Gyima Boni A Asafo Nu Azonvolɛ Yɛ A?

Baebolo ne ka Kilisiene mrenyia ekpunli nwiɔ mɔɔ yɛ gyima wɔ asafo ne anu la anwo edwɛkɛ​—“neavolɛma nee asafo nu azonvolɛ.” (Felepaema 1:1) Fane dɔɔnwo ne ala, mediema ɛhye mɔ dɔɔnwo sonle wɔ asafo biala anu. Gyima boni a asafo nu azonvolɛ yɛ boa yɛ a?

Bɛboa mgbanyima eku ne. Azonvolɛ dwenle sunsum nu ninyɛne nwo, bɛfa nɔhalɛlilɛ bɛyɛ gyima, bɛfi nrɛlɛbɛ nu bɛyɛ debie, bie mɔ le ngakula yɛɛ bie mɔ le mgbanyinli. Bɛyɛ gyima mɔɔ hyia mɔdenlebɔlɛ mɔɔ ta boa ahyehyɛdeɛ ne la dahuu wɔ asafo ne anu. Ɛhye maa mgbanyima ne mɔ fa bɛ adwenle sie ngilehilelɛ nee mboane ne ɛnleanlɛ zo.

Bɛyɛ gyima mɔɔ boa la. Bɛmaa azonvolɛ bie mɔ die nyɛvolɛ mɔɔ kɛra debiezukoalɛ la. Bie mɔ nea milahyinli mɔɔ bɛtendɛ nu la azo, bie mɔ nea mbuluku zo, bie mɔ nea asafo ne ezukoa zo yɛɛ bie mɔ noko kyɛ azɛlɛsinli maa asafo ne anu amra. Eza bɛboa bɛmaa bɛyɛ Belemgbunlililɛ Asalo ne boɛ. Mgbanyima kola maa bɛboa menli mɔɔ bɛyɛ mgbanyinli la. Kɛzi gyima biala mɔɔ bɛkɛva bɛkɛmaa azonvolɛ ne mɔ de la, mɔdenle mɔɔ bɛbɔ bɛdi nwolɛ gyima la maa awie biala bu bɛ.​—1 Timote 3:13.

Bɛyɛ neazo kpalɛ kɛ Kilisiene mrenyia. Kilisiene subane kpalɛ mɔɔ azonvolɛ lɛ la ati a bɛkpa bɛ a. Saa bɛyɛ bɛ gyimalilɛ wɔ debiezukoalɛ bo a, bɛmaa yɛ diedi yɛ kpole. Saa bɛyɛ neazo kpalɛ wɔ edwɛkɛhanlɛ gyima ne anu a, bɛboa bɛmaa yɛyɛ dɔɔnwo. Kɛmɔ bɛboa la ati, bɛmaa anyelielɛ nee koyɛlɛ ba. (Ɛfɛsɛsema 4:16) Mekɛ bie anu, bɛdabɛ noko bɛbafɛta na bɛazonle kɛ mgbanyima.

• Asafo nu azonvolɛ a le nwane mɔ?

• Kɛzi azonvolɛ boa maa ninyɛne kɔ zo kɛnlɛma wɔ asafo ne anu ɛ?