Okwetegyereza eki Okubatizibwa Kirikumanyisa

1. Niki ekirikworeka ngu okubatizibwa ni kikuru?

BUZIMA ka nitushemererwa munonga abasya baabatizibwa! Waaba nookimanya ngu okushemererwa okwo kukabaho omu ruteerane rw’okubanza orw’ekibiina Ekikristaayo? Aha ruteerane orwo hakabaho okubatizibwa n’orubazo orwashobooroire obukuru bw’okubatizibwa. (Byak. 2:​38, 40, 41) Kandi entumwa Paulo akahandiika ngu “eby’okubandizaho ebya Kristo” nibitwarirwamu “okwegyesa eby’okubatiza.” (Heb. 6:​1, 2) N’obu okubatizibwa riri rimwe aha mazima agarikutandikirwaho, twine kukwetegyereza gye. Ahabw’enki?

2. Ahabw’enki twine kwetegyereza gye eki okubatizibwa kirikumanyisa?

² Nk’oku omusingi guhami gurikubaasa kureetera enju kuhama, okwetegyereza gye eki okubatizibwa kirikumanyisa nikibaasa kutuhwera kugira okwikiriza kuhami. Nitwetenga okwetegyereza oku yaaba turiyo nitutunguuka kuhika aha kubatizibwa nari twaba tumazire emyaka mingi tubatiziibwe. N’ahabw’ekyo omu kicweka eki nituza kugarukamu ebibuuzo ebi: Okubatizibwa nikimanyisa ki? Okubatizibwa kw’Ekikristaayo nikutwariramu ki? Kandi ahabw’enki nitubatizibwa omu iziina rya Isheboona, ery’Omwana n’ery’omwoyo ogurikwera?

EKI OKUBATIZIBWA KWAWE KURIKUMANYISA

3. Okubatizibwa nikworeka ki?

³ Waabatizibwa nooyoreka muranga ngu oikiriize amazima agarikukwata ahari Yehova Ruhanga na Yesu Kristo. Nikworeka ngu oyeteisize ebibi byawe, waahindura emitwarize yaawe kubaasa kuheereza Yehova, kandi noikiriza ngu Yesu niwe muhanda ogu Yehova ataireho kutujuna. Ekindi, oshabire Yehova orikumugambira ngu oine ekihika ky’okukora ebi akunda orikukwatanisa n’ekibiina kye. Waaheza kwehayo ahari Yehova kandi okabatizibwa, nooba waatandika orugyendo orurikuhitsya omu magara agatahwaho.

4. Okwibikwa omu maizi nikyoreka ki? (Reeba n’ekishushani.)

⁴ Waabatizibwa, nooyibikwa omu maizia reero oyihwamu. Waayibikwa nooba ori nk’owaaziikwa kandi waihwamu nooba ori nk’owaazooka. (Gyeragyeranisa Abakolosai 2:12.) Okubatizibwa nikworeka empinduka z’amaani ezi okozire omu magara gaawe. Mu muringo ki? Ku orikwibikwa omu maizi nooyoreka ngu waarekyera aho ebi obaire nookora enyima. Kandi ku orikwihwamu, nooyoreka ngu nooyenda kwebembeza ebi Yehova arikukunda.

5. Ebi orikukora kuhika aha kubatizibwa nibigyeragyeranisibwa bita n’omurimo ogu Noa yaakozire ogw’okwombeka emeeri? (1 Petero 3:​18-21)

⁵ Shoma 1 Petero 3:​18-21. Nitubaasa kugyeragyeranisa ebi orikukora kubaasa kuhika aha kubatizibwa n’omurimo ogu Noa yaakozire ogw’okwombeka emeeri. Ku oraabe nibwo oriyo nootandika kwega ahari Yehova, noobaasa kureeba ebi oine kukora kuhika aha kubatizibwa nk’ebigumire munonga nk’omurimo gw’okwombeka emeeri ya Noa. Mbwenu shi nikyetengyesa kutamu amaani kuhika aha kigyendererwa ekyo? Ekyo nikyo Noa yaakozire. Ruhanga niwe yaagambiire Noa oku yaabaire aine kwombeka emeeri, kandi akaba aine kukuratira obuhabuzi bwa Yehova kubaasa kuhonokaho. Noa akabaasa kwombeka emeeri ahabw’okwikiriza n’obushagiki bwa Ruhanga. Nka Noa, naiwe noobaasa kukora ‘byona ebi Ruhanga aragiire.’—Kut. 6:22.

6. Okubatizibwa nikubaasa kutukiza mu muringo ki?

⁶ Omu mushororongo ogwa 21, entumwa Petero akahandiika ngu okubatizibwa ‘nikutukiza.’ Ekyo tikirikumanyisa ngu ekikorwa ky’okwibikwa omu maizi kyonka nikibaasa kukureetera kujunwa nari kukwozyaho ebibi. Kureka eshagama ya Yesu yonka niyo erikutwozyaho ebibi. (1 Yoh. 1:7) Kwonka nabwo okubatizibwa ni kimwe aha bintu ebikuru ebi Ruhanga arikwenda ngu tukore, kandi n’omuringo gw’okushaba ‘Ruhanga omutima ogutarikweshinja.’ Yehova naija kushemererwa kugarukamu okushaba okwo. N’ahabw’ekyo, okubatizibwa ‘nikutukiza’ nari kutuhitsya aha kucungurwa.

EKIRIKUTWARIRWA OMU KUBATIZIBWA KW’EKIKRISTAAYO

7. Nitumanya ki aha okubatizibwa?

⁷ Oyihireho okugamba aha kwibikwa omu maizi, Baibuli terikugamba aha bushonshorekye bwona oburikukwata aha kubatizibwa. Kwonka nabwo Ebyahandiikirwe nibituhwera kumanya ebirikwetengyesa. Nk’eky’okureeberaho, nibigamba aha misingye erikubaasa kuhwera abarikwenda kubatizibwa kumanya oku baine kujwara, n’oku baakareebi baine kutwaza. (1 Kor. 14:40; 1 Tim. 2:9) Obunaku obu, okwibika nikukira kukorwa omureeberezi, kandi nitwetantara kuhimbisa omuntu oine obujunaanizibwa obwo. (1 Kor. 1:​14, 15) Ti kikuru yaaba waabatizibwa hariho abantu bakye nari baingi.—Byak. 8:36.

8. Abarikuza kubatizibwa nibabuuzibwa bibuuzo ki, kandi ahabw’enki? (Ebyakozirwe 2:​38-42) (Reeba n’ekishushani.)

⁸ Baibuli neeyoreka ngu twine kworeka okwikiriza kwaitu turikwatura n’akanwa kaitu omu bantu baingi kubaasa kuheebwa okujunwa. (Rom. 10:​9, 10.) Kwonka ekyo titurikukikora aha kubatizibwa kyonka, kureka n’omu kubuurira hamwe n’omu nteerane z’Ekikristaayo. Ahabw’enshonga egyo, abarikwenda kubatizibwa nibabuuzibwa ebibuuzo bibiri ebi. Eky’okubanza, “Oyeteisize ebibi byawe, waayehayo ahari Yehova, kandi waikiriza entebeekanisa ye ey’okujuna kurabira omuri Yesu Kristo?” Ekibuuzo ekyo nikihwera omuntu kumanya yaaba ayetebeekaniise kubatizibwa, kandi nikihikaana n’ebi Petero yaayegyeise abantu ahari Pentekoote arikubahiga kweteisa kugira ngu babaase kubatizibwa. Ekya kabiri nikigira ngu, “Nooyetegyereza ngu waabatizibwa nooba omwe aha Bajurizi ba Yehova orikukwatanisa n’ekibiina kye?” Ekibuuzo ekyo nikitwijutsya ngu kubaasa kuhamira aha kwehayo kwaitu, twine kugyendera aha buhabuzi obu Yehova arikutuha kurabira omu kibiina kye n’okumuheereza turi n’Abakristaayo bagyenzi baitu nk’oku ab’omu kyasha ky’okubanza baatwarize. (Shoma Ebyakozirwe 2:​38-42.) Abarikugarukamu ebibuuzo ebyo byombi baihire aha mutima ngu “eego” nibaba bahikire kubatizibwa.

9. Niki eki buri muntu aine kukora kubaasa kusiimwa Ruhanga?

⁹ Obu waabaire otakatandikire kwega amazima noobaasa kuba waabaire otarikukora ebibi by’amaani. Nari noobaasa kuba waayoroirwe abazaire Abakristaayo, abaakuhweraire kukunda Yehova. Mbwenu shi niwe nooba oine kweteisa kandi okabatizibwa kubaasa kusiimwa Ruhanga? Eego. Oyihireho embeera ei tukuriiremu, twena twine kwijuka ngu ekibi eki twahungwire kikatutaanisa ahari Ruhanga. (Zab. 51:5) Kwonka ku turikwongyera kumanya Yehova, nitucwamu kwebembeza ebi arikukunda kukira ebi turikwenda. Twakora ekyo, nitweteisa ebibi byaitu eby’enyima reero tutandika kutwaza omu muringo ogurikushemeza Tataitwe ow’omu iguru. Reero bwanyima nitubaasa kubatizibwa.—Byak. 3:19.

10. Oine kukora ki ku oraabe waabaire waabatiziibwe omu diini endiijo?

¹⁰ Ku oraabe waabatiziibwe omu diini endiijo nari waayehaireyo ahari Ruhanga omu kushaba, nooba oine kugaruka okabatizibwa kubaasa kuba omwe aha Bajurizi ba Yehova. Ahabw’enki? Ahakuba omu diini egyo okaba otarikwetegyereza amazima agarikukwata ahari Yehova Ruhanga na Yesu omu bwijwire. Kandi okakikora otakeetegyereize gye ebi Ruhanga arikukunda. Entumwa Paulo ku yaabugaine abashaija ba Efeso abaabaire babatiziibwe batakeetegyereize enyegyesa z’Ekikristaayo, akatebeekanisa ngu bagarukye babatizibwe.b (Byak. 19:​1-5) Nikyo kimwe n’obunaku obu, omuntu aine kubanza yaatunga okumanya okuhikire aha bikwatiraine n’ebi Ruhanga arikwenda ngu akore.

‘OMU IZIINA RYA ISHEBOONA N’ERY’OMWANA N’ERY’OMWOYO OGURIKWERA’

11. Nikimanyisa ki okubatizibwa ‘omu iziina rya Isheboona n’ery’Omwana n’ery’omwoyo ogurikwera’? (Matayo 28:​18-20)

¹¹ Yesu akaragiira ngu abakuratsi be abasya baine kubatizibwa ‘omu iziina rya Isheboona n’ery’Omwana n’ery’omwoyo ogurikwera.’ (Shoma Matayo 28:​18-20.) Akaba naamanyisa ki? Omu Baibuli ekigambo “eiziina” nikikira kumanyisa ebirikukwata aha muntu. Kandi nikibaasa kumanyisa omwanya nari obushoboorozi obu omuntu orikugambwaho aine. N’ahabw’ekyo twabatizibwa omu iziina rya Yehova na Yesu nikimanyisa ngu nitumanya ngu baine obushoboorozi n’amaani g’okutugambira eki twine kukora. Kandi ku turikubatizibwa omu iziina ry’omwoyo gurikwera nikimanyisa ngu nitugwikiriza kutwebembera. Hati ka tureebe oku turikubaasa kukikora.

12. Nitubatizibwa tuta omu iziina rya Isheboona? (Okushuuruurwa 4:11) (Reeba n’ekishushani.)

¹² Omu iziina rya Isheboona. Okubatizibwa omu iziina rya Isheboona nikyoreka ngu nitumanya ngu Yehova ni Tataitwe ow’omu iguru, kandi Obukomooko w’amagara. Ni Ruhanga w’Obushoboorozi bwona kandi Omuhangi w’ebintu byona. (Shoma Okushuuruurwa 4:11.) Nitumanya ngu niwe arikuhurira okushaba kandi nitukoresa eiziina rye omu muringo gw’ekitiinisa twaba nitushaba nari turikugambira abandi ebirikumukwataho. (Zab. 65:2) Kwonka, hariho bingi ebirikutwarirwa omu kubatizibwa omu iziina rya Isheboona. Abaabaire bahurikiize Petero aha Pentekoote bakaba nibamanya Yehova, kwonka hati bakaba baine kumureeba nk’Omuhi w’amagara agatahwaho kurabira omuri Yesu Kristo.—Rom. 5:8.

13. Nitubatizibwa tuta omu iziina ry’Omwana? (Reeba n’ekishushani.)

¹³ Omu iziina ry’Omwana. Okubatizibwa omu iziina ry’Omwana nikyoreka ngu nitwikiriza ngu Yesu n’Omwana wa Ruhanga omwe nyamunegyere. Yesu niwe “muhanda” ekirikumanyisa ngu niwe turikurabiramu kugira omukago murungi na Yehova. (Yoh. 14:6) Yesu niwe mucunguzi waitu owaatufeereire kugira ngu tutungye amagara agatahwaho. Okumanya ekyo nikituhwera kukuratira eky’okureeberaho kye buri izooba na bwanyima y’okubatizibwa. (1 Yoh. 2:6) N’ahabw’ekyo, nitubuurira n’omujinya nk’oku Yesu yaakozire tutarikwikiriza ekintu kyona kuturemesa. (Luk. 4:43) Kandi tweteekateekire kwemera okuhiiganisibwa kugira ngu tubaase kuguma turi abeesigwa ahari Ruhanga. (2 Tim. 3:12) N’ahabw’ekyo nituha Yesu ekitiinisa ‘nk’omutwe gw’ekibiina’ kandi tworobera abu atooraine kutwebembera n’okutureeberera.—Efe. 4:​8, 11, 12; 5:23.

14. (a) Nitubatizibwa tuta omu iziina ry’omwoyo ogurikwera? (Reeba n’ekishushani.) (b) Ni kubatizibwa kwa muringo okundi oku entoore barikurabamu? (Reeba akabokusi “Okubatizibwa oku Entoore Barikurabamu.”)

¹⁴ Omu iziina ry’omwoyo ogurikwera. Okubatizibwa omu iziina ry’omwoyo ogurikwera nikyoreka ngu nitwikiriza amazima agarikugukwataho. Omwoyo ogurikwera ti muntu nari ekicweka ky’obushatu, kureka n’amaani ga Ruhanga. Nitwikiriza ngu omwoyo ogurikwera gukahwera baanabi n’abaahandiikire Baibuli. N’ahabw’ekyo nitugishoma buri izooba kandi tugyendera aha bi erikwegyesa. (2 Pet. 1:​20, 21) Nitwetantara kukora ekibi ky’amaani ahakuba nikibaasa kuremesa omwoyo ogurikwera kutwijaho n’okwija omu kibiina.—Efe. 4:30.

15. Twine kumariirira kukora ki?

¹⁵ Ku oraabe ori Omukristaayo obatiziibwe, teeraho kwetegyereza gye ‘enyegyesa z’okubatizibwa’c kandi ogyendere aha kuraganisa oku waakozire obu waayehayo ahari Yehova kandi okabatizibwa. Kwonka shi ku waakuba otakabaire Omukristaayo obatiziibwe? Haine ekirikukuremesa? Ekicweka ekirikukurataho, nikiza kworeka oku orikubaasa kuguma nootunguuka okahika aha kubatizibwa.