Ku Harikubaho Oburemeezi

N’obu muraabe nimuteeraho kugira obushwere oburimu okushemererwa, ebihikiirizi nibibaasa kubaremesa kuguma mwine okushemererwa. (Omubuurizi 9:11) Kwonka Ruhanga naatuhuumuriza ku turikuhikwaho oburemeezi. Iwe n’ab’omu ka yaawe mwaagyendera aha misingye ya Baibuli nimwija kusingura n’obu mwakuhikwaho oburemeezi bw’amaani.

1 YESIGYE YEHOVA

EKI BAIBULI ERIKWEGYESA: “Mumwegyekyerere okushoberwa kwanyu kwona, ahabw’okuba naabataho omutima.” (1 Petero 5:7) Obutoosha oijukye ngu oburemeezi oburikukuhikaho tiburikuruga ahari Ruhanga. (Yakobo 1:13) Waaguma noomwirira haihi, naija kukuhwera omu muringo gwona. (Isaaya 41:10) “Mumugambire byona.”​—Zaaburi 62:8.

Noija kuhuumurizibwa waashoma Baibuli buri izooba. Noija kureeba oku Yehova arikutuhuumuriza “omu busaasi bwaitu bwona.” (2 Abakorinso 1:3, 4; Abarooma 15:4) Ruhanga naaraganisa kukuha ‘obusingye bwe oburengire okwetegyereza kw’omuntu weena.’​—Abafilipi 4:6, 7, 13.

EKI ORIKUBAASA KUKORA:

• Shaba Yehova kukuhwera kandi ogume oine emiteekateekyere mirungi

• Waahikwaho oburemeezi, oshwijume bimwe aha bi orikubaasa kukora kandi ocwemu gye

2 OGUME OYEREEBERERE HAMWE N’EKA YAAWE

EKI BAIBULI ERIKWEGYESA: “Omutima gw’omwerinzi gutunga okumanya, kandi okutu kw’omunyabwengye nikyo kwetenga.” (Enfumu 18:15) Manya byona ebirikukwata aha buremeezi obu oine. Manya eki buri omwe omuka yaawe arikwetenga. Gaaniira nabo kandi obahurikize.​—Enfumu 20:5.

Mbwenu shi waafeerwa omuntu ou orikukunda? Otatiina kworeka oku orikwehurira. Ijuka ngu na Yesu ‘akarira.’ (Yohaana 11:35; Omubuurizi 3:4) Ni kikuru kubyama okahuumura ekirikumara. (Omubuurizi 4:6) Eki nikiija kukuhwera kugumisiriza omu mbeera erikuba egumire.

EKI ORIKUBAASA KUKORA:

• Guma oine enkoragana nungi n’ab’omuka yaawe. Oburemeezi bwabaho nikiija kuboorobera kugaaniira naiwe

• Gaaniira n’abo abarahikirweho oburemeezi nk’obwo

3 TUNGA OBUHWEZI OBU ORIKWETENGA

EKI BAIBULI ERIKWEGYESA: “Munywani w’omuntu amukunda ebiro byona kandi ow’eishe-emwe azaarirwa okuhwera abantu omu bihikiirizi.” (Enfumu 17:17) Banywani baawe obumwe nibaba nibenda kukuhwera kwonka nibabaasa kutamanya eki barikubaasa kukora. Otatiina kubagambira eki orikwetenga kyenyine. (Enfumu 12:25) N’ekindi, sherura obuhwezi omu by’omwoyo kuruga ahari abo abarikwetegyereza Baibuli. Obuhabuzi obu baraakuhe kuruga omu Baibuli nibwija kukuhwera.​—Yakobo 5:14.

Noija kutunga obuhwezi obu orikwetenga, waaguma haihi n’abo abarikwikiririza kimwe omuri Ruhanga kandi bakeesiga ebi araganiise. Noija kutunga okuhuumurizibwa waahwera abandi abarikwetenga kugarurwamu amaani. Gaaniira nabo aha bi orikwikiriza hamwe n’ebi Yehova araganiise. Guma noohwera abandi abarikwetenga obuhwezi, kandi otakayetaanisa ahari abo abarikukukunda n’abarikukufaho.​—Enfumu 18:1; 1 Abakorinso 15:58.

EKI ORIKUBAASA KUKORA:

• Gaaniiraho na munywani waawe ow’aha mara kandi oikirize akuhwere

• Mugambire kyenyine eki orikwenda