APURI 6-12, 2026
EKYESHONGORO 82 ‘Jwisa Omushana Gwawe’
Oku Turikubaasa Kuhwera Abanyabuzaare Baitu Abatari mu Mazima
“Turekye kuruha omu kukora gye.”—GAL. 6:9.
ENSHONGA ENKURU
Oku orikubaasa kuguma oine omukago murungi n’abanyabuzaare abatari mu mazima, kandi okabahwera omu by’omwoyo nk’oku orikubaasa.
1-2. Okwega amazima nikibaasa kuba kyakwatsire kita aha mukago gwawe n’abanyabuzaare?
YESU akagambira omushaija owaabaire naayenda kumukuratira ati: “Irooko otaahe owaanyu omuri bagyenzi baawe, obagambire ebi [Yehova] akukoreire ku biri bikuru.” (Mak. 5:19) Ekyo nikyoreka ngu Yesu akaba naamanya ngu n’eky’obuhangwa omuntu kwenda kugambira abanyabuzaare be amakuru marungi.
2 Noijuka oku waayehuriire obu waamanya amazima kuruga omu Baibuli? Hatariho okubangaanisa okagira ekihika ky’okugagambira abandi. Kwonka abanyabuzaare baawe nibabaasa kuba batarakuhurikiize. Nari omuringo ogu waabagambiiremu amazima nigubaasa kuba gwareetsireho obutaikirizana ahagati yaanyu. Kyaba nikwo kiri, noobaasa kukora ki kugaruka kugira omukago murungi nabo, kandi okagurinda otahenzire emisingye ya Baibuli?
3. Nituza kugamba ahari ki omu kicweka eki?
3 Omu kicweka eki nituza kureeba: (1) Oku esaasi zirikubaasa kutuhiga kufa aha banyabuzaare baitu abatari mu mazima n’obu bakuba batarikwenda kwega ebirikukwata ahari Yehova; (2) eki turikubaasa kukora baatutwariza kubi nari baatugambaho ebitahikire; (3) oku okubagumisiririza n’okuguma tubainemu amatsiko kirikubaasa kubahwera kwega amazima; (4) n’oku turikubaasa kworeka ngu nitubakunda.
ESAASI KA ZIKUHIGE KUBAHWERA
4. Yesu akatwariza ata abaabaire batarikwenda kuhurikiza obutumwa bwe?
4 Yesu akaguma naahwera abantu abaabaire batarikwenda kuhurikiza obutumwa bwe. Akeegyeragyeranisa n’omuhingi w’emizaabibu owaagumizemu naareeberera omuti ogutarikwana aine amatsiko ngu nyentsya nigwija kutaho ebijuma. (Luk. 13:6-9) Obu yaaha eky’okureeberaho ekyo, akaba atwire naahwera Abayudaaya bagyenzi be kumara emyaka erikurenga eshatu kugira ngu bamwikiririzemu. Ahabw’enki yaagumire naateeraho kubahwera? Yesu akaba ainiire abantu abo esaasi kandi ekyo kikamureetera kubagumisiririza.
5. Niki ekyareeteire Yesu kugirira Abayudaaya bagyenzi be esaasi?
5 Yesu akagirira Abayudaaya bagyenzi be esaasi ahakuba abeebembezi b’ediini bakaba baremirwe kubahwera kugira okwikiriza okuhikire omuri Ruhanga. Akareeba abantu abo “nk’entaama ezitaine muriisa.” (Mak. 6:34) Kandi ebiro bikye Yesu atakafiire, akacurira Yerusaalemu ahakuba akaba naamanya ngu abatuuzi baamwo abarikukira obwingi bakaba nibaija kufeerwa amagara gaabo ahabw’okutagira okwikiriza. (Luk. 19:41-44) Naitwe twagirira abanyabuzaare baitu esaasi, nitwija kubahwera.
6. Ahabw’enki twine kugumisiririza abanyabuzaare baitu abatari mu mazima? (Abagalatia 6:9)
6 Shoma Abagalatia 6:9. N’obu abanyabuzaare baitu baakuba batarikwenda kwega amazima, twine kubagumisiririza kandi tutakahanika ‘omu kubakorera gye.’ Nitumanya ngu nikitwara obwire omuntu kubaasa kureka ebi atwire nareeba nk’ebihikire, reero akabaasa kugira okwikiriza okuhikire. Obundi naiwe enyima noobaasa kuba waabaire ori nk’abantu ‘abataine matsiko, kandi abari omu nsi bataine Ruhanga.’ (Efe. 2:12) Kyaba nikwo kiri, buzima haine owaakuhweraire. Mbwenu shi ekyo tikirikukuhiga kwenda kuhwera abanyabuzaare baawe kwigutsya ekyetengo kyabo ky’eby’omwoyo kyaba nikibaasika?
YEHUZYE EBIGAMBO N’EBIKORWA BYABO EBIBI
7. Niki ekirikubaasa kuba kyaremeise barumuna ba Yesu kumwikiririzamu?
7 Barumuna ba Yesu nibabaasa kuba baahuriire aha by’okutangaaza ebi Yesu yaakozire omuri Galilaaya. (Luk. 4:14, 22-24) Kwonka omu kubanza tibaramwikiririzemu. (Yoh. 7:5) Ahabw’enki? Ekyo Baibuli terikukyoreka. Kwonka neeyoreka enshonga ebiri ezaaremeise Abayudaaya abamwe kuba abeegi ba Yesu. Abamwe bakaba batiinire ngu bagyenzi baabo nibaza kubanga. (Yoh. 9:18-22) Kandi abandi bakaba nibamanya Yesu kuruga omu buto, n’ahabw’ekyo bakaba batarikukiikiriza ngu naabaasa kuba omujwekyerwa wa Ruhanga. (Mak. 6:1-4) Barumuna ba Yesu nibabaasa kuba baakwatsirweho emiteekateekyere egyo. Mbwenu shi enshonga nk’ezo nizo ziriyo niziremesa abanyabuzaare baawe kwega amazima?
8. Niki ekirikubaasa kureetera abanyabuzaare baitu abatari mu mazima kututwariza kubi?
8 Teekateeka aha kirikubareetera kukora nari kugamba ebintu ebimwe. Barumuna ba Yesu nibabaasa kuba baabaire bari bamwe aha banyabuzaare abaagizire ngu “agwire eiraro.” (Mak. 3:21) Niki ekirikubaasa kuba kyabareetaire kuteekateeka batyo? Ebyetooroire omushororongo ogwo nibyoreka ngu Yesu akaba aine bingi by’okukora kandi yaahika n’aha kubura obwire bw’okurya. (Mak. 3:20) Obundi abanyabuzaare be bakateekateeka ngu naarengyesereza omu bi arikukora. Naitwe abanyabuzaare baitu nibabaasa kuteekateeka ngu nituremera munonga aha bi turikwikiriza. Kyaba kiri kityo, twine kuteeraho kworeka omu bikorwa byaitu ngu ekyo tikwo kiri.
9. Niki ekirikubaasa kuhwera abanyabuzaare baitu kuhindura emiteekateekyere ei batwineho? (1 Petero 3:1, 2) (Reeba n’ebishushani.)
9 Ka bareebe emitwarize yaawe emirungi. Ebigambo byaitu eby’embabazi n’ebikorwa byaitu nibibaasa kureetera abanyabuzaare baitu kuhindura emiteekateekyere ei batwineho. (Shoma 1 Petero 3:1, 2.) Omushaija otari mu mazima naabaasa kuguubwa kubi, omukazi we yaaza omu nteerane nari omu kubuurira. Kwonka omukazi yaaba atarikwenda ngu iba ayehurire atyo, naabaasa kuhindura omu ntebeekanisa ze ez’eby’omwoyo kugira ngu abaase kumara obwire nawe. Nk’eky’okureeberaho, naabaasa kucwamu kuza omu kubuurira omu bwire obu iba arikuba aine bingi by’okukora nari yaaba atari mu ka. Omukazi Omukristaayo yaatwaza atyo, naahwera iba kugira emiteekateekyere mirungi aha Bajurizi ba Yehova.
Ebigambo byaitu n’ebikorwa byaitu eby’embabazi nibabaasa kuhindura emiteekateekyere ei omunyabuzaare otari mu mazima aine aha Bajurizi ba Yehova (Reeba akacweka 9)f
10. Nitubaasa kutooreza tuta Yesu abantu baatugambaho ebitahikire?
10 Tikirikwetengyesa kwehozaho ahari buri kimwe. Abantu ku baabeihereire Yesu ngu akaba naarya kandi anywa munonga, tarateireho kwehozaho. Kureka, akahiga abantu kwereebera ekihikire. (Mat. 11:19) Kandi oku yaabaire naatwaza kikoreka ngu aringaniire omu mbeera ze ahakuba akaba atunga obwire bw’okwejumba omu by’okweshemeza. (Gyeragyeranisa Yohaana 2:2, 6-10.) Nikyo kimwe, abanyabuzaare baatugambaho ebitahikire, titwine kwehozaho ahari buri kimwe. Kureka, nitworeka omu bikorwa byaitu ngu n’obu turaabe nituhamira aha mazima ga Baibuli twine okushemererwa, kandi eki nikiija kubahwera kwecweramu ekihikire. Nikibaasa kubareetera kutaikiriza ebishuba ebi barikutuhuriraho.
GUMISIRIZA KANDI OGIRE AMATSIKO
11. Yesu akatwariza ata abarumuna abaabaire batarikumwikiririzamu?
11 Ebitabo by’Engiri nibyoreka ngu Yesu akagumisiririza abarumuna. Nk’eky’okureeberaho, Yesu naabaasa kuba yaabaire ari n’abarumuna, obu yaakora eky’okutangaaza ky’okubanza omuri Kaana. (Yoh. 2:11, 12) Nk’oku kyaba kyagambirweho, tibaramwikiririzemu. Kwonka, tarabeecwireho. Baibuli neeyoreka ngu Yesu akagumizamu naagamba n’abarumuna omu muringo gw’embabazi na bwanyima y’emyaka nk’eshatu aherize kukora eky’okutangaaza omuri Kaana.—Yoh. 7:5-8.
12. Niki ekirikubaasa kutuhwera kuguma twine amatsiko ngu bamwe aha banyabuzaare baitu nibaija kuhindura emiteekateekyere yaabo?
12 Okwetegyereza gye embabazi za Yehova nikibaasa kutuhwera kuguma twine amatsiko aha banyabuzaare baitu. Amadiini g’ebishuba ku garaacwekyerezibwe, abanyabuzaare baitu nibabaasa kwijuka ebi twabagambiire aha nshonga egyo.a (Kush. 17:16) Nibabaasa n’okutwegaitaho omu kuramya okushemeire bwanyima y’okubonabona kwingi kutandika. Kandi abanyabuzaare baitu baaba nibaraba omu mbeera zigumire, nitukora kyona eki turikubaasa kubahwera. Obundi nibabaasa kwikiriza amazima ga Baibuli baareeba ngu tubainiire rukundo n’embabazi eza buzima.
BOOREKYE NGU NOOBAKUNDA
13. N’obu turaabe twine bingi by’okukora omu buheereza bwa Yehova, niki eki tutaine kukora?
13 N’obu turaabe twine bingi by’okukora omu buheereza bwa Yehova, titurikwenda kworeka abanyabuzaare baitu ngu titubainiire bwire, kandi ngu titwakibakunda. (Mat. 7:12) Mbwenu shi nitubaasa kworeka tuta ngu nitubafaho? Teekateeka aha miringo emwe ei orikubaasa kukikoramu.
14-15. Ni muringo ki gumwe oku turikubaasa kworeka ngu nitukunda abanyabuzaare baitu abatari mu mazima? Ha eky’okureeberaho.
14 Guma noohurizana nabo kandi oboorekye ngu noobakunda. Butoosha twine kworeka abanyabuzaare baitu ngu nitubakunda turikubamanyisa oku turi. Nk’eky’okureeberaho, nitubaasa kubooherereza obutumwa, tubateerere esimu nari tubahwere kumanya abanywani abu twine. Twaboherereza obutumwa nari tukabaha ekiconco n’obu kyakuba kiri kikye, nikibaasa kuhamya omukago gwaitu nabo. Twakora ebintu nk’ebyo, nitubahamiza ngu nitubakunda.
15 Teekateeka aha ky’okureeberaho kya munyaanyazi-itwe Anna kuruga Armenia. Eka yaabo neekira kuba hamwe na munonga omu bwire bw’ebiro bikuru n’aha kukuza amazaarwa. Anna ku yaikiriize amazima, abanyabuzaare be bakatandika kwerarikirira aha ku enyikiriza ye ensya yaabaire neija kukwata aha mukago gwabo. Kandi bakaba beerarikiriire aha ku okucwamu kwe okw’okuba Omujurizi wa Yehova kwabaire nikuza kukwata aha biro bye eby’omumaisho. Anna naashoboorora eki yaakozire kuguma aine enkoragana nungi n’abanyabuzaare be. Naagira ati: “Ku ndikutaayaayira abanyabuzaare bangye nimbagambira ebirikunkwataho n’ebi ndikukora. Kandi nimbeta kuntaayaayira reero mbooreka banywani bangye. N’ekirugiremu, abanyabuzaare bangye nibamanya gye banywani bangye kandi nikiboorobera kugaaniira nabo.” Naayongyeraho ati: “Baingi aha banyabuzaare bangye bagizire ngu nyine okushemererwa kandi tibakinyerarikiriraho.”
16. Yesu akooreka ata ngu naafayo aha murumuna Yakobo? (Reeba n’obugambo obw’ahansi.)
16 Yoreka ngu noobafaho. Yesu akooreka ngu naafayo aha murumuna Yakobo arikumweyoreka bwanyima y’okuzooka. (1 Kor. 15:7) Noogira ngu Yakobo akeehurira ata ku yaamanyire ngu Yesu taramwehugize? Hatariho kubangaanisa, Yakobo ku yaareebire Yesu akahamiza kimwe ngu niwe Mesia. Bwanyima y’okumureeba, naabaasa kuba yaahweraire abanyabuzaare abandi kwetegyereza ngu Yesu ni Mesia.b—Byak. 1:14.
17. Nitubaasa kugyendera tuta aha musingye oguri omu Abarooma 12:15? (Reeba n’ekishushani.)
17 Shoma Abarooma 12:15. Twayoreka ngu nitufayo aha banyabuzaare baitu omu mbeera zoona nitubahwera kutugiraho emiteekateekyere mirungi.c Nk’eky’okureeberaho, nitubaasa kushemererwa nabo omwe aharibo yaazaara omwana nari tubahe ebiconco. Omunyabuzaare yaafeerwa omukundwa, nitubaasa kumugumya turikugira eki twamukorera nari kumwoherereza obutumwa bw’okumuhuumuriza. Kandi, titwine kwebwa kubataayaayira na munonga baaba nibaraba omu mbeera zigumire.
Waayoreka ngu noofayo aha banyabuzaare baawe na munonga omu mbeera ezigumire, nikibaasa kuhindura emiteekateekyere ei bakwineho n’ebi orikwikiriza (Reeba akacweka 17)g
18. Nitubaasa kutooreza tuta entumwa Anderea?
18 Banjurire ab’eishe-emwe. Entumwa Anderea ku yaamanyire ngu Yesu ni Mesia, akareeta omurumuna Petero yaamwanjurira Yesu. (Yoh. 1:40-42) Naitwe nitubaasa kukora nikyo kimwe. Nk’eky’okureeberaho, nitubaasa kuguma nitweta omunyabuzaare turye nawe turi n’abanywani baitu nari kwija omu nteerane. Yaamanya ab’eishe-emwe bagyenzi baitu, naija kureeba ngu Abajurizi ba Yehova n’abantu baabutoosha kandi abarikutwaza gye.
19. Twine kutwariza tuta abanyabuzaare baitu n’obu baakuba batarikwetegyereza ebi turikwikiriza? (1 Petero 3:15)
19 Shoma 1 Petero 3:15. Ab’eka yaitu nibabaasa kutarahuka kwetegyereza gye ahabw’enki tutarikwejumba omu bintu ebimwe, kwonka nibaguma nibaijuka oku turikubatwariza omu muringo gw’embabazi kandi ogw’ekitiinisa. Ahabw’okugira ngu titurikuba nabo aha mikoro emwe, nibashemererwa twataho obundi obwire bw’okuba nabo. Nk’eky’okureeberaho, titurikubaasa kubeegaitaho aha mikoro n’emigyenzo etarikuhikaana n’emisingye ya Baibuli, kwonka nitubaasa kubataayaayira omu bwire obundi, turye nabo nari tubahe ebiconco.
OTAREKYERA AHO KUHWERA ABANYABUZAARE BAAWE
20. Ahabw’enki eky’okureeberaho kya Yakobo kirikutugumya?
20 Yakobo akafeerwa omugisha gw’okukora na Yesu omu buheereza bwe, kwonka akahika yaaba omwegi we. (Gal. 1:18, 19; 2:9) Bwanyima y’okuba omwegi, aine kuba yaayegire amashomo mingi omu bi Yesu yaayegyeise. Nk’eky’okureeberaho, akahwerwa omwoyo ogurikwera kuhandiika ebaruha eine akakwate n’Orubazo rw’Aha Rushozi.d
21. Ahabw’enki tutaine kurekyera aho kuhwera abanyabuzaare baitu abatari mu mazima?
21 N’obu twakuteeraho tuta kufayo aha banyabuzaare baitu abatari mu mazima, nibabaasa kutaikiriza amazima nari kugagyenderaho. Kwonka ahabw’enki tutaine kurekyera aho kubahwera? Ahakuba buri kubagirira embabazi, nituba nitutooreza Yehova Ruhanga omunyambabazi, n’Omwana we Yesu. (Luk. 6:33, 36) Bwanyima y’obwire, ebikorwa byaitu ebya rukundo nibibaasa kuhindura emiteekateekyere ei batwineho, kandi baijuke ebi twabagambiire aha nyikiriza zaitu. Twagumizamu nitubahwera, nitwija kushemererwa kureeba nibatwegaitaho omu kuramya okushemeire.
EKYESHONGORO 60 Okubuurira Nikukiza Amagara
a Reeba ekicweka “Nitumanya ki aha ku Yehova Araacwe Emanja omu Biro by’Omumaisho?” omu Munaara gw’Omurinzi ogwa Mei 2024, rup. 11, kacw. 11-13.
b Bwanyima ya Yesu kufa kandi akazooka, abarumuna Yakobo na Yuda bakarugaho baakunda amazima.
c Reeba akabokusi “Noobaasa Kuza aha Mukoro gw’Okugaitwa nari Kuziika?”
d Gyeragyeranisa Yakobo 1:2 na Matayo 5:11, 12; Yakobo 1:19 na Matayo 5:22; Yakobo 1:22; 2:24 na Matayo 7:21; Yakobo 2:13 na Matayo 5:7; 6:14, 15.
e Kubaasa kumanya ebirikukiraho aha bikwatiraine n’enshonga nk’ezo, reeba ekicweka “Questions From Readers” omu Munaara gw’Omurinzi ogwa Mei 15, 2002, na Novemba 15, 2007.
f ENSHOBOORORA Y’EBISHUSHANI: Munyaanyazi-itwe atakagiire omu kubuurira, yaabanza kutebeekanisiza iba eky’okurya.
g ENSHOBOORORA Y’EKISHUSHANI: Munyaanyazi-itwe niwe omwe yaataayaayira nyinazaara otari Mujurizi wa Yehova.