Baryahurira Bata?

1. Ahabw’enki obumwe omurimo gw’okubuurira nigubaasa kutooroba, kandi ahabw’enki turikuguma nitubuurira?

¹ Nk’oku ekiro kya Yehova kiri haihi, ni kikuru munonga okuhwera abantu baingi okutunga okumanya okuhikire okurikukwata ahari Ruhanga n’ekigyendererwa kye ahabw’abantu. (Yoh. 17:3; 2 Pet. 3:9, 10) Eki obumwe tikyorobi, obu abantu baingi batarikufayo nari barikutujuma ahabw’omurimo gwaitu ogw’okubuurira. (2 Pet. 3:3, 4) Kwonka, twine enshonga ahabw’enki nitwikiriza ngu omu kicweka eki turikubuuriramu hakirimu abo abaraije kwikiriza amakuru marungi baagahurira. Abantu nk’abo baryahurira bata hataine obabuuriire?​—Rom. 10:14, 15.

2. Eky’okureeberaho ky’entumwa Paulo nikitugaruramu kita amaani?

² Okworekyera Okuhiiganisibwa: Ahabw’abo abarikwenda kuhurira amakuru g’Obukama, titushemereire kureka kubuurira. Filipi nirwo rurembo rw’okubanza oru entumwa Paulo yaabandize kubuuriramu amakuru marungi omuri Buraaya. Paulo na Siila ku baabeihereirwe, bombi bakateerwa enkoni kandi baateebwa omu kihome. (Byak. 16:16-24) Kwonka oburemeezi obwo obu Paulo yaatungire tiburamureetaire kureekyeraho kubuurira. Ku yaataayaayire omuri Tesalonika, ‘akagira obumanzi omuri Ruhanga.’ (1 Tes. 2:2) Ebi Paulo yaarabiremu buzima nibyoreka enshonga ahabw’enki ‘tutashemereire kureka’ kubuurira.​—Gal. 6:9.

3. N’enki ekirikubaasa kureetera abaabaire batarikufayo aha makuru marungi kuhindura aha miteekateekyere yaabo?

³ Baingi abatuura bangire kwikiriza amakuru marungi kumara emyaka mingi bahindwire aha miteekateekyere yaabo. Okugira oburemeezi omu by’entaatsya, okurwara, okufeerwa omuntu, nari amakuru g’ebintu bibi ebirikubaho omu nsi nibibaasa kureetaho empindahinduka nk’egyo. (1 Kor. 7:31) Abaana abamwe abu abazaire baabo baabaire nibaremesa kuhurikiza amakuru marungi, hati bakuzire kandi nibenda kugahurikiza. Okugumizamu nitubuurira nikuha abantu nk’abo omugisha ‘gw’okutakira eiziina rya Yehova’ obwire butakahweireyo.​—Rom. 10:13.

4. N’enki ekirikutuhiga okugumizamu nitubuurira ‘tutarikureka’?

⁴ ‘Tutarikureka’: Rukundo ei twiniire Ruhanga n’abataahi neija kutuhiga ‘kutareka’ omurimo gw’okubuurira n’okuhindura abantu abeegi, nk’oku entumwa zaakozire omu kyasha ky’okubanza. (Byak. 5:42) Baingi ebiro ebi ‘nibatsinda kandi nibaborooga ahabw’ebihagaro byona’ ebirikukorwa hati. (Ezk. 9:4) Abantu nk’abo ka nibahuumurizibwa baahurira amakuru marungi! Nangwa n’obu abaingi baakwanga kuhurikiza, twine obuhame bw’omu Byahandiikirwe ngu Yehova naasiima okuteeraho kwaitu.​—Heb. 13:15, 16.