Enyamaishwa Zituubire Ebicweka 73% Ahari Igana omu Myaka 50—Baibuli Neegamba Ki?

Okwaikumi 9, 2024, ekitongore kya World Wildlife Fund kikashohoza ripoota mbi erikworeka oku emirimo y’abantu eri ey’akabi aha nyamaishwa. Ekooreka ngu “emyaka 50 ehingwire (1970-2020), enyamaishwa zituubire ebicweka 73% ahari igana.” Ripoota egi akarabura eti: “Ti kurengyesereza kugira ngu ekiraabeho omu myaka etaano omu maisho nikyo kiraayorekye nyentsya y’ebiine amagara omu nsi.”

Kihikire kureeba ngu abantu nibatangaazibwa ripoota nk’ezi. Nitukunda ensi yaitu nungi, kandi nituba tutarikwenda kureeba enyamaishwa nizibonabona. Nitwehurira tuti ahakuba Ruhanga akaba agyendereire ngu tureeberere enyamaishwa.—Okutandika 1:27, 28; Enfumu 12:10.

N’ahabw’ekyo noobaasa kwebuuza oti: ‘Nitwija kubaasa kurinda enyamaishwa? Baibuli neegamba ki?’

Amatsiko ga nyentsya

N’obu twakuteeraho munonga tuta, nyentsya y’enyamaishwa teri mu bushoboorozi bwaitu, beitu eri omu bushoboorozi bwa Ruhanga. Baibuli omu Okushuuruurwa 11:18, neegira ngu Ruhanga naija ‘kucwekyereza’ abarikushiisha ensi. Ekyahandiikirwe eki nikitwegyesa ebintu bibiri:

1. 1. Ruhanga naija kwihiraho kimwe abarikushiisha ensi nari abarikugicwekyereza.

2. 2. Ruhanga naija kutaaha omu nshonga juba. Eki nitukimanya tuta? Hati abantu bariyo nibacwekyereza enyamaishwa kukira ira.

Ruhanga naija kukora ki kugonjoora oburemeezi obu? Naija kukoresa gavumenti ye ey’omu iguru, nari Obukama bwe kutegyeka ensi yoona. (Matayo 6:10) Gavumenti egi neija kwegyesa abantu abacureezi, kandi ebatendeke oku baine kureeberera ensi n’okurinda enyamaishwa.—Isaaya 11:9.