was Life Created? la manle ye, ɔhɔle ɛkɛ ne bieko la ɔmanle ye brohyua ne mɔɔ se Origin of Life. Adekpakyelɛnli ne hɔle zo vale magazine fofolɛ mɔɔ ɛra la nee edwɛkɛ biala mɔɔ fane abɔdeɛ yɛɛ Baebolo ngapezo nwo la boale ye manle ɔnyianle anyelielɛ kpole. Mekɛ mɔɔ ɔnwunle kɛ John anye ɛbolo la, ɔmanle ye buluku ne mɔɔ se The Bible—God’s Word or Man’s? John gengale wiele la, ɔbɔle ɔ bo ɔhanle ɔ nwo edwɛkɛ kɛ ɔle “awie mɔɔ ɛnzu kpolera kyengye kɛ Nyamenle ɛnle ɛkɛ a.” Adekpakyelɛnli ne akee vale Baebolo ne Kilehile buluku ne, na ɔvale mukelɛ 20 ɛdendɛkpunli 8 nee mukelɛ 23-24 ɛdendɛkpunli 13-16 ɔhilele ye. John anye liele ngɛlɛlera mɔɔ wɔ edwɛkɛ ɛhye anu la anwo kpalɛ yemɔti ɔhanle kɛ, “Bie a ɔwɔ kɛ mesia menea Baebolo ne anu bieko.”
◼ Mexico: Nrenya ko hanle hilele nolobɔlɛnli bie kɛ ɔnlie ɔnli kɛ Nyamenle a manle bɛhɛlɛle Baebolo ne a. Nolobɔlɛnli ne hanle kɛ ɔbahile ye daselɛ mɔɔ kile kɛ sunsum ne a bɛvale bɛhɛlɛle Baebolo ne la. Bɛzukoale debie ekyii, ninyɛne mɔɔ nrenya ne ɛlɛsukoa avi Baebolo ne anu la bɔle ɔ bo hanle ye ahonle. Mekɛ mɔɔ ɔzukoale ngyinlazo kpalɛ nwo debie la, ɔhanle ye ahonle titile. Ɔhanle ɔhilele nolobɔlɛnli ne kɛ: “Mɔlebɛbo ne saa yɛ mu nwiɔ yɛkenga Baebolo ne a, ɔyɛ me kɛ buluku gyɛne biala anu folɛdulɛ la yemɔti ɛnee ɔnga me. Noko kɛkala saa yɛkenga ye ɛbɛlabɔlɛ kpalɛ nwo folɛdulɛ ne titile a, ɔka me ahonle kpalɛ.”
◼ United States: Mekɛ mɔɔ agyalɛma bie ɛlɛyɛ bagua nu daselɛlilɛ titile ne bie la, bɛ nee raalɛ bie mɔɔ vi Taiwan, mɔɔ lɛ Nyamenle anu diedi noko ɔte nganeɛ kɛ Baebolo ne le Alɔfolɛ ɛdeɛ la yiale. Raalɛ ne rale bɛ ɛkponle ne anwo ɔluakɛ ɔnva nwo kɛ ye ɛbɛlabɔlɛ ɛlɛkɔ zo kɛnlɛma la, ɛnee ɔte nganeɛ kɛ yeminli. Ɛnee ɔ nye la kɛ Baebolo ne baboa ye yeamaa yeanyia bodane wɔ asetɛnla nu. Agyalɛma ne vale Baebolo ne Kilehile buluku ne yɛɛ brohyua ne mɔɔ se Lasting Peace and Happiness—How to Find Them na bɛ nee ye bɔle debiezukoalɛ bo. Kɛ anrɛɛ bɛbazukoa buluku ne tile 2 ne la, bɛzukoale brohyua ne foa ne mɔɔ ati se “A Guidebook for the Blessing of All Mankind” la. Mekɛ mɔɔ bɛzukoale ɛdendɛkpunli nsia mɔɔ lumua wɔ zɔhane foa ne bɛwiele la, ɔzinle raalɛ ne anwo kɛ ɛfa Baebolo ne ɛto asɔne mbuluku gyɛne nwo a ɔle ngakyile kolaa la. Mekɛ mɔɔ bɛzukoale Baebolo ngapezo dɔɔnwo mɔɔ ɛra nu anwo debie la, ɔhanle kɛ, “Buluku gyɛne biala ɛnle ɛkɛ mɔɔ mesuzu kɛ ɔka nɔhalɛ kɛ Baebolo ne la!”
◼ Japan: Suamenle bie hanle hilele nolobɔlɛnli bie kɛ ɔnlie Nyamenle ɔnli ɛdeɛ, noko nolobɔlɛnli ne hɔle zo vale mekɛ ekyi kpɔlale ye, na ɔvale Awake! nu edwɛkɛ mɔɔ ati se “Was It Designed?” la ɔboale ye. Ngyikyingyikyi, nrenya ne hakyile ye adwenle na ɔliele ɔdole nu kɛ bie a Bɔvolɛ bie wɔ ɛkɛ. Kɛkala ɔdie ɔdi kɛ Nyamenle wɔ ɛkɛ, na nolobɔlɛnli ne nee ye ɛlɛsukoa brohyua ne mɔɔ se Edwɛkpa Mɔɔ Vi Nyamenle Ɛkɛ! la.
◼ Canada: Adiema raalɛ bie vale magazine manle raalɛ bie mɔɔ ɛlɛfi ye sua nu ahɔvo ye kale nu la. Nzinlii mɔɔ adiema raalɛ ne ziale rale la, raalɛ ne hanle ye penyi kɛ ɔ nye ɛnlie nwolɛ yɛɛ ɔnlie Nyamenle ɔnli. Adiema raalɛ ne ammaa ye abɛ nu ambu na ɔhɔle zo ɔvale brohyua ne mɔɔ se A Satisfying Life—How to Attain It la ɔmanle raalɛ ne. Mekɛ mɔɔ adiema raalɛ ne hɔdole raalɛ ne wɔ sua nu la, ɔhanle kɛ ɔze kɛ raalɛ ne ɛnlie Nyamenle ɛnli ɛdeɛ, noko ɔdwenle ɔ nwo ɔluakɛ ɔze kɛ ɔle awovolɛ ko. Ɔvale brohyua ne mukelɛ 4, ɛdendɛkpunli 6 ne ɔhilele raalɛ ne, ɛkɛ ne ka kɛzi bɛnyia folɛdulɛ kpalɛ la anwo edwɛkɛ. Akee ɔhanle kɛ ɔgenga ɛzukoalɛdeɛ 2 mɔɔ ka ngakula ɛtetelɛ nwo edwɛkɛ la. Ɔyɛle raalɛ ne fɛ na ɔliele brohyua ne.