Ekirikubaasa Kutureetera Okushemererwa Abantu Baatwanga

1. Ahabw’enki abantu barikubaasa kuba baatangaire ahabw’ebigambo ebi Yesu yaagambire?

OMU RUBAZO rwa Yesu orw’aha Rushozi akagira ati: “[Mushemererwe] abantu ku baraabangye.” (Luk. 6:22) Ebigambo ebyo nibibaasa kuba byatangaarize abaabaire bamuhurikiize. Amazima gari ngu, tihaine orikukunda kwangwa. Mbwenu shi Yesu akaba naamanyisa ki? Ekyo n’ekibuuzo kirungi ahakuba abantu baingi obunaku obu nibanga abakuratsi be. Nituza kureeba ahabw’enki nitwangwa n’ekirikutureetera kushemererwa twayangwa.

AHABW’ENKI NITWANGWA?

2-3. Ni nshonga ki emwe erikureetera Abakristaayo ab’amazima kuhiiganisibwa, kandi ekyo nikikwata kita aha miteekateekyere ei twine aha barikutuhakanisa? (Yohaana 16:​2, 3)

² Nitwangwa ahabw’okugira ngu nituramya Yehova. Yesu akagamba aha baabaire nibaija kuhiiganisa abakuratsi be kandi bakabaita, arikugira ati: ‘Ekyo nibaija kukikora ahabw’okuba tibaramanyire Isheboona n’obu yaakuba nyowe.’ (Shoma Yohaana 16:​2, 3.) Mbwenu shi n’oha orikujunaanwa ahabw’okuhiiganisa abaheereza ba Yehova? Ni Sitaane, ou Baibuli erikweta “ruhanga w’ensi egi.” (2 Kor. 4:​3, 4) Naahumya emitima y’abantu kugira ngu batamanya amazima agarikukwata ahari Yehova, kandi abareetera kuhakanisa abarikumanya Ruhanga. (Yoh. 8:​42-44) Mbwenu shi eki nikikwata kita aha miteekateekyere ei twine aha bantu abarikutuhakanisa? Nitwetantara kubagirira rwango ahakuba nitumanya ngu bahabisiibwe.

³ Teekateeka aha ky’okureeberaho kya Pavel,a orikutuura omu ihanga ahu omurimo gwaitu guzibiirwe. Ahabw’okugira ngu akaguma ahamiire ahari Yehova, akakwatwa, yaateerwa, kandi yaakomerwa omu kashengye k’ekihome kumara ameezi. Pavel hati naagira ati: “Nyetegyereize ngu okuhiiganisibwa nikureetwa Sitaane na baadaimoni abazigu b’okuramya okushemeire. Nikireebeka baingi aha barinzi b’ebihome nibaba batarikutuharana, kureka nibaba nibakora omurimo gwabo.” Ow’eishe-emwe ondiijo kuruga Croatia akahiiganisibwa abazaire be abatari mu mazima. Naagira ati: “Nyetegyereize ngu Sitaane niwe muzigu, batari bazaire bangye.”—Efe. 6:12.

4. Nitubaasa kwegyera ki aha ky’okureeberaho kya Yesu na Stefano? (Reeba n’ekishushani.)

⁴ Titurikwanga abarikutuhakanisa. Nangwa, nituhigwa kubashabira. (Mat. 5:44) Omu nshonga egi, nitubaasa kwegyera ahari Yesu na Stefano. Obu abaserukare Abarooma bahanika Yesu aha muti, akashaba ati: “Taata, obasaasire.” (Luk. 23:34) Yesu akaba naashaba Yehova kusaasira abaserukare abo abaahairwe obujunaanizibwa bw’okumwita. Naabaasa kuba yaabaire naamanyisa n‘abantu nyamwingi abashabire ngu aitwe ahakuba bakaba bahabisiibwe abeebembezi b’ediini abaabaire nibamwanga. Yesu akeetegyereza ngu abantu abo bakaba batarikumanya eki baabaire nibakora. Na Stefano akashaba Ruhanga kusaasira abaabaire nibamwita. (Byak. 7:​58-60) Mbwenu shi Yehova akagarukamu okushaba kwa Yesu na Stefano? Eego. Baingi aha baacwereire Yesu orubanja n’abaamwitsire bwanyima bakeeteisa, bamwikiririzamu, kandi babatizibwa. (Byak. 2:​36-41) Kandi Saulo owa Taruso omwe aha baashagikire okwitwa kwa Stefano akahinduka Omukristaayo, akeefuuza munonga ahabw’ebintu bibi ebi yaakozire omu butamanya.—1 Tim. 1:13.

5. Nooyegyera ki ahari César?

⁵ Na hati Yehova naatuhurira twashabira abarikutuhakanisa. Teekateeka aha ky’okureeberaho kya César, orikutuura omuri Venezuela. Ishe akaba naahakanisa amazima. César naagira ati: “Maawe akateeraho kuba omukazi murungi, kandi omuzaire murungi nk’oku kirikubaasika. N’obu araabe yaabaire naayebembeza eby’Obukama, akaba naafayo ahari tata. Nyowe n’abarumuna bangye akatwegyesa kuha tata ekitiinisa. Akatwegyesa kumworobera omuri buri kimwe okwihaho yaatushaba kukora ekintu ekirikutaana n’ekigyendererwa kya Ruhanga.” Bwanyima y’emyaka, ishe akahindura emiteekateekyere ye. César naayongyeraho ati: “Eizooba rimwe bwanyima y’okushaba nyihire aha mutima, nkabuuza tata yaaba nimbaasa kumwegyesa Baibuli. Nkashemererwa munonga ku yaikiriize.” Bwanyima y’obwire, ishe akabatizibwa. Tikirikumanyisa ngu buri muntu orikutuhakanisa naija kutwaza atyo, kwonka abamwe nibahindura emiteekateekyere yaabo bwanyima y’okureeba oku turikugamba nabo omu muringo gw’ekitiinisa, kandi tukabatwariza gye. Buzima ka nitushemererwa bacwamu kuheereza Yehova! Twine ekihika ky’okureeba oku Yehova omunyambabazi, kandi “Omucwi w’emanja z’ensi yoona” araayeyirize haihi abantu nk’abo.—Kut. 18:25.

6. Kurugiirira ahari Mako 13:​13, ni nshonga ki endiijo erikutureetera kwangwa?

⁶ Nitwangwa ahabw’okuha Yesu ekitiinisa. Yesu akagira ngu Abakristaayo ab’amazima bakaba nibaija kwangwa ‘ahabw’eiziina rye.’ (Shoma Mako 13:13.) “Eiziina” rya Yesu nirijwekyera ki? Nirijwekyera ebi turikumumanyaho n’obushoboorozi obu aine nk’Omugabe w’Obukama bwa Ruhanga. Abarikutwanga nibata obwesigye bwabo omu bategyeki b’ensi, omu mwanya gw’okwesiga Yesu Kristo ou Yehova ataireho kutegyeka ensi yoona. Yesu atwire naategyeka nk’Omugabe w’Obukama obwo kuruga 1914. Naija kwihiraho kimwe gavumenti zoona ezirikuhakanisa obushoboorozi bwe.

7-8. Ahabw’enki abaheereza ba Yehova abamwe nibahiiganisibwa? (Yohaana 15:​18-20) (Reeba n’ebishushani.)

⁷ Nitwangwa ahabw’okwetaanisa aha nsi ya Sitaane. Yesu akagira ngu abakuratsi be bakaba nibaija kwangwa ahabw’okugira ngu ‘ti b’ensi.’ (Shoma Yohaana 15:​18-20.) Naitwe nitwanga emiteekateekyere y’ensi egi, emitwarize n’emigambire yaayo nk’Abakristaayo ab’ekyasha ky’okubanza. Ahabw’enshonga egyo, ab’eishe-emwe na banyaanyazi-itwe baingi nibatwarizibwa kubi aha ishomero n’aha mirimo. (1 Pet. 4:​3, 4) Kwonka nikitushemeza twareeba bamwe aha barikutuhakanisa nibahindura emiteekateekyere yaabo bakatandika kutuha ekitiinisa.

⁸ Teekateeka aha byahikire ahari Ignacio ow’omuri Central America. Kumara emyaka mingi, omwe aha bashomesa b’aha ishomero akaba naamutwariza kubi ahabw’okugyendera aha mitindo ya Baibuli ey’emicwe. Kwonka obu Ignacio yaabaire atakaherize emishomo ye, omwegyesa ogwo akamubuuza oku abaasize kworobera emisingye ya Baibuli omu nsi eijwiremu abantu babi. Ignacio akamushoboororera ngu akaba naareeba ebiragiro bya Ruhanga nk’oburinzi. Bwanyima akeeta omwegyesa ogwo omu nteerane z’ekibiina. Ignacio akatangaara omushomesa ogwo ku yaizire omu nteerane! Omushomesa akakwatwaho munonga ku yaareebire rukundo ei ab’eishe-emwe barikworekana, kandi yaaguma naija omu nteerane. Ku yaatandikire kwega Baibuli, nawe akatandika kuhakanisibwa. Kwonka akagumizamu naatunguuka omu by’omwoyo kandi yaabatizibwa.

9-10. (a) Ni nshonga ki endiijo erikureetera Abakristaayo kuba ab’omutaano aha nsi ya Sitaane? (b) Nitubaasa kwegyera ki aha ntumwa Paulo?

⁹ Turi ab’omutaano aha nsi ya Sitaane ahabw’okugira ngu titurikugwera rubaju omu by’obutegyeki n’entaro. (Yoh. 18:36) Kuhikaana n’obuhabuzi oburi omu Abarooma 13:​1, nituteeraho kworobera ebiragiro by’eihanga eri turikutuuramu. Kwonka ahabw’okugira ngu titurikugwera rubaju omu by’obutegyeki, titurikwesimbaho nari kuteera oburuuru. Ahabw’enki? Ahabw’okuba nituguma turi abeesigwa ahari Yehova n’Obukama bwe oburikutegyekwa Kristo. Baingi aha Bajurizi ba Yehova bateirwe omu bihome ahabw’okwikiriza kwabo. Kwonka nabwo, ab’eishe-emwe na banyaanyazi-itwe abari omu bihome nibagumizamu kubuurira. Nibatooreza entumwa Paulo owaamazire emyaka mingi omu kihome. (Byak. 24:27; 28:​16, 30) Akagumizamu naabuurira amakuru marungi abaabaire bamuhurikiza otwariiremu abarinzi b’ekihome, abaramuzi, abakungu, abagabe obundi n’ab’omu butegyeki bwa Nero owa Rooma.—Byak. 9:15.

¹⁰ Nikyo kimwe, ab’eishe-emwe bagyenzi baitu abari omu bihome nibabuurira boona abarikubahurikiza otwariiremu abaramuzi, ab’obushoboorozi omu gavumenti n’abarinzi b’ebihome. Ow’eishe-emwe omwe owaamazire emyaka erikurenga mukaaga omu kihome ahabw’okutagwera rubaju omu by’obutegyeki akagira ngu tarikureeba obwire obu yaamazire omu kihome nk’ekifubiro, kureka nk’obujunaanizibwa obu Yehova yaamuhaire kusherura abacureezi. Nitushemererwa Yehova yaatukoresa kuhika abantu nk’abo tukabagambira amakuru marungi. (Kol. 4:3) Ka tureebe enshonga ezindi ezirikutureetera kushemererwa n’obu abantu baakutwanga ahabw’okuheereza Yehova.

ENSHONGA AHABW’ENKI TURIKUBAASA KUSHEMERERWA TWAYANGWA

11. Okuhiiganisibwa nikubaasa kuhamya kuta okwikiriza kwaitu? Ha eky’okureeberaho.

¹¹ Nitumanya ngu ensi okutwanga nikihikiiriza obunabi bwa Baibuli. Yehova akagira ngu Sitaane n’abarikumushagika bakaba nibaija kwanga abarikumukunda, n’abarikumuheereza. (Kut. 3:15) Kaingi Yesu akahamya obunabi obwo, nk’oku kirikworekwa omu bitabo bina eby’Engiri. (Mat. 10:22; Mak. 13:​9-12; Luk. 6:​22, 23; Yoh. 15:20) Ebitabo bya Baibuli ebindi nabyo bikagamba aha bunabi obwo. (2 Tim. 3:12; Yak. 1:2; 1 Pet. 4:​12-14; Yud. 3, 17-19) N’ahabw’ekyo, tikirikututangaaza twahiiganisibwa. Kureka, nitushemererwa ahabw’okureeba obunabi bwa Baibuli nibuhikiirira. Kandi nikituhamiza ngu nituheereza Ruhanga ow’amazima. Munyaanyazi-itwe orikutuura omu ihanga ahu omurimo gwaitu guzibiirwe naagira ati: “Ku naayehaireyo ahari Yehova, nkaba niimanya ngu eshaaha yoona nimbaasa kuhiiganisibwa. N’ahabw’ekyo ku naahiiganisiibwe tikirantangaarize kandi tindatiinire.” Iba akaba ari omwe ahari baingi abaabaire nibamuhiiganisa. Akaba amutwariza kubi, ayotsya Baibuli ye n’ebitabo by’ekibiina. Omu mwanya gwa munyaanyazi-itwe kutiina, akoongyera kugira okwikiriza kuhami. (Heb. 10:39) Naagira ati: “Nkaba niimanya ngu niinyija kuhiiganisibwa. Okuhikwaho okuhiiganisibwa kikampamiza ngu ndi omu diini ey’amazima.”

12. Niki ekyahweraire ow’eishe-emwe omwe kwemera okuhiiganisibwa?

¹² N’obu turaabe nitumanya ngu nitubaasa kuhiiganisibwa, nitubaasa kugumirwa kukwemera. Ow’eishe-emwe omwe owaatairweho omu kihome akahandiika ati: “Obumwe nkaba ngira amaganya, nyerarikirira kandi ndira.” Niki ekyahweraire ow’eishe-emwe ogwo kugumisiriza? Akagira ati: “Nkaba nshaba obutoosha. Buri kasheeshe nkaba mbanza naashaba. Ku haabaire habaho ekyanteganisa omu ihangwe, nkaba nshaba. Kandi ku naabaire nguubwa kubi ahabw’obutari buringaaniza, nkaba nyekingirana omu kinaabiro reero nshaba.” Ow’eishe-emwe ogwo akaba ateekateeka n’aha by’okureeberaho by’abaheereza ba Yehova aba ira n’ab’obunaku obu abagumire bari abeesigwa. Ekyo kikamuhwera kugumisiriza okuhiiganisibwa, kandi yaabaasa kugira obusingye obu Yesu yaaraganiise abakuratsi be.—Yoh. 14:27; 16:33.

13. Niki ekirikubaasa kutuhwera kusingura rwango?

¹³ Rukundo ei twine neekirira kimwe rwango. Yesu akakunda Ishe n’omutima gwe gwona kuhika n’aha kufa. Kandi akaba naakunda na banywani be. (Yoh. 13:1; 15:13) Twagirira Yehova n’Abakristaayo bagyenzi baitu rukundo nk’egyo, nitwija kusingura rwango. Tuta shi? Teekateeka aha ky’okureeberaho ky’entumwa Paulo.

14. Niki ekyahweraire Paulo kuguma ahami n’obu araabe yaabaire naaza kwitwa?

¹⁴ Harikuburayo obwire bukye Paulo akaitwa, akahandiikira munywani we Timoseo ebaruha ati: “Ruhanga taratuhaire [omwoyo] gw’obwoba, kureka [omwoyo] ogw’amaani n’okukunda.” (2 Tim. 1:7) Paulo akaba naamanyisa ki? Akaba naagira ngu rukundo mpango ei twiniire Yehova neebaasa kutuhiga kuba tweteekateekire kwemera okugyezibwa kw’amaani. (2 Tim. 1:8) Hatariho kubangaanisa rukundo ei Paulo yaabaire ainiire Yehova ekamuhwera kuba emanzi yaayemera okufa ateehakaine okuramya okw’amazima.—Byak. 20:​22-24.

15. Ab’eishe-emwe na banyaanyazi-itwe omu bunaku obu boorekire bata abandi rukundo y’okwefeerereza? (Reeba n’ekishushani.)

¹⁵ Hatariho okubangaanisa nitukunda ab’eishe-emwe na banyaanyazi-itwe abarikuguma bahami bahikwaho okuhiiganisibwa. Obunaku obu bamwe nibata amagara gaabo omu kabi kuhwera ab’eishe-emwe na banyaanyazi-itwe, nk’oku Akula na Priskila baakozire obu baata amagara gaabo omu kabi ahabwa Paulo. (Rom. 16:​3, 4) Nk’eky’okureeberaho, omuri Russia baingi nibaza omu macwero g’emanja kugumya ab’eishe-emwe abakomirwe. Munyaanyazi-itwe omwe owaabaire atairwe omu kihome ku yaareebire ab’eishe-emwe na banyaanyazi-itwe baingi aha icwero ry’emanja, akarira kandi yaaremwa kugamba kumara akaire. Rukundo y’okwefeerereza ei ab’eishe-emwe baamworekire, ekamugumya omu bwire bwenyini obu yaabaire naagyetenga. Buzima nikitushemeza kureeba twine rukundo erikukira rwango!

16. Ahabw’enki entumwa Petero yaagizire ngu nitubaasa kushemererwa n’obu twakuba nituhiiganisibwa ahabw’okuheereza Ruhanga? (1 Petero 4:14)

¹⁶ Nitumanya ngu twagumisiriza rwango nitusiimwa Ruhanga. (Shoma 1 Petero 4:14.) Entumwa Petero akagira ngu abarikugumisiriza okutwarizibwa kubi ahabw’okuheereza Ruhanga baine enshonga nungi ey’okushemererwa. Mu muringo ki? Okutwarizibwa kubi nk’okwo n’akamanyiso akarikworeka ngu twine omwoyo gwa Ruhanga. Petero akaba naamanya oku omuntu arikwehurira ahabw’okusiimwa Ruhanga n’okwemera okuhiiganisibwa. Bwanyima ya Pentekoote 33 Y.A.K., Abayudaaya bakoohereza abaserukare kukwata Petero n’entumwa bagyenzi be ahabw’okubuurira. Kwonka Petero akooreka obumanzi yaajuririra okwikiriza kwe. (Byak. 5:​24-29) Nangwa na bwanyima y’okuteerwa enkoni, we n’entumwa abandi bakagumizamu nibabuurira. Bakashemererwa ‘ahabw’okuheebwa ekitiinisa eky’okuhemurwa nibaturwa eiziina rya Yesu.’ Naitwe nitubaasa kushemererwa twaba nitugumisiriza okugyezibwa.—Byak. 5:​40-42.

17. Yesu akagambira ki abeegi be aha kiro eki yaakwatiirweho?

¹⁷ Aha kiro eki Yesu yaakwatiirweho akagambira abeegi ati: ‘Orikunkunda naija kukundwa Tata, naanye niinyija kumukunda.’ (Yoh. 14:21) Buzima ka twiniire ekihika obwire obu turaabe nitukundwa ahabw’okuheereza Yehova omu mwanya gw’okwangwa! (2 Tes. 1:​6-8) Obwire obwo butakahikire, nitubaasa kugira obuhuumure n’amaani g’okumanya ngu twine enshonga nyingi ezirikutureetera kushemererwa n’obu abantu baakuba nibatwanga.