Oku Orikubaasa Kwegyesa Omwana Waawe

Obu Yehova yaatandikaho eka, akaha abazaire obujunaanizibwa bw’okureeberera abaana. (Abakolosai 3:20) N’obujunaanizibwa bwawe nk’omuzaire kutendeka omwana waawe kukunda Yehova nawe akaba ow’obujunaanizibwa. (2 Timoseo 1:5; 3:15) Kandi oine kuteeraho kumanya ekiri omu mutima gw’omwana waawe w’omwojo nari w’omwishiki. Okukira munonga, ni kikuru okubateeraho eky’okureeberaho kirungi. Okubaasa kwegyesa gye omwana waawe Ekigambo kya Ruhanga oine kubanza waakyeyegyesa.​—Zaaburi 40:8.

1 REEBA NGU ABAANA BAAWE NIBOOROBERWA KUGAANIIRA NAIWE

EKI BAIBULI ERIKWEGYESA: Rahuka ‘kuhurira, kwonka otarahukiiriza kugamba.’ (Yakobo 1:19) Nooba nooyenda ngu abaana baawe batatiina kugamba naiwe. Baine kumanya ngu nooba oyeteekateekire kubahurikiza baaba baine eki barikwenda kukugambira. Taho embeera eraareetere abaana baawe kugamba naiwe batarikutiina. (Yakobo 3:18) Baaba nibamanya ngu nooza kubagambira kubi nari kubacwera orubanja, tibarikwija kukugambira ekibari aha mutima. Gumisiririza abaana baawe kandi butoosha bahamize ngu noobakunda.​—Matayo 3:17; 1 Abakorinso 8:1.

EKI ORIKUBAASA KUKORA:

• Teeraho kuhurikiza abaana baawe baaba baine eki barikwenda kukugambira

• Obutoosha gira obwire bw’okugaaniira n’abaana baawe, otategyereza kugamba nabo obu harikuba hariho oburemeezi bwonka

2 TEERAHO KWETEGYEREZA EKI BARIKUKUGAMBIRA

EKI BAIBULI ERIKWEGYESA: “Orikwerinda weena akoresa okumanya.” (Enfumu 13:16) Obumwe nooba oine kuteeraho kushwijuma ebi barikukugambira kubaasa kwetegyereza enyehurira zaabo. Emirundi emingi abaana nibakira kugamba ebintu ebitabarugire ha mutima. “Ogarukamu atabandize kuhurira kyoreka obushema.” (Enfumu 18:13) Otarahuka kugira ekiniga.​—Enfumu 19:11.

EKI ORIKUBAASA KUKORA:

• Abaana baawe baaba baine eki barikwenda kukugambira, ogume oyeteekateekire kuhurikiza, otarahuka kuguubwa kubi

• Guma noijuka oku waabaire otwaza obu waabaire okiine emyaka nk’eyaabo n’ebi waabaire otwara nka bikuru

3 ABAZAIRE MWEMBI MUKWATANISE

EKI BAIBULI ERIKWEGYESA: “Mwana wangye, guma ohurire ebi sho arikukuhabura, kandi otanga ebi nyoko arikukwegyesa.” (Enfumu 1:8) Yehova akaha abazaire bombi obujunaanizibwa bw’okureeberera abaana baabo. Mwine kwegyesa abaana baanyu kubaha ekitiinisa kandi bakaboorobera. (Abaefeso 6:1-3) Abaana nibabaasa kumanya yaaba abazaire baabo nibakwatanisa nari batarikukwatanisa. (1 Abakorinso 1:10) Mwatunga obutaikirizana mureebe ngu timwakyoreka abaana, ahabw’okuba nikibaasa kubareetera kutabaha kitiinisa.

EKI MURIKUBAASA KUKORA:

• Mugaaniire kandi mwikirizane oku mushemereire kuhana abaana baanyu

• Iwe n’ou ori nawe omu bushwere mwagira obutaikirizana aha ku mushemereire kutendeka abaana baanyu, teeraho kwetegyereza eki ou ori nawe omu bushwere arikukugambira

4 MUTEHO ENTEBEEKANISA

EKI BAIBULI ERIKWEGYESA: “Manyiiza omwana omuhanda ogu ashemereire kutoora.” (Enfumu 22:6) Okugira abaana abatendekirwe gye tikirikubaho bubaho. Oine kutaho entebeekanisa y’okubatendeka, otwariiremu n’oku oshemereire kuhana abaana. (Zaaburi 127:4; Enfumu 29:17) Okuhana abaana tikirikumanyisa okubafubira kwonka, kureka nikitwariramu okubahwera kwetegyereza ahabw’enki obateereireho ebiragiro. (Enfumu 28:7) Kandi oine kubeegyesa kukunda Ekigambo kya Yehova hamwe n’okwetegyereza emisingye erimu. (Zaaburi 1:2) Eki nikiija kubahwera kugira omuntu ow’omunda orikukora gye.​—Abaheburaayo 5:14.

EKI ORIKUBAASA KUKORA:

• Oine kuhwera abaana baawe kureeba Ruhanga nk’owaabuzima kandi ou barikubaasa kwesiga

• Bahwere kumanya oku barikubaasa kwetantara akabi akari omu kukoresa Intaneeti n’emikura eriho. Beegyese oku barikubaasa kwetantara abarikuba nibenda kubatoroboza