Brohyua Fofolɛ Mɔɔ Yɛbava Yɛamaa La!
1. Buluku boni a yɛbava yɛamaa wɔ November a, na ye bodane a le duzu?
1 Wɔ “Bɛhɔ Zo Bɛzinza!” Maangyeba Nyianu mɔɔ bɛyɛle ye 2009 la abo, bɛyele brohyua fofolɛ mɔɔ ati se, The Bible—What Is Its Message? November siane ne bayɛ mekɛ mɔɔ lumua mɔɔ asafo kɔsɔɔti mɔɔ wɔ ewiade la bava amaa a. Kɛzi buluku ɛhye baboa menli mɔɔ wɔ yɛ azɛlɛsinli ne anu la ɛ? Menli dɔɔnwo, titile bɛdabɛ mɔɔ bɛnle Keleseɛnema la ɛnze Baebolo ne anu ninyɛne dɔɔnwo. Ɛhye ati, brohyua ne kilehile nuhua wɔ mukelɛ 3 kɛ, bɛyɛ kɛ ɔboa ɔmaa “bɛnwu Baebolo ne anu ninyɛne dɔɔnwo wɔ adenle sikalɛ zo.”
2. Kɛzi yɛbava brohyua ɛhye yɛamaa ɛ?
2 Kɛzi Yɛbava Yɛamaa La: Yɛbahola yɛaha edwɛkɛ zɛhae: “Yɛkulo kɛ yɛnwu wɔ adwenle wɔ edwɛkɛ ɛhye anwo. [Kenga 2 Temɔte 3:16.] Menli dɔɔnwo die edwɛkɛ ɛhye to nu; bie mɔ noko te nganeɛ kɛ Baebolo ne le buluku kpalɛ ala. Kɛzi ɛbu Baebolo ne ɛ? [Maa ɔbua.] Ɔnva nwo diedi biala mɔɔ yɛlɛ la, adwenle kpalɛ wɔ ɛkɛ mɔɔ ɔti ɔwɔ kɛ yɛneɛnlea Baebolo ne anu a. [Kenga mukenye ɛdendɛkpunli ne mɔɔ wɔ mukelɛ 3 ne ati zo la.] Mekɛ mɔɔ ɛlɛkenga Baebolo ne anu edwɛkɛ mɔɔ yɛ anyelielɛ mɔɔ wɔ brohyua ɛhye anu la, ɛbanwu debie mɔɔ ka ahonle la kɛ: Edwɛkɛtile kokye ala a Baebolo ne gyi zo a.”
3. Edwɛkɛ boni bieko a yɛbahola yɛaha a, titile wɔ azɛlɛsinli mɔɔ Keleseɛnema dɔɔnwo ɛnle nu la anu a?
3 Edwɛkɛ bieko mɔɔ yɛbahola yɛaha la ɛne, titile wɔ mekɛ mɔɔ yɛlɛdi daselɛ wɔ ɛleka mɔɔ Keleseɛnema dɔɔnwo ɛnle la: “Yɛkulo kɛ yɛnwu wɔ adwenle wɔ mɔɔ bɛha ye ɛke wɔ Ngɛlɛlera (anzɛɛ buluku nwuanzanwuanza ɛhye anu) la anwo. [Kenga Edwɛndolɛ 37:11.] Saa ngapezo ɛhye ba nu a, kɛzi ɛdwenle kɛ azɛlɛ ye azo bayɛ ɛ? [Maa ɔbua.] Ɛhye a le anyelazo nee arɛlekyekyelɛ nwo neazo mɔɔ menli mɔɔ vi maanle ngakyile nu na bɛlɛ diedi ngakyile la bahola anyia avi Baebolo ne anu a.” Kenga ɛdendɛkpunli ne mɔɔ wɔ mukelɛ 3 ne ati zo la na fa brohyua ne maa ye.
4. Kɛzi yɛbahola yɛava brohyua fofolɛ ne yɛabɔ Baebolo ɛzukoalɛ bo ɛ?
4 Bɔ Baebolo Ɛzukoalɛ Bo: Saa yɛsia yɛkɔ a, yɛbahola yɛahakye suamenle ne wɔ adawu mɔɔ yɛbɔle la anwo, na yɛazukoa edwɛkɛ mɔɔ yɛbɔle nwolɛ adawu la ɛdendɛkpunli ko anzɛɛ nwiɔ na yɛabiza kpuyia ne mɔɔ wɔ foa zɔhane awieleɛ la. Anzɛɛ saa yɛkulo kɛ yɛfa Baebolo ne Kilehile buluku ne yɛmaa ye ɛkɛ ne ala a, yɛbahola yɛagenga brohyua ne anzi edwɛkɛ ne, yɛava buluku ne yɛamaa ye, na yɛabiza ye edwɛkɛtile mɔɔ ɔ nye die nwo la na yɛ nee ye azukoa zɔhane edwɛkɛtile ne ɛdendɛkpunli ko anzɛɛ nwiɔ. Bɛmaa yɛ kɔsɔɔti yɛbɔ mɔdenle yɛva brohyua ɛhye yɛmaa wɔ November anu!