Asafo Nu Azonvolɛ Yɛ Gyima Mɔɔ Sonle Bolɛ

ƐZOANVOLƐ Pɔɔlo hɛlɛle Felepae asafo ne kɛ: “Pɔɔlo nee Timote, Kelaese Gyisɛse ngɛkɛlɛ, ɛlɛkɛlɛ ahɔmaa nwuanzanwuanzama mɔɔ bɛ nee Kelaese Gyisɛse ɛyɛ ko mɔɔ bɛwɔ Felepae la amuala, yɛɛ neavolɛma nee asafo nu azonvolɛ.” (Fel. 1:1) Yɛ ye nzonlɛ kɛ ɔhanle asafo nu azonvolɛ noko anwo edwɛkɛ. Ɔda ali kɛ mrenyia ɛhye mɔ yɛle gyima mɔɔ anwo hyia la boale asafo nu mgbanyima wɔ mekɛ zɔhane. Zɔhane ala a ɔde ye ɛnɛ a. Asafo nu azonvolɛ yɛ gyima mɔɔ boa neavolɛma ne na ɔmaa debie biala kɔ zo pɛpɛɛpɛ wɔ asafo ne anu la.

² Ɛze wɔ asafo ne anu azonvolɛ ne mɔ ɔ? Asoo ɛze gyima mɔɔ bɛyɛ bɛboa wɔ nee asafo ne amuala la? Gyihova anye sɔ mɔdenle mɔɔ mrenyia ɛhye mɔ bɔ la kpalɛ. Pɔɔlo hɛlɛle kɛ: “Bɛdabɛ mɔɔ bɛyɛ bɛ gyima kpalɛ la ɛlɛnyia duma kpalɛ amaa bɛ nwo yɛɛ bɛkola bɛka bɛ diedi mɔɔ wɔ Kelaese Gyisɛse anu la anwo edwɛkɛ mɔɔ bɛnzulo.”​—1 Tim. 3:13.

NGƐLƐLERA NE ANU NINYƐNE MƆƆ ƆWƆ KƐ AZONVOLƐ DWU NWO

³ Ɔwɔ kɛ asafo nu azonvolɛ bɔ ɛbɛla kpalɛ mɔɔ fɛta Kilisienema la, na bɛdi bɛ ɛzonlelilɛ nee bɛ gyimalilɛ biala anwo gyima kpalɛ. Ɛhye da ali wɔ mɔɔ bɛkpondɛ bɛavi bɛ ɛkɛ mɔɔ Pɔɔlo hanle nwolɛ edwɛkɛ wɔ kɛlata ne mɔɔ ɔhɛlɛle Timote la anu: “Zɔhane ala a ɔwɔ kɛ asafo nu azonvolɛ anye ka aze a, bɛ nloa ɛnle nwiɔ nwiɔ, bɛnva bɛ nwo bɛnwula nwanye dɔɔnwo ɛnlonlɛ nu, bɛnlua anyebolo adenle zo bɛnnyia bɛ nwo, na bɛfa adwenle mɔɔ anu te la bɛsɔ diedi ne anwo fealeranu edwɛkɛ nwuanzanwuanza ne anu. Bieko, bɛlimoa bɛzɔ menli zɛhae mɔ bɛnlea kɛ bɛfɛta; na saa edwɛkɛ ɛnle bɛ nwo a bɛamaa bɛazonle kɛ azonvolɛ. Ɔwɔ kɛ asafo nu sonvolɛ aye yɛ kokye, ɔnea ɔ mra nee ye sua nu amra kpalɛ.” (1 Tim. 3:8-10, 12) Saa asafo nu azonvolɛ di ngyinlazo ɛhye mɔ mɔɔ kpogya la azo a, ɔmmaa bɛndendɛ bɛntia asafo ne nee mrenyia mɔɔ bɛva ɛzonlelilɛ titili bɛwula bɛ sa nu la.

⁴ Saa asafo nu azonvolɛ le mgbavolɛ anzɛɛ mgbanyinli bɔbɔ a, bɛkɔ daselɛlilɛ siane biala. Bɛbɔ mɔdenle wɔ ɛzonlenlɛ gyima ne anu bɛfa bɛsukoa Gyisɛse. Bɛdua mɔdenlebɔlɛ zɛhae azo bɛda ɛhulolɛ mɔɔ Gyihova lɛ kɛ ɔdie alesama la ali.​—Aye. 9:7.

⁵ Eza bɛyɛ neazo kpalɛ wɔ bɛ adɛladeɛ ɛwulalɛ, anwoziezielɛ, ɛdendɛlɛ, nyɛleɛ nee bɛ ɛbɛlabɔlɛ nu. Bɛ adwenle nu te, yemɔti menli bu bɛ. Eza bɛfa agɔnwolɛvalɛ mɔɔ bɛ nee Gyihova lɛ nee nwolɛ adenle mɔɔ bɛlɛ ye wɔ asafo ne anu la anyebolo zo.​—Tae. 2:2, 6-8.

⁶ Bɛzɔ menli zɛhae mɔ “bɛnlea kɛ bɛfɛta.” Kolaa na bɛakpa bɛ bɔbɔ la, bɛlale bɛ nwo ali kɛ amgba bɛdu bɛ nwo bɛmaa. Bɛmaa yela ali kɛ bɛfa Belemgbunlililɛ ne bɛdimoa wɔ bɛ ɛbɛlabɔlɛ nu na bɛlɛkpondɛ ɛzonlenlɛ nu nwolɛ adenle biala mɔɔ ɔbabuke yeamaa bɛ la. Nɔhalɛ nu, bɛyɛ neazo kpalɛ bɛmaa asafo ne anu amra.​—1 Tim. 3:10.

GYIMA MƆƆ BƐYƐ LA

⁷ Asafo nu azonvolɛ yɛ gyima ngakyile boa bɛ mediema, ɔti neavolɛma ne nyia mekɛ dɔɔnwo yɛ ngilehilelɛ nee mboanekpɔlalɛ gyima ne. Kolaa na mgbanyima eku ne amaa bɛ gyima la, bɛnea ko biala mɔdenlebɔlɛ nee asafo ne ngyianlɛ.

⁸ Suzu gyima ɛhye mɔ bie anwo nea: Bɛbahola bɛamaa sonvolɛ ko anlea mbuluku zo amaa yɛanyia bie yɛazukoa na yɛanyia bie yɛahɔ daselɛlilɛ. Bɛmaa bie mɔ nea asafo ne ezukoa nwo mgbondabulɛ anzɛɛ azɛlɛsinli nwo kɛlɛtokɛ zo. Bɛmaa bie mɔ nea maekulofonu anzɛɛ milahyinli mɔɔ bɛfa bɛbɔ edwɛne la azo, bie mɔ die nyɛvolɛ yɛɛ bie mɔ boa mgbanyima ne mɔ wɔ ndenle ngakyile zo. Gyima dɔɔnwo wɔ ɛkɛ mɔɔ ɔwɔ kɛ bɛyɛ amaa bɛaziezie Belemgbunlililɛ Asalo ne na nwolɛ ade a, yemɔti bɛta bɛmaa azonvolɛ boa maa bɛnea gyima ɛhye mɔ ɛyɛlɛ zo.

⁹ Wɔ asafo bie mɔ anu, bɛkola bɛnyia sonvolɛ ko bɛmaa ɔyɛ gyima ɛhye mɔ anu ko biala. Noko wɔ ɛleka bie mɔ, sonvolɛ ko bahola ayɛ gyima dɔɔnwo. Ɔdwu mekɛ ne bie a, ɔvi azonvolɛ nwiɔ mɔɔ kɔ la kola yɛ gyima ko. Saa azonvolɛ ne mɔ anwo anzo a, mgbanyima eku ne bahola amaa mediema mrenyia mɔɔ bɛzɔne bɛ na bɛyɛ neazo kpalɛ la ayɛ gyima ɛhye mɔɔ anwo hyia la. Ɛhye bamaa bɛanyia anwubielɛ mɔɔ nzinlii saa bɛfɛta kɛ azonvolɛ a ɔbaboa bɛ la. Saa mediema mrenyia ɛnle ɛkɛ a, bɛbahola bɛamaa adiema raalɛ mɔɔ yɛ neazo kpalɛ la aboa wɔ gyima ɛhye mɔ bie ɛyɛlɛ nu, noko bɛnrɛkpa ye kɛ asafo nu sonvolɛ. Saa bɛka kɛ awie yɛ neazo kpalɛ a, ɔkile kɛ bɛkola bɛsukoa ye nyɛleɛ nee adenle mɔɔ ɔdua zo ɔsonle la. Ye debiezukoalɛ nee daselɛlilɛ ɛhɔlɛ, ye abusua ne, ninyɛne mɔɔ ɔfa ɔdielie ɔ nye, kɛzi ɔsiezie ɔ nwo nee mɔɔ bokɛboka nwo la le neazo kpalɛ maa awie mɔ.

¹⁰ Wɔ asafo mɔɔ mgbanyima anzo nu la anu, bɛkola bɛmaa asafo nu sonvolɛ mɔɔ fɛta la nee awie mɔɔ kulo kɛ bɛsɔne ye la suzu kpuya mɔɔ fale ɛzonlenlɛ nu ngilehilelɛ nwo la anwo. Ɛhye mɔ wɔ Mokanwo ne “Foa 1 ne: Kilisienema Diedi.” Na kɛmɔ “Foa 2 ne: Kilisienema Ɛbɛlabɔlɛ” fale awie fealeranu edwɛkɛ nwo la ati, ɔwɔ kɛ kpanyinli a di nwolɛ gyima a.

¹¹ Ɔdwu mekɛ ne bie a, mgbanyima eku ne banwu kɛ ɔhyia kɛ bɛdie sonvolɛ bie gyima bɛmaa sonvolɛ gyɛne. Noko, nvasoɛ kpole wɔ zo kɛ bɛbamaa mediema mrenyia ayɛ gyima ko ne ala ahɔdwu mekɛ bie amaa bɛanyia anwubielɛ na bɛayɛ ye kpalɛ.

¹² Asafo ne ngyianlɛ bamaa bɛahola bɛava gyimalilɛ bieko bɛamaa azonvolɛ mɔɔ bɛmaa ‘menli kɔsɔɔti ɛnwu bɛ anyuhɔlɛ ne wienyi’ la. (1 Tim. 4:15) Saa mgbanyima ne mɔ anwo anzo a, bɛbahola bɛamaa sonvolɛ ayɛ ekpunli zo neavolɛ ne boavolɛ anzɛɛ, wɔ tɛnlabelɛ bie mɔ anu, yeayɛ ekpunli sonvolɛ mɔɔ yɛ gyima wɔ mgbanyima ne mɔ adehilelɛ bo a. Bɛbahola bɛamaa azonvolɛ ayɛ Yɛ Ɛbɛlabɔlɛ Nee Yɛ Ɛzonlenlɛ Nyianu ne anu gyimalilɛ ne bie na saa nwolɛ hyia a, bɛanlea Asafo Baebolo Ɛzukoalɛ zo na eza bɛamaa bagua nu ɛdendɛlɛ. Saa bɛlɛ ngyianlɛ fɔɔnwo bie na azonvolɛ ne mɔ dwu ninyɛne mɔɔ ɔwɔ kɛ bɛdwu nwo kolaa na bɛahola bɛayɛ la anwo a, bɛbahola bɛamaa bɛayɛ. (1 Pita 4:10) Ɔwɔ kɛ azonvolɛ tu bɛ nwo maa boa mgbanyima ne mɔ.

¹³ Ɔnva nwo kɛ bɛ gyima ne le ngakyile fi mgbanyima ne mɔ ɛdeɛ nwo la, ɔboka ɛzonlenlɛ nwuanzanwuanza mɔɔ bɛfa bɛmaa Nyamenle la anwo, na ɔhyia amaa debie biala ahɔ zo pɛpɛɛpɛ wɔ asafo ne anu. Nzinlii, saa azonvolɛ yɛ bɛ gyima ne kpalɛ na bɛfɛta kɛ mboaneneavolɛma nee kilehilevolɛma a, bɛbahola bɛahanvo bɛ bɛamaa bɛazonle kɛ mgbanyima.

¹⁴ Saa ɛle adiema nrenyia mɔɔ ɛtɛdwule ɛvolɛ 20 anzɛɛ bɔ zo mɔɔ bɛzɔne wɔ a, asoo ɛlɛbɔ mɔdenle kɛ ɛbafɛta kɛ sonvolɛ ɔ? (1 Tim. 3:1) Bɛhyia mrenyia mɔɔ fɛta sunsum nu la amaa bɛayɛ asafo ne anu gyima ne mɔ ɔluakɛ ɛvolɛ biala menli dɔɔnwo ba nɔhalɛ ne anu. Saa ɛnyia ɛhulolɛ kɛ ɛbaboa awie mɔ a, ɛbahola wɔadwu nwo. Adenle ko mɔɔ ɛbahola wɔalua zo wɔayɛ ɛhye la a le kɛ ɛbadwenledwenle Gyisɛse neazo kɛnlɛma ne anwo. (Mat. 20:28; Dwɔn 4:6, 7; 13:4, 5) Saa ɛnwu kɛzi ɛboa awie mɔ a ɛ nye die la a, ɔbamaa wɔanyia ɛhulolɛ kpole kɛ ɛbazonle. (Gyi. 20:35) Ɛhye ati, tu ɛ nwo maa boa awie mɔ, boa maa bɛziezie Belemgbunlililɛ Asalo ne, anzɛɛ siezie ɛ nwo kɛ saa awie lɛ gyimalilɛ wɔ Yɛ Ɛbɛlabɔlɛ Nee Yɛ Ɛzonlenlɛ Nyianu ne anu na yeamba a ɛbayɛ wɔamaa ye. Saa ɛbahola wɔafɛta kɛ sonvolɛ a, eza ɔwɔ kɛ ɛyɛ ɛ ti anwo debiezukoalɛ kpalɛ na ɛnyia sunsum nu subane ngakyile. (Edw. 1:1, 2; Gal. 5:22, 23) Bieko, saa bɛmaa adiema nrenyia mɔɔ ɛlɛpele adwu nwolɛ adenle ɛhye anwo la gyimalilɛ wɔ asafo ne anu a, ɔyɛ ɔfa ɔkile kɛ ɔdi nɔhalɛ na bɛkola bɛfa bɛ nwo bɛto ɔ nwo zo.​—1 Kɔl. 4:2.

¹⁵ Sunsum nwuanzanwuanza ne a kpa asafo nu azonvolɛ ɔmaa bɛboa asafo ne a. Asafo ne anu amra amuala bahola aboa azonvolɛ ne mɔ wɔ mekɛ mɔɔ bɛlɛyɛ bɛ gyima ngakyile ne mɔ la bɛava bɛahile kɛ bɛ nye sɔ bɛ gyima ɛsesebɛ ne. Ɛhye bamaa asafo ne noko ahile kɛ ɔ nye sɔ ngyehyɛleɛ mɔɔ Gyihova ɛyɛ amaa ninyɛne ahɔ zo pɛpɛɛpɛ wɔ ye sua nu la.​—Gal. 6:10.