Hariho Gavumenti Ehami Erikubaasa Kutegyeka Ensi Yaitu?—Baibuli Neegamba Ki?

Gavumenti omu nsi zitabangukire. N’omu mahanga agarikureebeka nka gahami, gavumenti niziteganisibwa emishango, oburuuru, okwebaganisamu omu by’obutegyeki, n’obutabanguko.

Baibuli neegira ngu hariho gavumenti emwe ehami. Noobaasa kuba oraagihuriireho. Niyo Yesu yaagambireho omu shaara ya Tataitwe.

• “Mushabe muti: Tataitwe ow’omu iguru, eiziina ryawe ryezibwe. Obukama bwawe bwije, ebi okunda bikorwe omu nsi nk’oku bikorwa omu iguru.’”—Matayo 6:9, 10.

Baibuli neegamba ki aha Bukama obwo?

Obukama niyo Gavumenti ehami

Obukama nibutegyekyera omu iguru.

• Yesu akeeta gavumenti egyo “obukama bw’omu iguru.” (Matayo 4:17; 5:3, 10, 19, 20) Niyo nshonga ahabw’enki yaagizire ati: “Obugabe bwangye ti bw’ensi egi.”—Yohaana 18:36.

Obukama nibuza kuza omu mwanya gwa gavumenti z’abantu.

• Baibuli neegira eti: ‘Obugabe obwo . . . buryayatagura obwo bugabe [bw’abantu] bwona, bubumareho kandi bwo buryagumaho.’—Danieli 2:44.

Obukama obwo oburikutegyekwa Yesu Kristo, tiburicwekyerezibwa.

• Baibuli neegira eti: “Obutegyeki bwe n’obutegyeki bw’ebiro byona obutarihwaho, kandi n’obukama bwe n’obukama obutarimarwaho.”—Danieli 7:13, 14.

Obukama nibwija kureeta obusingye n’oburinzi omu nsi.

• Baibuli neegira eti: “Buri muntu aryatuura omu busingye omu mizaabibu ye n’omu mitiini ye, kandi tihaine oribakangisa.”—Miika 4:4, Envuunura eya Good News.

Yega ebirikukiraho aha Bukama

Obu Yesu yaabaire ari omu nsi, akakoresa obwire bwe kubuurira ‘amakuru marungi g’Obukama.’ (Matayo 9:35) Akagira ati:

• ‘[Amakuru marungi] aga ag’Obukama nigaija kubuurirwa omu nsi yoona okuha obujurizi omu mahanga goona, reero obwo nibwo emperu eraahikye.’—Matayo 24:14.

Hati, amakuru marungi nigabuurirwa omu mahanga agarikurenga 240. Nitukuhiga kwega ebirikukiraho ebirikukwata aha gavumenti egi, n’oku orikubaasa kugasirwa omu butegyeki bwayo.

Nyabura ’we reeba vidiyo Obukama bwa Ruhanga Niki?