Mubuurire Mutarikureka
1 Obumwe, nitubaasa kureeba ngu ekicweka eki turikubuuriramu tutwire nitukibuuriramu kandi tukiheza kwonka baingi tibarikwikiriza ebi turikubuurira. Kwonka, hariho enshonga ezishemereire kutureetera kuguma nitubuurira.—Mat. 28:19, 20.
2 Okuba eky’Okuhamya: Yesu akaranga ngu okubuurira aha Bukama kukaba nikwija kuba ekicweka kikuru eky’akamanyiso ‘k’omuheru gw’obusingye obu’ kandi ngu kukaba nikwija kukorwa “okuba eky’okuhamya aha mahanga goona.” (Mat. 24:3, 14, NW) Abantu ku barikutureeba nitwejumba omu kubuurira amakuru marungi g’Obukama, obujurizi bw’amaani nibuba bwaheebwa. Ku turikuheza kuruga omu kicweka ekyo, abantu abamwe nibabaasa kuguma nibagamba aha kubuurira kwaitu n’obu baakuba bataikiriize makuru marungi. Okumanya enshonga ahabw’enki nitubuurira nikituhwera kugumisiriza oburemeezi obu turikubugana omu kubuurira. Nitushemeza Yehova turikwejumba omu kuhikiiriza obunabi bwa Baibuli turikuha obujurizi kandi turikubamanyisa akabi akari haihi kubaho.—2 Tes. 1:6-9.
3 Okugumisiriza Nikwetengyesa: Ahabw’okugira ngu abantu baine bingi ebirikubahuzya na bingi eby’okukora, nitwetenga kugumisiriza twaba nituteeraho kubahwera kukunda ebi turikubuurira. Abajurizi bakaba nibataayaayira omukazi omurundi gumwe buri saabiiti okumara omwaka kwonka atakacwiremu kubeeta omu nju ye ngu bamwegyese Baibuli. Akakunda munonga ebi yaabaire naahurira yaahika n’aha kwikiriza kwega Baibuli, yaatandika kwija omu nteerane, kandi hatakahweire obwire yaayoreka ngu naayenda kubatizibwa.
4 Embeera z’ensi ziriyo nizeeyongyera kuhindahinduka, haza nikwo n’abantu bariyo nibahindura aha miteekateekyere yaabo. Baingi abaayangire kutuhurikiza enyimaho hati nibabaasa kwikiriza amatsiko agarikuhuumuriza agu turikubuurira. Omuntu omwe wenka ku yaakwikiriza amakuru g’Obukama, okugumisiriza kwaitu nikuba kutaaba kwa busha.
5 Omu nsi yoona, abantu baingi ‘nibatsinda kandi nibaborooga ahabw’ebihagaro byona ebirikukorwa.’ (Ezk. 9:4) Ebirikuruga omu kubuurira kwaitu nibyoreka ngu abo abarikukunda okuhikiirira bariyo nibaikiriza amakuru g’Obukama. (Isa. 2:2, 3) N’ahabw’ekyo, ka tugumizemu nitubuurira tutarikureka, na rukundo turikugumisiriza omu ‘kureeta amakuru marungi ag’ebintu birungi.’—Isa. 52:7; Byak. 5:42.