EKICWEKA 9

Muramye Yehova nk’Eka

“Muramye Ogwo owaahangire eiguru n’ensi.”—Okushuuruurwa 14:7

Nk’oku oyegire omu katabo aka, Baibuli erimu emisingye mingi erikwija kukuhwera n’eka yaawe. Yehova naayenda ngu oshemererwe. Naaraganisa ngu mwayebembeza okuramya, ebindi byona nimwija kubyongyerwaho. (Matayo 6:33) Buzima naayenda ngu obe munywani we. Koresa buri kagisha koona kubaasa kugira omukago murungi na Ruhanga. Okugira omukago murungi na Ruhanga n’omugisha ogurikukirayo ogu omuntu arikubaasa kugira.—Matayo 22:37, 38.

1 HAMYA OMUKAGO GWAWE NA YEHOVA

Omushaija n’omukazi we bari hamwe omu kubuurira

EKI BAIBULI ERIKWEGYESA: ‘Ndyaba Shoimwe, naimwe mube batabani bangye na bahara bangye, nikwo Mukama arikugira.’ (2 Abakorinso 6:18) Ruhanga naayenda ngu obe munywani we ow’aha mara. Okushaba n’omuringo gumwe ogurikubaasa kukuhwera kuba munywani wa Ruhanga. Yehova naayenda ngu ‘omushabe obutoosha.’ (1 Abatesalonika 5:17) Yehova aine ekihika ky’okuhurira ebiri aha mutima gwawe n’ebirikukwerarikiriza. (Abafilipi 4:6) Waashaba n’ab’omu ka yaawe, nibaija kureeba oku Ruhanga ari owaabuzima ahariiwe.

Okwongyera ahari ekyo, oine kumuhurikiza. Eki noobaasa kukikora waashoma Baibuli hamwe n’ebitabo ebirikushoboorora ebiri omu Baibuli. (Zaaburi 1:1, 2) Teekateeka aha bi orikwega. (Zaaburi 77:11, 12) Okuhurira Ruhanga nikutwariramu n’okuza omu nteerane z’Ekikristaayo obutoosha.—Zaaburi 122:1-4.

Omuringo mukuru ogundi ogw’okuhamya omukago gwawe na Yehova n’okugambira abandi ebirikumukwataho. Waaguma nookora ekyo, noija kweyongyera kumwirira haihi.—Matayo 28:19, 20.

EKI MURIKUBAASA KUKORA:

Mugire obwire bw’okushoma Baibuli n’okushaba buri izooba
Nk’eka, mwine kwebembeza eby’omwoyo okukira eby’okweshemeza

2 OKURAMYA KW’EKA OKURIKUSHEMEZA

Omushaija naatebeekanisa kwega n’ab’omu ka ye reero bwanyima bari omu kuramya kw’eka

EKI BAIBULI ERIKWEGYESA: “Mwirire haihi Ruhanga, nawe abone kubairira haihi.” (Yakobo 4:8) Oine kugira entebeekanisa y’okuramya kw’eka kandi okagigyenderaho. (Okutandika 18:19) Kwonka hariho ebindi ebi oine kukora. Oine kugyenda na Ruhanga buri izooba. Hamya omukago gw’eka yaawe na Ruhanga orikugaaniira aha birikumukwataho waaba ‘oshutami omu nju yaawe, noogyenda omu muhanda, nooza kubyama, hamwe na waimuka.’ (Eky’Ebiragiro 6:6, 7) Ba nka Yoshua, owaagizire ati: “Nyowe n’eka yangye nitwija kuguma nituheereza MUKAMA.”—Yoshua 24:15.

EKI ORIKUBAASA KUKORA:

Gira entebeekanisa y’okuramya kw’eka eraije kuhwera buri omwe omu ka yaawe, kurugiirira aha kyetengo kye

Omukazi naashomera omutabani omuto; eka neekora omuzaano gw’ebiri omu Baibuli; omushaija naayega n’omuhara