Bɛhɔ Zo “Bɛyɛ Ɛhye” Yɛbayɛ Ngakyelɛlilɛ Ne Wɔ April 5
1. Kɛmɔti a Ngakyelɛlilɛ ne hyia ɛ?
1 “Anrɛɛ bɛyɛ ɛhye bɛva bɛhakye me.” (Luku 22:19) Gyisɛse luale edwɛkɛ ɛhye azo hanle hilele ye ɛdoavolɛma kɛ, bɛhakye ye afɔlebɔlɛ ewule ne. Kɛmɔ ɛkpɔnedeɛ ne ɛyɛ ninyɛne dɔɔnwo la ati, ɛvolɛ biala Ngakyelɛlilɛ ɛvoyia ne le kenle mɔɔ anwo hyia kpole anzɛɛ sonle bolɛ maa Keleseɛnema a. Mekɛ mɔɔ ɛvolɛ ɛhye ɛvoyialilɛ ne mɔɔ bazi April 5 ɛlɛbikye la, kɛ ɔkɛyɛ na yɛahile anyezɔlɛ yɛamaa Gyihova ɛ?—Kɔl. 3:15.
2. Kɛ ɔkɛyɛ na yɛalua debiezukoalɛ nee nwolɛ ɛdwenlenlɛ zo yɛahile anyezɔlɛ wɔ Ngakyelɛlilɛ ne anwo ɛ?
2 Siezie Ɛ Nwo: Yɛta yɛsiezie yɛ nwo yɛmaa ninyɛne mɔɔ yɛbu ye kɛ nwolɛ hyia la. Yɛkola yɛsiezie yɛ ahonle yɛmaa Ngakyelɛlilɛ ne ɔlua ninyɛne mɔɔ sisile wɔ Gyisɛse asetɛnla mekɛ mɔɔ li awieleɛ wɔ azɛlɛ ye azo anu mɔɔ yɛbazukoa kɛ abusua na yɛadwenledwenle nwolɛ la azo. (Ɛzela 7:10) Ɛbanwu ngɛlɛlera ekyi mɔɔ wɔ kalenda ne nee Examining the Scriptures Daily ne anu, noko bɛhile dɔɔnwo nee tile ngakyile mɔɔ nwolɛ edwɛkɛ wɔ nu la wɔ Greatest Man buluku ne anu la wɔ February 1, 2011, Watchtower ne, mukelɛ 23-24 ne anu.
3. Kɛ ɔkɛyɛ na yɛalua dɔɔnwo mɔɔ yɛbayɛ wɔ daselɛlilɛ nu la azo yɛahile anyezɔlɛ wɔ Ngakyelɛlilɛ ne anwo ɛ?
3 Ka Edwɛkɛ Ne: Yɛbahola noko yɛahile yɛ anyezɔlɛ ɔlua dɔɔnwo mɔɔ yɛbayɛ wɔ daselɛlilɛ nu la azo. (Luku 6:45) Ewiade amuala nolobɔlɛ mɔɔ bɛbava bɛado ɛsalɛ bɛavɛlɛ menli kɛ bɛrɛla Ngakyelɛlilɛ ne bie la, bɛabɔ ɔ bo wɔ Folɛ, March 17, mɔɔ kɔ la. Ɛbahola wɔayɛ ngyehyɛleɛ na wɔava mekɛ dɔɔnwo wɔahɔ daselɛlilɛ, na bie a wɔayɛ adekpakyelɛ boavolɛ ɔ? Duzu ati a bɛnzuzu nwolɛ kɛ abusua wɔ Abusua Ɛzonlenlɛ bieko mɔɔ bɛbayɛ la abo ɛ?
4. Nvasoɛ boni mɔ a yɛbanyia yɛavi Ngakyelɛlilɛ ne anu a?
4 Nea kɛzi yɛkɔ Ngakyelɛlilɛ ne abo ɛvolɛ biala a yɛnyia zolɛ nvasoɛ la! Saa yɛsuzu ahunlunyele mɔɔ Gyihova luale zo vale ɔ Ra kokye ne manle kɛ ɛkpɔnedeɛ la anwo a, ɔmaa yɛnyia anyelielɛ nee ɛlɔlɛ kpole yɛmaa Nyamenle. (Dwɔn 3:16; 1 Dwɔn 4:9, 10) Ɛhye ɛmmaa yɛndɛnla yɛmmaa yɛ ngome yɛ nwo. (2 Kɔl. 5:14, 15) Eza ɔmaa yɛnyia ɛhulolɛ kɛ yɛbaye Gyihova ayɛlɛ wɔ bagua nu. (Edw. 102:19-21) Nɔhalɛ nu, Gyihova azonvolɛ mɔɔ lɛ anyezɔlɛ la anye la adenle mɔɔ bɛbanyia wɔ Ngakyelɛlilɛ mekɛ ne mɔɔ bazi April 5 la ɛsesebɛ kɛ, bɛbava bɛabɔ ‘Awulae ewule ne nolo.’—1 Kɔl. 11:26.