Fa Anyezɔlɛ Kakye Ɛkpɔnedeɛ Ne
1, 2. Duzu ati a ɔwɔ kɛ yɛfa anyezɔlɛ yɛkakye ɛkpɔnedeɛ ne a?
1 Kɛmɔ Keleseɛnema mɔɔ wɔ ewiade amuala la, di Gyisɛse edwɛkɛ ne azo la ati, bɛbayia nuhua wɔ Folɛ, March 22, 2008, bɛahakye Gyisɛse Kelaese ewule ne. (Luku 22:19; 1 Kɔl. 11:23-26) Yɛfi ɛhulolɛ nu yɛyɛ zɔ, ɔluakɛ yɛlɛ anyezɔlɛ kpole yɛmaa zɔhane deɛ ne mɔɔ bɛyɛle ye ɛvolɛ 1,975 mɔɔ ɛze ɛhɔ la. Kɛmɔ Gyisɛse lile nɔhalɛ hɔle ewule nu wɔ amaneɛ kpole mɔɔ bɛhilele ye anu la ati, Gyisɛse dele ɔ Ze duma ne anwo na ɔmanle bɛnyianle edwɛkɛ kpalɛ bɛvale bɛbuale Seetan aholoba ne.—Dwo. 1:11; Mrɛ. 27:11.
2 Gyisɛse mogya ne mɔɔ ɔvale ɔbɔle afɔle la manle ngyekyeleɛ fofolɛ ne lile munli na ɔmanle bɛliele alesama mɔɔ tɔ sinli la bɛdole nu kɛ Nyamenle amra mɔɔ lɛ anyelazo kɛ bɛ nee Kelaese bali tumi wɔ anwuma Belemgbunlililɛ ne anu a. (Gyɛ. 31:31-34; Mak. 14:24) Bieko, Nyamenle lale ɛlɔlɛ kpole mɔɔ ɔlɛ ɔmaa alesama la ali wienyi wɔ mekɛ mɔɔ ɔvale ɔ ra ne mɔɔ ɔkulo ye edwɛkɛ kpole ɔbɔle afɔle kɛmɔ Gyisɛse hilehilele nuhua hilele Nekɔdimɛse la.—Dwɔn 3:16.
3. Kɛzi menli mɔɔ bahɔ Ngakyelɛlilɛ ne abo la banyia nvasoɛ avi nu ɛ?
3 To Ɛsalɛ Fɛlɛ Awie Mɔ: January Yɛ Belemgbunlililɛ Gyima ne vale nzuzulɛ manle yɛ kɛ yɛhɛlɛ menli mɔɔ yɛze bɛ la aluma na yɛdo ɛsalɛ yɛvɛlɛ nuhua ko biala. Wɔbɔ ɔ bo ɛlɛto ɛsalɛ wɔavɛlɛ menli mɔɔ ɛhɛlɛle bɛ aluma la ɔ? Ɛlɛyɛ ngyehyɛleɛ wɔava ɛ nwo wɔawula gyimalilɛ ne mɔɔ yɛbabɔ ɔ bo wɔ March 1 yɛava yɛado ɛsalɛ yɛavɛlɛ menli yɛamaa bɛara Ngakyelɛlilɛ ne bie la ɔ? Menli mɔɔ bahɔ bie la bade Ngɛlɛlera ne anu edwɛkɛ mɔɔ bamaa bɛanyia diedi wɔ ɛkpɔnedeɛ ne anu na ɔlua zo bɛanyia dahuu ngoane la.—Wulo. 10:17.
4. Duzu ati a ɔwɔ kɛ yɛdwu Ngakyelɛlilɛ ne abo ndɛ ɛ?
4 Ɔwɔ kɛ menli mɔɔ bahɔ la yɛ ngyehyɛleɛ dwu ɛkɛ ne ndɛ na bɛyɛ menli mɔɔ liele ɛsalɛdolɛ ne dole nuhua na bɛra la akoaba. Kɛmɔ menli dɔɔnwo bara ngakyelɛlilɛ ne abo la ati, ɔwɔ kɛ yɛmaa yɛ nye kɔ menli mɔɔ bɛle fofolɛ yɛɛ menli mɔɔ ba debiezukoalɛ ɔvi mekɛ mɔɔ kɔ mekɛ la anwo zo titile.
5. Kɛzi ɛbahola wɔaziezie wɔ ahonle wɔamaa ɛvoyialilɛ ɛhye ɛ?
5 Siezie Wɔ Ahonle: Ngakyelɛlilɛ Baebolo ɛgengalɛ titile ne mɔɔ bɔ ɔ bo wɔ March 17 la wɔ Examining the Scriptures Daily—2008 yɛɛ 2008 Calendar ne anu. Saa ɛsuzu ninyɛne mɔɔ anwo hyia mɔɔ zile wɔ Gyisɛse azɛlɛ ye azo ngoane mekɛ mɔɔ li awieleɛ la anwo a, ɔbaboa wɔ yeamaa wɔaziezie wɔ ahonle wɔamaa Ngakyelɛlilɛ ne. (Ezl. 7:10) Saa ɛfi asɔneyɛlɛ nu ɛdwenledwenle Baebolo nu edwɛkɛ ɛhye mɔ anwo a, ɔbamaa wɔanyia anyezɔlɛ kpole wɔamaa ɛlɔlɛ nu mɔɔ Gyihova nee ɔ Ra ne vi vale ɛkpɔnedeɛ ne manle la.—Edw. 143:5.
6. Yɛnyia ɛkpɔnedeɛ ne anwo anyezɔlɛ a, kɛzi ɔbaha yɛ ɛ?
6 Mekɛ mɔɔ ngakyelɛlilɛ ne ɛlɛbikye la, bɛmaa yɛziezie yɛ nwo nee awie mɔ boɛ yɛmaa mekɛ ɛhye mɔɔ anwo hyia la. Saa yɛfi anyezɔlɛ nu yɛkakye ɛkpɔnedeɛ ne a, ɔbamaa agɔnwolɛvalɛ mɔɔ la yɛ nee Gyihova nee ɔ Ra ne avinli la ayɛ kpole. (2 Kɔl. 5:14, 15) Ɔbaha yɛ yeamaa yɛazukoa bɛ wɔ kɛzi bɛfi ɛlɔlɛ nu bɛtu bɛ nwo bɛmaa awie mɔ la.—1 Dwɔn 4:11.