Akabokisi K’ebibuuzo

◼ Ni kabi ki akari omu kukoresa Intaneeti okuganiira n’omuntu ou tutarikumanya?

Hariho emyanya mingi etairwe ahari Intaneeti okuhwera abantu kumanyana n’okuhurizana. Emyanya maingi ahari egi neeyikiriza abantu okugihandiikaho n’okugitaho ebirikubakwataho, nk’ebishushani n’ebindi. Abarikushoma nari abarikureeba ebintu ebyo nibabaasa kuhurizana n’abantu abo. Eminyeeto mingi neekunda emyanya egyo, kandi n’eminyeeto emwe omu kibiina egikooreise okuhurizana n’abantu abarikugira ngu n’Abajurizi ba Yehova.

Tikigumire omuntu nk’ogwo ou orikushanga ahari Intaneeti okukubeiha aha birikumukwataho, aha bikwatiraine n’oku ayemereire omu by’omwoyo, nari aha bigyendererwa bye. (Zab. 26:4) Omuntu orikugira ngu n’Omujurizi wa Yehova naabaasa buzima kuba atamuri, ari ou baabingire nari owaayehagwire, ogyendereire kuhabya Abakristaayo. (Gal. 2:4) Nikigambwa ngu abashaija baingi abarikuhamba abaana nibakoresa emyanya nk’egyo okubona abu baraahambe.

N’obu twakuba nitukimanya gye ngu abo abu turikuhurizana nabo beemereire gye omu kibiina, okuganiira omu muringo ogwo nikubaasa kurugamu okugamba aha bintu ebitari birungi. Eki nikibaho ahabw’okugira ngu nikyorobera abantu okugaaniira n’omuntu ou batarikureebana okukira ou barikureebana. Nibabaasa n’okureeba ngu okuganiira omu muringo ogu n’okw’omubonano kandi ngu ebi barikuganiiraho tibiraamanywe bandi, nk’abazaire baabo nari abareeberezi. Eky’obusaasi, eminyeeto mingi kuruga omu maka Amakristaayo, egwire omu mutego ogu kandi yaatandika n’okugamba ebirikwitsa enshoni. (Efe. 5:3, 4; Kol. 3:8) Abandi, omu birikubakwataho batairemu ebishushani byabo ebirikwitsa enshoni, ebikubyo bibi, nari aharikubahitsya ahari zaavidiyo z’ebyeshongoro ezirikukwata aha by’obushambani.

Ahabw’ebi ebyagambwaho, abazaire bashemereire kuteeraho kumanya ebi abaana baabo barikukorera ahari kompyuta. (Enf. 29:15) Nikiba kiri eky’akabi okweta omuntu ou tutarikumanya omu ka yaitu nari okumwikiriza kuba n’abaana baitu bari bonka. Omu muringo nigwo gumwe, n’eky’akabi itwe nari abaana baitu okunywana n’abantu abu tutarikumanya ahari Intaneeti, n’obu baakuba nibagira ngu n’Abajurizi ba Yehova.​—Enf. 22:3.