Niki Ekirikutuhiga Kubuurira?
1. Niki ekirikutuhiga kubuurira?
1 Okubuurira amakuru marungi g’Obukama bwa Ruhanga, nigwo murimo mukuru ogu twine kukora omu bunaku obu. Buzima, omurimo ogwo nigutureetera kworobera ebiragiro bibiri ebikuru, okukunda Yehova n’okukunda bataahi baitu. (Mak. 12:29-31) Rukundo niyo erikutuhiga kubuurira n’obweziriki.—1 Yoh. 5:3.
2. Okubuurira kwaitu nikworeka kuta rukundo ei twiniire Yehova?
2 Rukundo Ei Twiniire Yehova: Rukundo ei twiniire Munywani waitu Yehova, neetuhiga kuba abajurizi be. Sitaane atwire naabeiherera Yehova kumara emyaka nka 6000. (2 Kor. 4:3, 4) Abantu baingi nibagira ngu Ruhanga naayotsya abasiisi omu muriro ogutaraara, ngu n’obushatu, kandi ngu tarikufayo aha bantu. Ekyo kireetaire baingi kugira ngu tariho. Ka twine ekihika ky’okuhwera abantu kumanya amazima! Okubuurira n’obweziriki nikishemeza Ruhanga kandi kigwisa kubi Sitaane.—Enf. 27:11; Heb. 13:15, 16.
3. Okubuurira nikworeka kuta ngu twiniire bataahi baitu rukundo?
3 Rukundo Ei Twiniire Bataahi Baitu: Buri kubuurira omuntu nikyoreka rukundo ei tumwiniire. Omu biro ebi eby’akabi kaingi abantu nibeetenga kuhurira amakuru marungi. Baingi ebiro ebi bari nka Aba Nineeve ab’omu bwire bwa Yona, abaabaire ‘batarikubaasa kutaanisa mukono gwabo gwa buryo n’ogwa bumosho.’ (Yon. 4:11) Okubuurira kwaitu nikuhwera abantu kugira okushemererwa. (Isa. 48:17-19) Kubaha amatsiko. (Rom. 15:4) Baahurikiriza kandi bakata omu nkora ebi barikwega ‘nibaija kujunwa.’—Rom. 10:13, 14.
4. Niki eki Yehova atarikubaasa kwebwa?
4 Abaana abarungi tihariho obu batarikworeka abazaire baabo rukundo. Nibateeraho kukunda abazaire baabo butoosha. Nikyo kimwe, rukundo ei twiniire Ruhanga na bataahi baitu neetuhiga kukoresa buri kagisha kubuurira. Nitwija kubuurira tutarikureka. (Byak. 5:42) Yehova tarikwija kwebwa rukundo nk’egyo.—Heb. 6:10.