Enshonga Ahabw’enki Nituguma Nitugarukayo
1. Nitubaasa kwebuuza ki aha bikwatiraine n’okubuurira kwaitu?
1 Omu myanya mingi, nituheza omwanya ogu tuhairwe kubuuriramu kandi tugugarukamu emirundi mingi. Nituguma nitugaruka omu maka agu twabaire twabuuriiremu, n’obu ou twashangireyo yaakuba yaatugizire ngu tarikwenda ebi turikubuurira. Ahabw’enki nituguma nitugaruka ahari abo abatarayakiire makuru murungi?
2. Ni shonga ki enkuru erikutuhiga kuguma nitubuurira?
2 Rukundo ei Twiniire Yehova n’Abantu: Enshonga enkuru ahabw’enki nituguma nitubuurira n’ahabw’okuba nitukunda Yehova. Omutima gwaitu nigutuhiga kugumizamu nitubuurira abandi ebirikukwata ahari Ruhanga waitu ow’amaani. (Luka 6:45) Rukundo ei twiniire Yehova neetuhiga kworobera ebiragiro bye kandi etuma twahwera n’abandi kukora ekyo. (Enf. 27:11; 1 Yoh. 5:3) Okuguma nitukora omurimo ogu n’obwesigwa tikurikurugiirira aha ku abantu barikwakiira amakuru marungi. N’Abakristaayo ab’omu kyasha ky’okubanza ku baahiiganisiibwe, bakagumizamu nibabuurira ‘batarikureka.’ (Byak. 5:42) Abantu ku barikwanga kuhurira, omu mwanya gw’okureka ekyo kikatumaramu amaani, nituguma tuhamire, tworeka rukundo mpango n’okwehayo kwaitu ahari Yehova.
3. Rukundo ei twiniire abantu neija kutuhwera eta kuguma nitubuurira?
3 Nituguma nitubuurira ahabw’okuba nitukunda bataahi baitu. (Luka 10:27) Yehova tarikwenda ngu omuntu weena ahwerekyerere. (2 Pet. 3:9) Nangwa n’omu bicweka ebi turikukira kubuuriramu, nitukishangamu abo abarikwenda kuheereza Yehova. Nk’eky’okureeberaho, omuri Guadeloupe ei omuntu 1 aha bantu 56 ari Omujurizi wa Yehova, abantu 214 bakabatizibwa omwaka oguhweire. Haihi abantu 20,000 nibo baizire aha Kiijutsyo, ekirikworeka ngu 1 ahari buri bantu 22 abarikutuura omuri Guadeloupe akaija!
4. Emyanya ei turikubuuriramu neehinduka mu miringo ki?
4 Empindahinduka omu Mwanya: Abantu omu myanya ei turikubuuriramu nibahinduka. Omurundi ogundi ogu turaagarukye ei bataraakunzire mazima, omuntu ondiijo ow’omu ka egyo—obundi otakahuriraga obutumwa bwaitu—naabaasa kuhurikiza. Nari nitubaasa kushanga ngu hagiiremu abantu abasya abaraakunde. Abaana abaine abazaire abarikubazibira kwega Baibuli nibakura kandi batandika kutuura bonka. Abantu nk’abo nibabaasa kwikiriza kuhurikiza amakuru g’Obukama.
5. Ni bintu ki ebirikubaasa kureetera abantu kwikiriza kuhurikiza amakuru marungi?
5 Abantu nabo nibahinduka. Entumwa Paulo omu kubanza akaba ari ‘omurogotsi, omujumi, kandi omuntu enshaarizi.’ (1 Tim. 1:13) Na baingi abarikuheereza Yehova hati, omukubanza bakaba batarikukunda mazima. Abamwe nibabaasa kuba baahakaniiseho amakuru marungi. Embeera z’ensi ku zirikugyenda nizihinduka, abahakani abamwe nari abo ababaire batarikufayo nibabaasa kwikiriza kuhurikiza. Abandi nibabaasa kwikiriza kuhurikiza amakuru marungi bwanyima y’okuhikwaho oburemeezi, nk’okufeerwa omuntu w’omuka, okubingwa aha murimo, okugira entaatsya mbi, nari amagara mabi.
6. Ahabw’enki tushemereire kugumizamu nitubuurira n’omujinya?
6 Obusingye obu buri haihi kuhika aha mperu yaabwo, kwonka omurimo gwaitu ogw’okubuurira n’okwegyesa nigweyongyera n’amaani omu maisho. (Isa. 60:22) N’ahabw’ekyo, tugumizemu kubuurira n’omujinya kandi tuteereho kuguma nitureeba ebintu omu muringo oguhikire. Omuntu ondiijo ou turaabuurire, naabaasa kuhurikiza. Nitwetenga kugumizamu nitubuurira! ‘Omu kukora tutyo, nitwija kukiza amagara gaitu n’ag’abo abaraatuhurikize.’—1 Tim. 4:16.