Ebibiina by’Amahanga Ageeteeraine Nibibaasa Kureetaho Obusingye Omu Nsi?

Entaro n’obutabanguko nibigumizamu kweyongyera omu nsi. N’ekirugiremu, ekibiina ky’Amahanga Ageeteeraine n’ebibiina ebindi nibyejumba omu ntebeekanisa z’okureetaho obusingyea birikwohereza ab’okurinda obusingye omu myanya erimu entaro. Ekigyendererwa kyabo n’okureetaho obuteeka omu myanya egyo. Omuhandiiki w’ekibiina ky’Amahanga Ageeteeraine António Guterres naagira ati: “Abarinzi b’obusingye nibo twinemu amatsiko kubaasa kuhika aha kigyendererwa kyaitu ky’okwongyera kureetaho obusingye omu nsi egi.”

Kumara emyaka, obumwe entebeekanisa egyo erugiremu ebirungi. Nk’eky’okureeberaho, babaasize kurinda abantu baabutoosha, kugarura empungi omu mahanga gaabo, kuha abantu obuhwezi oburikwetengyesa, n’okuhunduuza ebirikuba bisiisikaire. Kwonka abarinzi b’obusingye nibahikwaho oburemeezi bwingi oburikubaremesa kuhikiiririza ekigyendererwa kyabo. Mbwenu shi haine ekirikubaasa kureetaho obusingye obwabuzima omu nsi egi? Baibuli ekyo neekigambaho ki?

Oburemeezi bw’abarinzi b’obusingye n’eki Baibuli erikugamba

Oburemeezi: okuremwa kukwatanisa. Butoosha tikyorobi abaserukare abarikuruga omu mahanga gatari gamwe kukwatanisa n’ebibiina ebindi ebitari by’ekinyamahe. Obumwe, ebibiina nk’ebyo kigumire kukorera hamwe ahabw’okutaikirizana n’okugira ebigyendererwa bitarikushushana.

Eki Baibuli erikugamba: ‘Ruhanga w’omu iguru naija kutaho obundi bugabe. . . nibwija kwatagura obwo bugabe bwona [gavumenti z’abantu], bubumareho kandi bwo nibwija kugumaho.’—Danieli 2:44.

Oburemeezi: tibaine eby’okukoresa ebirikumara kandi tibarikwemaririra. Enteebekanisa z’okureetaho obusingye nizikira kuba zitaine abantu barikumara, esente, hamwe n’ebindi ebirikwetengyesa, kandi ekyo nikibaremesa kuhika aha kigyendererwa kyabo. Abakozi b’ebitongore ebirikurinda obusingye nibakorera omu myanya egumire kukoreramu kandi ey’akabi.

Eki Baibuli erikugamba: “Ruhanga wa Mukama waitu Yesu Kristo. . . akamushutamya aha rubaju rwe rwa buryo omu iguru, ahaiguru y’obutegyeki bwona n’obushoboorozi bwona n’amaani goona.”—Abaefeso 1:17, 20, 21.

Yehovab Ruhanga ow’obushoboorozi bwona, ahaire Yesu buri kimwe ekirikwetengyesa kuba Omugabe w’Obukama bwe. (Danieli 7:13, 14c) Amuhaire obushoboorozi bwingi, obwengye, n’okwetegyereza ebirikukirira kimwe gavumenti nari ekibiina ekirabaireho. (Isaaya 11:2) Kandi Yesu aine eihe rihango rya baamaraika aha rubaju rwe. (Okushuuruurwa 19:14) Tihariho mbeera erikubaasa kumugumira nari kumuremesa.

Oburemeezi: ebiragiro by’amaremesa. Ab’okurinda obusingye obumwe tibarikuheebwa orusa rw’okuza buri hamwe nari kukora buri kimwe baaba bari aha mirimo yaabo. Ekyo nikibaremesa kukora gye omurimo gwabo ogw’okurinda abantu n’okuhikiiriza ekigyendererwa kyabo.

Eki Baibuli erikugamba: ‘[Yesu] ahairwe obushoboorozi bwona omu iguru n’omu nsi.’—Matayo 28:18.

Ruhanga ahaire Yesu eby’okukuratira kureetaho obusingye omu nsi yoona n’obushoboorozi bw’okukihikiriiza. (Yohaana 5:22) Yesu tarikwija kurya enguzi kandi naija kutwariza buri omwe omu buringaaniza. (Isaaya 11:3-5) Niyo nshonga ahabw’enki Baibuli neeyeta Yesu “Mukama w’Obusingye,” kandi Obukama bwe buri aha musingi ‘gw’eby’oburyo n’okuhikiirira.’—Isaaya 9:6, 7.

Obukama bwa Ruhanga nibuza kureetaho obusingye obwabuzima

Abarinzi b’obusingye obumwe nibabaasa kuteeraho kureeta obusingye buringaniire nari kumaraho emihondano omu kicweka. Kwonka tibarikubaasa kuhezaho ekirikureetaho obutabanguko niyo rwango esimbire emizi omu mitima y’abantu.

“Amazima gari ngu, abantu nibaba bashangirwe bataine busingye n’ahabw’ekyo kigumire kuburinda.”—Dennis Jett, owaabaire ari omujwekyerwa wa United States.

Kwonka, Obukama bwa Ruhanga nikyo kikoreso kikuru ky’okureetaho obusingye obwabuzima ahakuba nibuhwera abantu kweihamu rwango. Nk’eky’okureeberaho, obu Yesu yaabaire ari omu nsi, akeegyesa abakuratsi kurabira omu bi yaagambire n’ebi yaakozire aha oku baine kureetaho obusingye kandi bakooreka ngu nibakunda bagyenzi baabo:

Kandi Yesu akagira ngu abarikworobera Obukama bwa Ruhanga bakaba nibaija kumanyirwa ahari rukundo ei bainiire abandi. Baibuli neekyoreka butunu ngu abarikwanga abandi tibarataahe omu Bukama bwa Ruhanga:

Ahabw’okugira ngu Yehova Ruhanga niwe yaahangire abantu, naamanya omuringo oguhikire, omuringo gwonka ogw’okureetaho obusingye omu nsi. Obukama bwe nibwija kuhikiiriza ebi abantu baremirwe kukora otwariremu n’okureetaho obusingye.