OBUHWEZI BW’EKA | OBUSHWERE
Eby’enshoni Nibibaasa Kushenya Obushwere Bwawe
Omukazi ku yaamanyire eki iba arikukora bwesherekye, iba akamushaba okusaasirwa, yaamuraganisa kurekyera aho. Kwonka, akamara obwire bukye yaagaruka yaakikora. Ekyo kikaguma nikibaho emirundi mingi.
Naiwe ori omu mbeera nk’egyo? Kyaba nikwo kiri, oine kumanya oku omuze gwawe gw’okureeba eby’enshoni gurikukwata aha mukundwa waawe, n’oku orikubaasa kugucwa.a
Omu kicweka eki
Eki oine kumanya
Eby’enshoni nibibaasa kushenya obushwere. Nibireetera otabireebire kugira eihari, n’okuteesiga mugyenzi we.b
Omukazi ou iba arikureeba eby’enshoni naabaasa kugira enyehurira nk’ezi:
Ou bareebize. Omukazi orikwetwa Sarah naagira ati: “Okaba nooshusha ngu ibanyi akaba ashambaine emirundi mingi.”
Oine ekirikumuburaho. Omukazi omwe akagira ngu omuze gwa iba ogw’okureeba eby’enshoni gukamureetera “kuhemuka, n’okwehurira nk’otaboneire.”
Otarikwesiga. Omukazi omwe orikwetwa Helen naagira ati: “Ninyekyengyera ibanyi omuri buri kimwe.”
Okwerarikirira. Omukazi orikwetwa Catherine naagira ngu, “okwerarikirira aha muze gw’omushaija wangye kikaandeetera kuhwa aha magufa.”
Eky’okuteekateekaho: Baibuli neegambira omushaija kukunda omukazi we. (Abaefeso 5:25) Mbwenu shi naaba naamukunda, yaaba naamureetera kugira enyehurira ezaagambwaho aha ruguru?
Eki orikubaasa kukora
Omuze gw’okureeba eby’enshoni ti gworobi kucwa. Omukazi orikwetwa Stacey naagira ati: “Ibanyi akacwa omuze gw’okureetsa sigara, enjaayi, n’okunywa amaarwa, kwonka naakiteeraho kucwa okureeba eby’enshoni.”
Waaba ori omu mbeera nk’egyo, obuhabuzi oburi ahaifo nibubaasa kukuhwera kucwa omuze ogwo.
Manya ahabw’enki eby’enshoni biri bibi. Okureeba eby’enshoni nikureetera omuntu kwigutsa ekyetengo kye omu muringo gutashemeire, ekirikushiisha emitwarize erikureeta okushemererwa omu bushwere nka rukundo, obwesigwa, n’okuhamira aha mukundwa waawe. Kandi nikyoreka ngu torikuha ekitiinisa Yehova Ruhanga owaatandikireho obushwere.
Omusingye gwa Baibuli: “Obushwere mwena mubuhe ekitiinisa.”—Abaheburaayo 13:4.
Ikiriza enshobe yaawe. Otagira oti: ‘Tinkureebire by’enshoni kuri noogira ngu omukazi wangye naamanya kworeka gye rukundo.’ Tikihikire kuta orubanja aha mukazi waawe, kandi neebaasa kuba rwekwatso y’okugarukira omuze ogwo omukazi waawe yaakugwitsa kubi.
Omusingye gwa Baibuli: ‘Omuntu weena naayohibwa, yaabeihwabeihwa okwetenga kwe, kwamwosyosya.’—Yakobo 1:14.
Ba ow’amazima kandi ogambe n’omukundwa waawe butunu. Omushaija orikwetwa Kevin naagira ati: “Buri izooba niingambira omukazi wangye ebyabaho ebirikwimutsya ebyetengo bibi, n’oku naabyetantara. Okugamba hamwe butoosha nikiihaho okusherekana.”
Omusingye gwa Baibuli: “Nitwetenga kutwaza gye [kuba ab’amazima] omuri byona.”—Abaheburaayo 13:18.
Guma nooreeba. Omuze ogwo nigubaasa kugaruka n’obu waakuba omazire obwire buraingwa ogusingwire. Kevin, owaaba yaagambirweho naagira ati: “Nkamara emyaka 10 ntarikureeba eby’enshoni, n’ahabw’ekyo nkeehamiza ngu nsingwire omuze ogwo. Kwonka gukaba gukiindimu gutegyereize obwire burungi bw’okugaruka kwimuka.”
Omusingye gwa Baibuli: “Orikuteekateeka ngu ayemereire ayerinde atagwa.”—1 Abakorinso 10:12.
Tegyereza, waayohibwa. N’obu otarikubaasa kwezibira kugira ekyetengo, noobaasa kucwamu kukiikiriza nari kukyangira. Ekyetengo ekyo nikibaasa kuhwaho ahonaaho waateeraho kuteekateeka aha bintu ebindi.
Omusingye gwa Baibuli: “Omuntu weena omuriimwe amanye kutegyeka omubiri gwe omu kwera n’omu kitiinisa, ti mu mururu gw’okurigira okubi.”—1 Abatesalonika 4:4, 5.
Yetantare embeera ezirikubaasa kukureetera kugarukirwa. Ekitabo Willpower’s Not Enough nikigira kiti: “Waayeshanga omu mbeera erikubaasa kukureetera kugarukirwa, nooba ori nk’owaateera ekibiriiti. Ekirikuba nikyetengyesa n’otujuta tukye . . . kuhemba omuriro.”
Omusingye gwa Baibuli: “Otaikiriza okutahikiirira kwona kuntegyeka.”—Zaaburi 119:133.
Otahwa amatsiko. Nikibaasa kutwara obwire, obundi emyaka omukundwa waawe kugaruka kukwesiga. Kwonka hariho eby’okureeberaho ebirikworeka ngu nikibaasika.
Omusingye gwa Baibuli: “Okukunda kugumisiriza.”—1 Abakorinso 13:4.
a N’obu ekicweka eki kirikugamba aha bashaija, emisingye eyaagambwaho neebaasa n’okuhwera abakazi abarikureeba eby’enshoni.
b Abari omu bushwere abamwe nibagira ngu okureeba eby’enshoni hamwe nikibaasa kwongyera kuhamya omukago gwabo. Kwonka okukora ekyo, tikirikuhikaana n’emisingye ya Baibuli.—Enfumu 5:15-20; 1 Abakorinso 13:4, 5; Abagalatia 5:22, 23.