Fa Sie
Ɛlɛfa Brohyua Ɛhye Mɔ Wɔali Gyima Ɔ?
Spirit of the Dead
Bɛyɛ bɛmaa menli mɔɔ lɛ diedi kɛ awie wu a ɔwɔ ɛkɛ na eza bɛdie mɔwuamra sunsum bɛdi la
Kɛzi bɛfa bɛmaa la: “Yɛkulo kɛ ɛkile wɔ adwenle wɔ Baebolo ne anu edwɛkɛ ɛhye mɔɔ fane mɔwuamra anwo la anwo. [Kenga Nolobɔvo ne 9:5.] Ɛsuzu kɛ mɔwuamra lɛ tumi mɔɔ bɛfa bɛboa yɛ anzɛɛ bɛgyegye yɛ ɔ? [Maa ɔbua.] Brohyua ɛhye maa yɛnyia daselɛ mɔɔ kile kɛ ɔnle kɛ alesama sulo mɔwuamra la.” Fa brohyua ne maa ye.
Ɛbahola wɔazɔ ɛhye wɔanlea: Saa ɛsia ɛkɔ ɛkɛ a, kenga mukelɛ 2 nee 3 na bɛzuzu edwɛkɛ mɔɔ ɛbizale suamenle ne la anwo. Akee kenga ngɛlɛlera mɔɔ wɔ mukelɛ 5 la fa kile kɛ mɔwuamra ɛnlɛ tumi biala. Kpa edwɛkɛtile ko wɔ mukelɛ 3 mɔɔ ɛ nee ye bazuzu nwo mekɛ fofolɛ la.
A Book for All People
Bɛyɛ bɛmaa menli mɔɔ ze kenga na bɛnde Baebolo ne abo la
Kɛzi bɛfa bɛmaa la: Kenga 2 Temɔte 3:16, 17. Akee ka kɛ: “Asoo ɛdie ɛto nu kɛ Baebolo ne vi Nyamenle sunsum nu? Anzɛɛ ɛdwenle kɛ ɔle buluku kpalɛ ala ɔ? [Maa ɔbua.] Menli dɔɔnwo lɛ adwenle ngakyile wɔ kpuyia ɛhye anwo, noko yɛnwu kɛ menli ekyi bie yɛɛ amgba sukoa Baebolo ne a. [Kenga anwubielɛ ne mɔɔ wɔ edwɛkɛtile ne mɔɔ wɔ mukelɛ 3 abo la.] Brohyua ɛhye mɔɔ anu yɛ anyelielɛ la maa yɛnwu ndelebɛbo kpalɛ mɔɔ ɔti ɔwɔ kɛ menli mɔɔ vi mbusua ngakyile nu na asolo bɛ diedi suzu mɔɔ Baebolo ne ka anwo la.”
Ɛbahola wɔazɔ ɛhye wɔanlea: Saa suamenle ne die brohyua ne a, ka kɛ: “Deɛmɔti menli dɔɔnwo dwenle kɛ nvasoɛ ɛnle Baebolo ne azo la a le kɛ, ɛzonlenlɛ dɔɔnwo ɛmbu Baebolo ne yɛɛ bɛngilehile nuhua nɔhalɛ ne. Saa mesia meba a, mebamaa wɔ neazo ko.” Saa ɛsia ɛkɔ a, bɛzuzu edwɛkɛ mɔɔ wɔ mukelɛ 4-5 la bie mɔ anwo.
You Can Be God’s Friend!
Bɛyɛ bɛmaa menli mɔɔ bɛnze nwoma anzɛɛ bɛnze kenga la
Kɛzi bɛfa bɛmaa la: “Asoo ɛdwenle kɛ yɛbahola yɛayɛ Nyamenle agɔnwo? [Maa ɔ bua. Akee kenga Gyemise 2:23.] Bɛyɛ brohyua ɛhye kɛ bɛfa bɛaboa yɛ amaa yɛayɛ Nyamenle agɔnwo kɛmɔ Ebileham yɛle la.”
Ɛbahola wɔazɔ ɛhye wɔanlea: Mekɛ mɔɔ lumua anu anzɛɛ ɛlɛyɛ sia kɔkpɔla a, bɛzuzu ɛzukoalɛdeɛ 1 ne amuala anwo anzɛɛ ye foa bie na fa kile ye kɛzi bɛyɛ Baebolo ɛzukoalɛ la.
Does God Care About Us
Bɛyɛ bɛmaa menli mɔɔ dwenle ngyegyelɛ mɔɔ ɛlɛkɔ zo ɛnɛ la anwo na bɛnnwu ye kɛ Nyamenle dwenle yɛ nwo la
Kɛzi bɛfa bɛmaa la: “Menli bie mɔ fa amaneɛnwunlɛ nee nzisi mɔɔ bɛlɛnwu ye wɔ ewiade ne anu la to Nyamenle anwo zo. Bɛsuzu kɛ, saa Nyamenle mɔɔ bɔle anwuma nee aze la dwenle yɛ nwo amgba a, anrɛɛ ɔbamaa amaneɛnwunlɛ kɔsɔɔti ara awieleɛ. Kɛzi ɛte nganeɛ wɔ nwolɛ ɛ? [Maa ɔbua.] Edwɛndolɛ 72:12-14 kile kɛ Nyamenle dwenle yɛ nwo amgba. Amaneɛnwunlɛ nee nzisi ɛnvi Nyamenle. Yebɔ ɛwɔkɛ kɛ ɔnrɛhyɛ ɔbaye ɛtanevolɛma kɔsɔɔti yeavi ɛkɛ. Brohyua ɛhye, Asoo Nyamenle Dwenle Yɛ Nwo Amgba?, kile mɔɔ ɔbayɛ nee kɛzi yɛbanyia zolɛ nvasoɛ la.” Kɔ zo ɛ nee ye bɛzuzu edwɛkɛ mɔɔ wɔ mukelɛ 27, ɛdendɛkpunli 22 ne la anwo, na fa brohyua ne maa ye.
Ɛbahola wɔazɔ ɛhye wɔanlea: Saa suamenle ne die brohyua ne a, ka kɛ: “Menli dɔɔnwo die di kɛ Nyamenle wɔ ɛkɛ, noko bɛnlie bɛndo nu kɛ ɔdwenle yɛ ngyegyelɛ nwo. Kenle fofolɛ, mebahulo kɛ me nee wɔ bazuzu bodane mɔɔ Nyamenle lɛ maa alesama la anwo.” Bɛzuzu foa 1, ɛdendɛkpunli 3, 4; yɛɛ foa 2, ɛdendɛkpunli 1, 2 anwo.
A Satisfying Life—How to Attain It
Bɛyɛ bɛmaa menli mɔɔ bɛngɔ asɔne la
Kɛzi bɛfa bɛmaa la: “Kɛmɔ menli dɔɔnwo kulo kɛ bɛnyia asetɛnla kpalɛ la ati a yɛra wɔ ɛkpɔlalɛ a. Yɛ muala yɛyia ngyegyelɛ mɔɔ ɔmmaa yɛ nye ɛnlie la. Saa ɔba ye zɔ a, bie a yɛmaa busuanli anzɛɛ agɔnwolɛ bie tu yɛ folɛ anzɛɛ yɛdua mbuluku nee Intanɛte zo yɛkpondɛ moalɛ. Nienwu a wɔnwu kɛ folɛdulɛ kpalɛ wɔ a? [Maa ɔbua.] Bie mɔ nwu kɛ folɛdulɛ kpalɛ wɔ Baebolo ne anu a, ɔsi bɛ nwo. Neazo ɛne. [Fa tile 2 ne kile suamenle ne na bɛgenga ngɛlɛlera mɔɔ wɔ nu la anu ko.] Bɛyɛ brohyua ɛhye kɛ bɛfa bɛahilehile kɛzi yɛbahola yɛanyia asetɛnla mɔɔ yɛ ahunlundwolɛ la anu.”
Ɛbahola wɔazɔ ɛhye wɔanlea: Saa suamenle ne die brohyua ne a, ka kɛ: “Menli dɔɔnwo ɛde kɛ Baebolo ne anu edwɛkɛ bie mɔ ɛnle nɔhalɛ. Saa mesia meba a, mebahile wɔ Baebolo ne anu neazo ko mɔɔ ka abɔdeɛ nwo nrɛlɛbɛ nwo edwɛkɛ mɔɔ bie a ɔbazi ɛ nwo la.” Saa ɛsia ɛkɔ a, bɛzuzu ɛdendɛkpunli 4 ne mɔɔ wɔ mukelɛ 12 la anwo.
The Origin of Life—Five Questions Worth Asking
Bɛyɛ bɛmaa Keleseɛne ngakula mɔɔ bɛlɛkile bɛ ngakyihakyililɛ wɔ sukulu la. Eza ɔboa wɔ mekɛ mɔɔ yɛ nee menli mɔɔ die ngakyihakyililɛ di, menli mɔɔ ɛnlie Nyamenle ɛnli anzɛɛ bɛka kɛ ɔnle ɛkɛ ɛlɛsuzu edwɛkɛ nwo la (Yɛnrɛva brohyua ɛhye yɛnrɛmaa wɔ azua nu.)
Kɛzi yɛbava yɛaboa awie mɔɔ die ngakyihakyililɛ di anzɛɛ ka kɛ Nyamenle ɛnle ɛkɛ la: “Asɛɛ abɔdeɛ nwo nrɛlɛbɛ buluku biala kilehile ngakyihakyililɛ. Ɛdie ɛdi kɛ ngakyihakyililɛ le ngilehilelɛ ala anzɛɛ nɔhalɛ edwɛkɛ ɔ? [Maa ɔbua.] Amaa yɛabua la, maa yɛsuzu edwɛkɛ nwiɔ ne anwo. Brohyua ɛhye maa yɛnwu daselɛ bie mɔ mɔɔ maa menli die di kɛ bɛbɔle ngoane la.”
Ɛbahola wɔazɔ ɛhye wɔanlea: Saa ɛkɔ sukulu a, gyakyi brohyua ne bie to wɔ ɛkponle ne azo na nea kɛ ɔbamaa ɛ gɔnwo mɔ sukuluma bie mɔ abiza nwolɛ edwɛkɛ a.
The Pathway to Peace and Happiness
Bɛyɛ bɛmaa Buddama
Kɛzi bɛfa bɛmaa Buddanli mɔɔ le kpanyinli la: “Bie a ɛdwenle adwenle ɛtane mɔɔ ɛbu zo nee kɛzi ɔgyegye yɛ mra ne mɔ la anwo. Duzu ati a ɛsuzu kɛ ngakula dɔɔnwo ɛlɛfa bɛ nwo awula ɛbɛlatane nu ɛ? [Maa ɔbua.] Asoo ɛze kɛ bɛhanle ɛhye bɛdole ɛkɛ wɔ buluku bie anu mekɛ tendenle kolaa na Hindu, Keleseɛne, nee Ngɛnlamo ɛzonlenlɛ ara ɔ? [Kenga 2 Temɔte 3:1-3.] Yɛ ye nzonlɛ kɛ ɔnva nwo kɛ menli kɔ zo sukoa la, ninyɛne ɛhye mɔ tɛbɔ ɛkɛ. [Kenga ngyɛnu 7 ne.] Edwɛkɛ mɔɔ wɔ buluku ɛhye anu la ɛboa me ɛmaa mede nɔhalɛ ne mɔɔ menli dɔɔnwo ɛngola ye sukoa la abo. Ɛkulo kɛ ɛkenga ɔ?”
Ɛbahola wɔazɔ ɛhye wɔanlea: Saa ɛsia ɛkɔ ɛkɛ ne kenle fofolɛ, wɔ mekɛ mɔɔ suamenle ne anye ɛlie Baebolo ne anwo la a, fa kpuyia ne mɔɔ wɔ buluku ne anzi la kile ye, na maa ɔnwu kɛzi ɔbahola yeahɛla Baebolo ne Kilehile buluku ne bie la. Ka kile ye kɛ saa ɔkulo kɛ ɔnwu buluku ne a, ɛ nee bie rale. Fa bu2luku ne nuninyɛne ne kile ye na bɛzuzu ɛdendɛkpunli ko anzɛɛ nwiɔ wɔ tile ne mɔɔ ɔbahile la anwo.
Our Problems—Who Will Help Us Solve Them?
Bɛyɛ bɛmaa Hinduma
Kɛzi bɛfa bɛmaa la: “Menli dɔɔnwo mɔɔ yɛ nee bɛ ɛli adwelie la arɛle ɛbɔ, ɔlua amumuyɛyɛlɛ mɔɔ ɛlɛkɔ zo wɔ ewiade ne anu la ati. Ɛdwenle kɛ kenle ko dedee, Nyamenle baye ngyegyelɛ mɔɔ wɔ ewiade ɛhye anu la avi ɛkɛ ɔ? [Maa ɔbua.] Ngapezo ɛhye maa yɛnyia anyelazo. [Kenga Edwɛndolɛ 37:11.] Mɔɔ megenga la vi Baebolo ne, mɔɔ le buluku mɔɔ menli dɔɔnwo ɛnde ɔ bo la ati bɛngilehile nu kpalɛ la. Ɔbazi ɛ nwo kɛ ɛbanwu kɛ Baebolo ne ɛnle Alɔfolɛ buluku; ɔngile kɛ maanle anzɛɛ menli bie ɔwɔ kɛ di ɔ gɔnwo anwo zo tumi. Emomu, ɔmaa yɛnyia anyelazo kɛ ɔnrɛhyɛ Nyamenle baye yɛ ngyegyelɛ kɔsɔɔti avi ɛkɛ. Eza ngyinlazo dɔɔnwo wɔ nu mɔɔ kola boa yɛ maa yɛgyinla yɛ ngyegyelɛ nloa ɛnɛ a.”
Ɛbahola wɔazɔ ɛhye wɔanlea: Saa ɛlɛyɛ sia kɔkpɔla, wɔ mekɛ mɔɔ suamenle ne anye ɛlie Baebolo ne anwo la a, fa nvoninli mɔɔ wɔ Baebolo ne Kilehile buluku ne mukelɛ 4-5 la kile ye. Kenga ngɛlɛlera mɔɔ wɔ nu la ko na fa buluku ne maa ye.
Will There Ever Be a World Without War?
Bɛyɛ bɛmaa Dwuuma
Kɛzi bɛfa bɛmaa la: “Alesama tetedwɛkɛ nu amuala, bɛnwu amaneɛ ɔlua konle ti. Ɔnva nwo kɛ menli se bɛkulo anzondwolɛ la, duzu ati a ɛsuzu kɛ konle tɛkɔ zo ɛ? [Maa ɔbua.] Ayezaya ngapezo ɛhye maa yɛnyia anyelazo. [Kenga Ayezaya 2:4.] Noko akee, ɛhye maa yɛbiza kpuyia dɔɔnwo: Kenlenzu yɛɛ kɛzi Ayezaya ngapezo ne bara nu a? Duzu ati a yɛkola yɛfa yɛ nwo yɛto Ngɛlɛlera ne azo kɛ anyelazo kpalɛ wɔ nu a? Brohyua ɛhye ye kpuyia ɛhye mɔ anloa.”
Ɛbahola wɔazɔ ɛhye wɔanlea: Saa suamenle ne die brohyua ne a, buke mukelɛ 16-17 kile ye na ka kɛ: “Menli dɔɔnwo dwenle amumuyɛyɛlɛ mɔɔ le kɛ Dwuuma dɔɔnwo ɛhunlɛ ne anwo na bɛbiza kɛ, ‘Saa Nyamenle wɔ ɛkɛ a, duzu ati a ɔmaa amaneɛnwunlɛ nwo adenle a?’ Saa mesia meba a, yɛbazuzu kpuyia ɛhye anwo.”
The Guidance of God—Our Way to Paradise
Bɛyɛ bɛmaa Ngɛnlamoma mɔɔ bɛde ɛleka mɔɔ bɛkola bɛsukoa Baebolo ne la
Kɛzi bɛfa bɛmaa la: “Meze kɛ Ngɛnlamoma die nɔhalɛ Nyamenle kokye ne nee ngapezoma kɔsɔɔti di. Ɔle nɔhalɛ ɔ? [Maa ɔbua.] Mekulo kɛ meka tete ngapezo bie mɔɔ kile kɛzi kenlebie azɛlɛ ne bayɛ paladaese la anwo edwɛkɛ mekile wɔ. Mebahola meagenga mɔɔ ngapezonli ne hɛlɛle la meahile wɔ ɔ? [Kenga Ayezaya 11:6-9.] Menli dɔɔnwo ɛnnwu kɛzi Nyamenle bava nzenzaleɛ ɛhye ara azɛlɛ ye azo la. Brohyua ɛhye kile mɔɔ ngapezoma ka ye wɔ edwɛkɛ ɛhye anwo la.”
Ɛbahola wɔazɔ ɛhye wɔanlea: Saa suamenle ne die brohyua ne a, ka kɛ: “Buluku ne mɔɔ vi Nyamenle la kilehile kɛ mɔlebɛbo ne, ɛnee sonla de paladaese. Kenle fofolɛ meba a, mebahulo kɛ mebua kpuyia ɛhye, ‘Kɛ ɔyɛle mɔɔ sonla anli Nyamenle adehilelɛ zo na paladaese ne vile ɔ sa ɛ?’” Saa ɛsia ɛkɔ a, ɛ nee ye bɛzuzu foa ne mɔɔ bɔ ɔ bo wɔ mukelɛ 6 ne la anwo.
Real Faith—Your Key to a Happy Life
Bɛyɛ bɛmaa Ngɛnlamoma mɔɔ bɛde ɛleka mɔɔ bɛkola bɛsukoa Baebolo ne la
Kɛzi bɛfa bɛmaa la: Fa nvoninli ne mɔɔ wɔ mukelɛ 16-17 la kile ye na ka kɛ: “Tɛnlabelɛ ɛhye le ngakyile fi mɔɔ ɛnɛ yɛnwu ye la anwo. Ɛdwenle kɛ ewiade ne bahola ayɛ kɛ ɛhye la kenlebie ɔ? [Maa ɔbua.] Tie mɔɔ buluku ɛhye mɔɔ vi Nyamenle ɛkɛ ne bɔ nwolɛ ɛwɔkɛ la. [Kenga ngɛlɛlera mɔɔ wɔ nu la ko fi wɔ Baebolo ne anu.] Brohyua ɛhye boa maa yɛnyia diedi kpundii kɛ ɛwɔkɛ ɛhye mɔ bara nu.”
Ɛbahola wɔazɔ ɛhye wɔanlea: Kolaa na wɔavi ɛkɛ wɔ mekɛ mɔɔ lumua la, ka kile suamenle ne maa ɔkpa kpuyia mɔɔ wɔ buluku ne anzi la anu ko. Yɛ ngyehyɛleɛ kɛ ɛsia ɛba a, ɛ nee ye bazuzu kpuyia ne anwo mualɛ wɔ brohyua ne anu.
Lasting Peace and Happiness—How to Find Them
Bɛyɛ bɛmaa Chinama
Kɛzi bɛfa bɛmaa la: “Ɛbɛlabɔlɛ nu ninyɛne dɔɔnwo gyegye yɛ ɛnɛ mɔɔ ɔmmaa yɛ nye ɛnlie a. Duzu a boa maa ɛ nye die ɔnva kɛ ngyegyelɛ ɛhye mɔ wɔ ɛkɛ la? [Maa ɔbua.] Menli dɔɔnwo di Baebolo ne anu folɛdulɛ zo a ɔmaa bɛ nye die. [Kenga Edwɛndolɛ 119:1, 2.] Bie mɔ bu Baebolo ne kɛ ɔle Alɔfolɛ buluku. Noko yɛ ɛhye nzonlɛ. [Bɛzuzu ɛdendɛkpunli 16 mɔɔ wɔ mukelɛ 17 la anwo.] Brohyua ɛhye ka kɛzi yɛbahola yɛanyia anzondwolɛ nee anyelielɛ dahuu la anwo edwɛkɛ.”
Ɛbahola wɔazɔ ɛhye wɔanlea: Saa suamenle ne die brohyua ne a, ɛ nee ye bɛbɔ nu bɛgenga ɛdendɛmunli nsa ne mɔɔ lumua wɔ ɛdendɛkpunli 18 mɔɔ wɔ mukelɛ 17 ne la na ka kɛ: “Saa mesia meba a, mebaha mɔɔ Baebolo ne ka ye wɔ kenlebie mɔɔ yɛ nye bahola ala ye ade la anwo edwɛkɛ.” Saa ɛsia ɛkɔ a, bɛzuzu edwɛkɛ ne mɔɔ wɔ mukelɛ 30 ɛdendɛkpunli 6 ne la ko anwo.