Ngakyelɛlilɛ Ɛsalɛdolɛ Kɛlata Mɔɔ Yɛbava Yɛamaa Wɔ Ewiade Amuala!
1. Ewiade amuala nolobɔlɛ titile boni a bɛyɛ nwolɛ ngyehyɛleɛ kolaa na Ngakyelɛlilɛ ne adwu zo a?
1 “Bɛyɛ ɛhye bɛva bɛhakye me.” (Luku 22:19) Amaa bɛali Gyisɛse edwɛkɛ ɛhye azo la, Gyihova azonvolɛ nee anyelielɛma dɔɔnwo bayia nu ahakye Gyisɛse ewule ne wɔ March 30, 2010. Bɛbava kɛlata titile bɛado ɛsalɛ bɛavɛlɛ menli mɔɔ wɔ ewiade amuala la kɛ bɛrɛla Ngakyelɛlilɛ ne bie ɔvi March 13 kɔdwu March 30.
2. Kɛ ɔkɛyɛ na yɛava ɛsalɛdolɛ kɛlata ne yɛamaa ɛ?
2 Kɛzi Yɛbava Yɛamaa La: Ɛbahola wɔava ɛsalɛdolɛ kɛlata ne wɔamaa suamenle ne amaa yeanwu nvoninli mɔɔ wɔ zolɛ la, akee wɔaha kɛ: “Wɔ March 30 nɔsolɛ nu, menli mgbe mgbe mɔɔ wɔ ewiade la bayia nu ahakye Gyisɛse ewule ne. Melɛfa ɛsalɛdolɛ kɛlata ɛhye mearɛlɛ wɔ nee wɔ abusua ne kɛ bɛrɛla bie. Ɛ gɔnwo mɔ noko bahola ara bie. Mesɛlɛ wɔ yɛ mekɛ nee ɛleka mɔɔ bɛbayɛ ɛvoyialilɛ ɛhye la nzonlɛ.” Kɛzi gyinlabelɛ ne de la, ɛbahola wɔagenga Luku 22:19 wɔavi Baebolo ne anu wɔava wɔahile ye Ngɛlɛlera ne anu edwɛkɛ ne. Noko akee, kakye kɛ kɛmɔ mekɛ ne le ekyi la ati, ɔle kpalɛ kɛ wɔ edwɛkɛ ne kɛyɛ sikalɛ.
3. Nwane mɔ a yɛbahola yɛado ɛsalɛ yɛavɛlɛ bɛ a?
3 Saa wɔ asafo ne lɛ azɛlɛsinli kpole a, bie a mgbanyima ne mɔ bamaa bɛagyakyi ɛsalɛdolɛ kɛlata ne ko wɔ menli mɔɔ bɛando bɛ wɔ sua nu la ɛkɛ wɔ kenle mɔɔ lumua la anu. Saa ɔkɛyɛ boɛ a, fa magazine ne mɔ boka ɛsalɛdolɛ kɛlata ne anwo maa. Nea nwu ye kɛ ɛbado ɛsalɛ wɔavɛlɛ menli mɔɔ ɛyɛle ɛkpɔlalɛ bieko wɔ bɛ ɛkɛ, Baebolo sukoavoma, ɛ gɔnwo mɔ gyimayɛvoma, ɛ gɔnwo mɔ sukuluma, ɛ nwo amra, wɔ kpalɛzoamra, yɛɛ menli gyɛne mɔɔ ɛze bɛ la.
4. Ɛlɔlɛ mɔɔ hanle Gyihova manle ɔvale ɛkpɔnedeɛ ne ɔmanle la baha yɛ yeamaa yɛayɛ duzu?
4 Siezie Ɛ Nwo Kɛ Ɛbayɛ Dɔɔnwo: Ngakyelɛlilɛ ne le mekɛ kɛnlɛma mɔɔ yɛbahola yɛava yɛayɛ gyima dɔɔnwo a. Ɛbahola wɔayɛ nzenzaleɛ wɔ wɔ ngyehyɛleɛ ne anu na wɔayɛ adekpakyelɛ boavolɛ ɔ? Ɛlɛ ngakula anzɛɛ Baebolo sukoavoma mɔɔ bɛlɛnyia sunsum nu anyuhɔlɛ ɔ? Saa ye zɔhane a, nwu mgbanyima ne mɔ saa menli mɔɔ bɛle fofolɛ la bafɛta kɛ bɛboka nwo bɛyɛ gyima titile ɛhye bie kɛ nolobɔlɛma mɔɔ bɛtɛsɔnenle bɛ la a. Ɛlɔlɛ mɔɔ hanle Gyihova manle ɔvale ɛkpɔnedeɛ ne ɔmanle la anwo anyezɔlɛ baha yɛ yeamaa yɛahɔ Ngakyelɛlilɛ ne bie na eza yɛado ɛsalɛ yɛavɛlɛ menli dɔɔnwo mɔɔ yɛkɛhola la yɛamaa bɛara bie.—Dwɔn 3:16.