Gumizamu Nootunguuka Kuhika aha Kubatizibwa

1. (a) Nitugasirwa tuta twabatizibwa? (b) Nituza kureeba ki omu kicweka eki?

WAAHERIZE kwehayo ahari Yehova kandi okabatizibwa omu maizi? Ku kiraabe nikwo kiri, oshabire Ruhanga kukuha omutima ogutarikweshinja. (1 Pet. 3:21) Kandi, otaireho eky’okureeberaho kirungi aha bato n’abasya abarikukwatanisa n’ekibiina kyanyu. Buzima, waabatizibwa nooba ocwiremu gye. Kandi shi ku oraabe otakabatiziibwe? Hatariho kubangaanisa nookunda Yehova kandi nooyenda kukora ebi arikukunda. Noomanya ngu ni kikuru kubatizibwa kubaasa kusaasirwa ebibi n’okusiimwa Yehova. (Byak. 2:​38-40) Kwonka noobaasa kuba nooyeziringa kukikora. Niki ekirikubaasa kukuhwera? Omu kicweka eki, nituza kureeba (1) ekirikureetera bamwe kweziringa kubatizibwa, (2) ahabw’enki kiri eky’obwengye kuguma noijuka ngu emperu eri haihi, (3) n’oku oraagasirwe waagumizamu nootunguuka kuhika kubatizibwa otarikweziringa.

EKIRIKUREETERA BAMWE KWEZIRINGA

2. Ahabw’enki abamwe nibeeziringa kubatizibwa?

² Abamwe nibeeziringa kubatizibwa ahabw’okutiina. Nk’eky’okureeberaho, n’obu baraabe nibenda kuheereza Yehova, nibatiina ngu tibarikubaasa kumushemeza. Ku oraabe nikwo orikwehurira, garuka oshome emishororongo erikubaasa kukuhamiza ngu Yehova naamanya ku otahikiriire kandi naashemererwa waamuramya orikumuha ekirikukirayo oburungi nk’oku orikubaasa. (Zab. 103:​13, 14; Kol. 3:23) Ku oraabe nootiina kuhakanisibwa, shaba Yehova kukuha obumanzi nk’obu omuhandiiki wa zaaburi yaabaire aine obu yaahandiika ati: “[Yehova] ari aha rubaju rwangye, tinditiina, omuntu naabaasa kungira ata?”—Zab. 118:6.

3. Ni miteekateekyere ki erikubaasa kuremesa bamwe kubatizibwa? (Reeba n’ekishushani.)

³ Abamwe abarikukunda Yehova nibeeziringa kubatizibwa ahabw’okuteekateeka ngu tibarikumanya bingi ebi Baibuli erikwegyesa. Mbwenu shi oine kumanya ebirikwingana ki? Teekateeka aha ky’okureeberaho ky’omu Baibuli. Paulo na Siila bakabuurira omurinzi w’ekihome n’eka ye, bwanyima y’omutsitsa kutengyetsa ekihome eki baabaire baakomiirwemu. Omushaija ogwo n’eka ye bakeetegyereza ngu Ruhanga niwe yaakora eky’okutangaaza kucungura abaheereza be kandi bakeega bingi ekiro ekyo. N’ekyarugiremu, ‘ahonaaho bakabatizibwa.’ (Byak. 16:​25-33) N’ahabw’ekyo ku oraabe noomanya Yehova, orikumukunda n’omutima gwawe gwona, orikumanya enyegyesa za Baibuli ezirikutandikirwaho, oyeteisize ebibi byawe, kandi omaririire kugyendera aha mitindo ye, nooba ohikire kubatizibwa.—Mak. 12:30.

4. Abamwe nibata omutima ahari ki ekirikubaremesa kutunguuka kuhika aha kubatizibwa? (Reeba n’ekishushani.)

⁴ Bamwe aha abarikwenda kushemeza Ruhanga nibateekateeka ngu kigumire munonga kukikora. Amazima gari ngu n’eky’obwengye kuteekateeka aha biraarugye omu bi turikucwamu. (Luk. 14:​27-30) Kandi abandi nibeerarikirira aha bi baraije kutsigaho kubaasa kuheereza Ruhanga. Candace, owaakuriire omu mazima, nikwo yaayehuriire ku yaakuzire reero akashabwa kwegyesibwa Baibuli. Naagira ati: “Nkaba niimanya eki nyine kukora kuheereza Yehova, kwonka kikaba kingumiire ahabw’okuba nkaba ninkunda ebi naabaire ninkora omu nsi. Nkaba niimanya ngu nikiija kungumira kutsigaho ebintu ebyo.” Abandi nibatiina ngu tibarabaase kuhamira aha mitindo ya Ruhanga ey’emicwe baaheza kubatizibwa. Nibeerarikirira ngu bwanyima y’okubatizibwa, nibaija kukora ekibi ky’amaani baihwe omu kibiina. Mbwenu shi noobaasa kukora ki ku oraabe oine enyehurira nk’ezo?

5. Twine kuta omutima ahari ki twaba nituteekateeka yaaba twine kubatizibwa? (Matayo 13:​44-46)

⁵ Twaba twine eki turikwenda kugura, titurikuta omutima aha sente ezi kirikugura kyonka, kureka nituteeraho kureeba yaaba kiri eky’omuhendo ahariitwe. Twareeba kiri eky’omuhendo kukira sente ezi barikukiguza, nitukigura ahonaaho. Nikyo kimwe twaba nituteekateeka yaaba twine kubatizibwa, titwine kuta omutima aha bi turaayefeerereze n’empindahinduka ezi turaakore kyonka, kureka nituguta aha ky’omuhendo eki turaatungye, nigwo mukago murungi na Yehova. Yesu akeegyesa aha nshonga egyo arikukoresa eby’okureeberaho bibiri. (Shoma Matayo 13:​44-46.) Omu by’okureeberaho byombi, omushaija akaguza ebintu bye byona kugura ekintu ky’omuhendo eki yaabaire aboine. Naiwe oboine ekintu ky’omuhendo munonga, nigo mazima agarikukwata aha Bukama. N’ahabw’ekyo ku oraabe nooyeziringa kukora empinduka ezirikwetengyesa kubatizibwa, teekateeka aha by’okureeberaho ebi Yesu yaakoreise. Noobaasa kwebuuza oti: ‘Mbwenu shi nimpamiza kimwe ngu amazima agu mboine n’ag’omuhendo munonga? Omukago ogu nyine na Yehova, ab’eishe-emwe abarikunkunda hamwe n’amatsiko agu Yehova ampaire, nimbitwara nk’eby’omuhendo?’ Ebi oraagarukyemu aha bibuuzo ebyo nibiija kukuhwera kwongyera kutwara amazima nk’ag’omuhendo n’okumanya ekiriyo nikikuremesa kugyendera aha bi oyegire kubaasa kubatizibwa.

6. Niki ekirikubaasa kutuhwera kugira omutima ogushemeire?

⁶ Omu ky’okureeberaho eky’omubibi, Yesu akashoboorora embeera z’omutima ezirikubaasa kuremesa omuntu kutunguuka omu by’omwoyo. Kwonka akagira ngu abantu abamwe nibaija kuhurikiza, “n’emitima eshemeire kandi emirungi” reero baikirize amakuru g’Obukama. (Luk. 8:​5-15) Waaba oyerarikiriire ngu toraabaase kugyendera aha bi orikwega, otahanika. Ruhanga naabaasa kukuhwera ‘kutunga omutima musya,’ oguraagyendere aha bi arikukwegyesa. N’ahabw’ekyo mushabe kworobya omutima gwawe kugira ngu obaase kugyendera aha orikwega.—Ezk. 18:31; 36:26.

7-8. Ahabw’enki abato abamwe nibaremwa kutunguuka kuhika aha kubatizibwa? (Reeba n’ekishushani.)

⁷ Abato abamwe abarikukunda Yehova nibaremwa kutunguuka kuhika aha kubatizibwa ahabw’abandi kushiisha emiteekateekyere yaabo. Nk’eky’okureeberaho, abashomesa aha ishomero nibabaasa kubahiga kureeba entwaza ezimwe nk’erikwikirizibwa n’obu zaakuba zitarikuhikaana n’emitindo ya Ruhanga. Kwonka obuhabuzi nk’obwo nibubaasa kurugamu akabi k’amaani. (Zab. 1:​1, 2; Enf. 7:​1-5) Noobaasa kwetantara akabi ako orikutooreza eky’okureeberaho ky’omuhandiiki wa zaaburi owaagambiire Yehova ati: “Nyine okwetegyereza okurikweshumba okw’abarikuunyegyesa boona, ahakuba ebi waahamize nibyo ntuura ninteekateekaho.”—Zab. 119:99.

⁸ Ripoota nizooreka ngu abazaire abamwe abari omu mazima nibaremesa abaana baabo kuhika aha kubatizibwa. Nibata munonga omutima aha bwegyese, nari omurimo ogu abaana baabo baraatungye nari baremwa kubahwera omu kutaho ebigyendererwa by’omwoyo. Mbwenu shi noobaasa kukora ki waateekateeka ngu abazaire baawe nibabaasa kugira eki baakora kukuhwera kutunguuka kuhika aha kubatizibwa? Noobaasa kukigaaniiraho nabo. N’obu waakuba oine myaka ki noobaasa kuhamya omukago gwawe na Yehova.—Enf. 20:11.

9. Ahabw’enki abamwe nibakyerererwa kubatizibwa?

⁹ Abamwe abahikire kubatizibwa nibakyerererwa ahabw’okwenda ngu banywani baabo nari abakundwa baabo bahikye aha kigyendererwa nikyo kimwe, reero babatizibwe aha izooba rimwe. N’ekyabuzima, noobaasa kubatizibwa n’abu orikukunda aha izooba rimwe, kwonka egyo teshemereire kuba enshonga y’okukuremesa kubatizibwa hati. Ijuka ngu, okwehayo kwawe nikuba kuri ahagati yaawe na Yehova. Toine kutegyereza abandi kubaasa kucwamu kubatizibwa.—Rom. 14:12.

AHABW’ENKI TWINE KUGUMA NITWIJUKA NGU EMPERU ERI HAIHI

10. Ahabw’enki abamwe nibeeziringa kutunguuka kuhika aha kubatizibwa?

¹⁰ Okwongyera aha nshonga ezaaba zaagambirweho, abamwe nibabaasa kweziringa kubatizibwa barikuteekateeka ngu hakiriyo obwire emperu kuhika. Mbwenu shi n’eky’obwengye kuteekateeka batyo? Yesu akarabura abakuratsi be ati: “Mugume mweteekateekire, ahabw’okuba omu shaaha ei muteeteekateekyeiremu Omwana w’omuntu niyo ariiziramu.”—Luk. 12:40.

11. Kurugiirira ahari Zaaburi 119:​60, twine kutwaza tuta twamanya ebi Yehova arikuturagiira?

¹¹ Rukundo niyo eine kutuhiga kwehayo ahari Yehova. Twayongyera kumanya Ruhanga owa rukundo, nitwongyera kukunda ebiragiro bye kandi tukora empinduka ahonaaho kubaasa kubigyenderaho. (Shoma Zaaburi 119:60.) Entumwa Yakobo akooreka enshonga endiijo ahabw’enki twine kworobera ebiragiro bya Yehova ahonaaho: Tihaine n’omwe ahariitwe orikumanya ekiraabeho nyencakare. Nitubaasa kutatunga eizooba erindi ry’okukora ekihikire, n’ahabw’ekyo twine kugyendera aha bi turikumanya hati.—Yak. 4:​13-17.

12. Nitwegyera ki aha ky’okureeberaho eki Yesu yaakoreise eky’omusiri gw’emizaabibu?

¹² Kandi shi eky’okureeberaho eki Yesu yaakoreise eky’omusiri gw’emizaabibu? Akeegyesa ngu abakozi abamwe bakaba nibaija kukora eshaaha emwe kwonka baheebwe omushaara ogurikwingana n’ogw’abaakozire eizooba ryona. Kwonka, yetegyereze ahabw’enki abaakozire eshaaha emwe bataratandikire n’abaakozire eizooba ryona. Bakagira bati: “Ahabw’okuba tihaine owaatuha omurimo.” Abakozi abo bakaba nibabaasa kukora eizooba ryona, ku ogire ngu bakabona ow’okubaha omurimo bukiri kare. N’ahabw’ekyo ku baahairwe omurimo, bakaza kukora ahonaaho. (Mat. 20:​1-16) Obunaku obu, Yesu atwetsire kuba abeegi be n’okukora omurimo gw’okubuurira aha Bukama. N’ahabw’ekyo twahurira okweta kwe, twine kwikiriza ahonaaho.

13. Nitubaasa kwegyera ki ahari muka Looti?

¹³ Abarikweziringa kutunguuka kuhika aha kubatizibwa baine kwijuka ngu nikibaasa kwija kubagumira kukora empinduka aha shaaha y’aha muheru kubaasa kushemeza Yehova. Yesu akaba naamanya enshonga egyo n’ahabw’ekyo akarabura abeegi be ati: “Mwijukye muka Looti.” (Luk. 17:​31-35) Muka Looti akaba naamanya ngu Ruhanga naaza kucwekyereza Sodoma na Gomora, kwonka nikireebeka ngu akaba ateeteekateekire kwehuzya ebintu ebi yaabaire atsigire enyima. (Kut. 19:​23-26) Ekyamuhikireho nikitwijutsya ngu orwigi rw’okujunwa tiruraagume rwigwire ebiro byona. Omu bwire bwa Ruhanga obuhikire, nirwija kukingwa ebiro byona.—Luk. 13:​24, 25.

14. Okureeba obunabi bwa Baibuli oburikukwata aha mperu nibuhikiirira, kiine kukuhiga kukora ki?

¹⁴ Ebirikubaho omu nsi buri izooba, nibihikiiriza obunabi oburikukwata aha mperu y’ensi egi. N’obu byakuba bitarikukukwataho butunu, okureeba nibihikiirira kiine kukuhiga kuguma nootunguuka kuhika aha kubatizibwa. Teekateeka aha kyabaireho omu kyasha ky’okubanza. Entumwa Petero akahiga Abakristaayo ‘kuhuguuka,’ nari kuguma nibareeba ahakuba “emperu ya byona [ekaba] eri haihi.” (1 Pet. 4:7.) “Emperu” egyo ekaba eri ey’obusingye bw’Ekiyudaaya. Abu Petero yaabaire naahandiikira bakaba nibatuura hare n’orurembo Yerusaalemu, n’ahabw’ekyo okucwekyerera kw’orurembo orwo kukaba kutarikwija kubakwataho butunu. (1 Pet. 1:1) Kwonka, okureeba okuhikiirira kw’obunabi obwo, kikaba nikiija kubahwera kwongyera kugira obwesigye omu biraganiso bya Ruhanga ebindi. Nikyo kimwe, waareeba obunabi oburikukwata aha emperu nibuhikiirira, nikiija kukuhiga kutunguuka kuhika aha kubatizibwa.

15. Nitubaasa kwetebeekanisiza tuta ekiro kya Yehova? (2 Petero 3:​10-13)

¹⁵ Omu baruha ya kabiri ei Petero yaahandiikire, akashoboorora oku twine kureeba obwire obu ekiro kya Yehova eky’okucwa orubanja kiraiziremu. Aha Bakristaayo ab’omu kyasha ky’okubanza, ekiro ekyo kikaba kitakabaire kuhika, kwonka Petero akabagira ngu baine ‘kukitegyereza’ kandi bagume bakiniire ekihika. (Shoma 2 Petero 3:​10-13.) Nitubaasa kutegyereza ekiro ekyo, turikuguma tweteekateekire, kandi twiniire eizooba eryo ekihika. Ekyo nitukikora ‘turikuba abarikwera kandi abarikutiina Ruhanga omu mitwarize yaitu.’ Yehova ka aine kuba naashemererwa yaareeba nookora ebirikumushemeza kandi okehayo ahariiwe okabatizibwa!

OKU ORIKUGASIRWA WAACWAMU KUBATIZIBWA

16. Ni bwire ki burungi bw’okutunguuka kuhika aha kubatizibwa? (2 Abakorinso 6:​1, 2) (Reeba n’ebishushani.)

¹⁶ Hati nibwo bwire bw’okutunguuka okahika aha kubatizibwa. (Shoma 2 Abakorinso 6:​1, 2.) Omwesiopia omukonwa ou Filipo yaabuuriire akeetegyereza ngu akaba aine kugira eki yaakora ahonaaho. Ku yaaherize kwetegyereza amakuru marungi kandi akatunga n’omugisha gw’okubatizibwa, tarabandize kuteekateeka ati: ‘Nyine kubanza naayega amazima agandi mingi, kandi hakiriyo amaizi agandi omumaisho.’ Kureka akabuuza Filipo ngu: “Niki ekirikunzibira kubatizibwa?” (Byak. 8:​26, 27, 35-39) Buzima ekyo ka n’eky’okureeberaho kirungi! Omukonwa ogwo ku yaaherize kubatizibwa, ‘akagumizamu naagyenda ashemereirwe.’

17. Nitubaasa kugira bwesigye ki?

¹⁷ Waaba nooyeziringa kubatizibwa, gira obwesigye ngu Yehova ayeteekateekire kukuhwera kugira omukago murungi nawe. (Rom. 2:4) Naabaasa kukuhwera kusingura ebirikukwerarikiriza nari ekintu kyona ekirikukuremesa kutunguuka. Waaheza kugira omutima ogutarikweshinja kurabira omu kubatizibwa, noija kwetegyereza ngu “eby’enyima” tibikikwiniire mugasho. (Fil. 3:​8, 13) Noobaasa kworekyerera “eby’omumaisho” nikwo kuhikiirira kw’ebi Yehova arikuraganisa abarikwehayo ahariiwe kandi bakabatizibwa.—Byak. 3:19.