Nihaija Kubaho Obusingye omu Nsi Yoona

Buri omwe aine ekihika ky’okutuura omu nsi erimu obusingye. Okumara emyaka mingi, abategyeki b’ensi batwire nibateeraho kumaraho entaro n’obutabanguko reero bakareetaho obusingye. Obumwe, okuteeraho kwabo nikureetera abantu oburuhuuko kumara akaire. Kwonka eky’obusaasi, nihakira kugaruka kubaho obutabanguko. Mbwenu shi nikibaasika ensi yoona kubamu obusingye? Eego! Yetegyereza eki turikubaasa kwegyera ahari Yesu.

Eki Yesu araije kukora

Baibuli neeyoreka eki Yesu ari haihi kukora kureetaho obusingye omu nsi yoona.

• ‘[Yesu] naija kwetwa . . . Mukama w’Obusingye. Okweyongyera kw’obutegyeki bwe n’obusingye tibirigira bugarukiro.’ (Isaaya 9:6, 7) Ahabw’okugira ngu Yesu n’Omugabe w’Obukama bwa Ruhanga, naija kureetaho obusingye omu nsi yoona ebiro byona.

• ‘Naija kujuna omukyene, ku arimutakira, n’omworo otaine kihwera.’ (Zaaburi 72:12-14) Yesu naija kukoresa obushoboorozi bwe kureetaho oburingaaniza obwabuzima, amareho entaro zoona, obushaarizi n’okubonabona.

• “Eihanga tiriribangira rindi rurara, kandi tibarigaruka kwega by’engamba.” (Isaaya 2:4) Ahansi y’obutegyeki bwa Yesu, abantu boona nibaija kwega kugira obusingye omu mwanya gw’okwega kurwana.

Okumanya oku Yesu araareeteho obusingye omu biro by’omumaisho n’oku orikubaasa kubugasirwamu, reeba vidiyo ngufu Obukama bwa Ruhanga Niki?

Ebi Yesu yaayegyeise

Na hati, ebi Yesu yaayegyeise nibihwera abantu nyamwingi kugira obusingye. Omu Rubazo rwe rw’aha Rushozi, akeegyesa emisingye erikuhwera abantu kuteeraho kugira obusingye buri izooba. Yetegyereze bimwe aha bi yaayegyeise.

• “Baine omugisha abagarukanisa abantu.” (Matayo 5:9) Yesu akahiga abakuratsi be kwetantara obutabanguko kureka basherure obusingye.

• “Obanze ogarukane nawe, bwanyima ogarukye oheyo empongano yaawe egyo.” (Matayo 5:23, 24) Yesu akahiga abakuratsi be kushoboorora obutaikirizana ahonaaho. Akeegyesa ngu ni kikuru kugira obusingye n’abandi twaba nitwenda kugira omukago murungi na Ruhanga.

• “Mutaricwa orubanja, nyentsya naimwe mutarirucwerwa.” (Matayo 7:1) Yesu akarabura aha kucwera abandi orubanja omu muringo mubi, ekirikubaasa kureetaho obutabanguko. Yesu akeegyesa abakuratsi be ngu omu mwanya gw’okucwera bagyenzi baabo orubanja bakora enshobe, bashemereire kugumizamu ‘nibabasaasira’.—Luka 6:37.

Abantu omu nsi yoona nibateeraho kugyendera aha bi Yesu yaayegyeise. Nangwa n’abari omu mwanya erimu obushaarizi n’okwebaganisamu, nibateeraho kwega kushoboorora obutaikirizana bataine kiniga, kuba abarikusaasira, n’okworeka rukundo n’obu abandi bakubatwariza kubi.

Kubaasa kumanya oku ebi Yesu yaayegyeise bihweraire abantu baingi kugira obusingye, shoma ekicweka “Oku Orikubaasa Kutunga Obusingye n’obu Haraabe Hariho Entaro n’Obutabanguko.”