OMWATSI W’ERIGHA 23
OLWIMBO 2 Erina lyaghu ni Yehova
Tukakanganaya tuti ngoko tukalangira erina lya Yehova mo ry’omughaso munene?
“‘Muli bimiri baghe,’ Yehova atya.”—ISA. 43:10.
ENZUMWA NGULU
Ebyo twangakola eriyira erina lya Yehova mo ribuyirire n’eryeryalyo.
1-2. Niki kyo kikakanganaya ngoko Yesu abya iniakalangira erina lya Tata wiwe mo ry’omughaso munene?
YESU akalangira erina lya Yehova mo ry’omughaso munene kutsibu. Sihali oyo wabiriminyisya abandu b’erina ry’oMungu nga Yesu. Ngoko tulyalangira omo mwatsi owalyahwa, Yesu abya inianayiteghekire erihola busana n’erikangania ngoko erina lya Yehova ni ribuyirire kandi ngoko ebyosi ebyo akakola byuwene. (Mar. 14:36; Ebr. 10:7-9) Kandi Obutabali bwiwe bw’Emyaka Elfu bukendisyabya bwabihwa, Yesu akendisyasubulirya Yehova y’obukulu bosi. Yesu akendisyakola atya kundi anzire Yehova iyo wahabwa olukengerwa losi. (1 Kor. 15:26-28) Yesu anzire erina ry’oMungu, ekyo kikatukanganaya ngoko Yehova na Yesu ni bira kutsibu. Kikakanganaya ndeke-ndeke ngoko Yesu anzire Yehova yo kutsibu.
2 Yesu mwasa oko kihugho atoke erikangirirya abandu b’emyatsi yosi eyo Tata wiwe abya anzire ibaminya. (Yoh. 5:43; 12:13) Yesu mwakangirirya abigha biwe b’erina lya Tata wiwe. (Yoh. 17:6, 26) Mwakangirirya ebyo Yehova abya anzire abandu ibaminya, n’erikola ebitiko-tiko omo rina lya Yehova. (Yoh. 10:25) Mwasaba Yehova ati ateghaye abigha biwe ‘busana n’erina liwe.’ (Yoh. 17:11) Oko kwenene, Yesu iniakalangira erina lya Yehova mo ry’omughaso munene kulenga ekindi kindu kyosi-kyosi. Neryo omundu anganabugha ati ni mwigha wa Yesu isyasi kutse isyalikolesaya erina lya Tata wa Yesu?
3. Tukendikania oko ki omo mwatsi ono?
3 Tukalangira erina lya Tata wa Yesu mo ry’omughaso munene kundi tuli Bakristo b’ekwenene kandi kundi tukayikasa erikwama olughobe lwa Yesu. (1 Pet. 2:21) Omo mwatsi ono, tukendilangira nga ni busanaki erina lya Yehova rikaminyikalaya abakatulaghanaya munabwire “engulu mbuya y’Obwami.” (Mat. 24:14) Kandi tukendilangira obuli mughuma w’okw’itwe ng’angakangania ati ngoko akalangira erina lya Yehova mo ry’omughaso munene.
“ABANDU ABAKENDIHEKA ERINA RIWE”
4. (a) Yesu mwaha abigha biwe b’omubiiri wahi embere asube elubula? (b) N’omubiiri oyo amaleka itwayibulya eribulyo ryahi?
4 Embere Yesu asube e lubula, mwabwira abigha biwe ati: “Mukendisyabana obutoki omughulu mukendisyahabwa ekirimu kibuyirire. Kandi mukendisyabya bimiri baghe omo Yerusalema, n’omo Yudea yosi ne Samaria, n’erihika omo biharo by’ehali by’ekihugho.” (Emib. 1:8) Neryo bangatulirye engulu mbuya omo biharo byosi, butsira e Israeli hasa. N’ekyo kyangalekire abandu b’ebihanda byosi ibabana akanya k’eribya bigha ba Yesu. (Mat. 28:19, 20) Aliwe Yesu mwabugha ati: “Mukendisyabya bimiri baghe.” Abigha bahya abo banabya batolere eriminya erina lya Yehova, kutse bangabere bimiri ba Yesu lisa? Emyatsi eyiri omo sura ye 15 y’ekitabu ky’Emibiiri ikendisubirya oko ribulyo eryo.
5. Abakwenda n’abasyakulu be Yerusalema mubakangania bati ngoko litolere abandu bosi ibaminya erina lya Yehova? (Ulebaye n’epitsa.)
5 Oko mwaka we 49 M.W., abakwenda n’abasyakulu be Yerusalema mubahindana batoke erilangira abate Bayahudi nga banalaghire okw’ibanibwa imo babya Bakristo. Oko mwiso w’omukania wabo, Yakobo mughala wabo Yesu mwabugha ati: “[Petro] abirikania ndeke-ndeke ngoko oMungu, engendo y’erimbere, abirilebya nomo bandu b’ebihanda atoke erisombolamo abandu abakendiheka erina riwe.” Yakobo abya akakania okundi? Mwahula ebinywa by’omuminyereri Amosi, amabugha ati: “Abandu abakisiya batoke erisonda-sonda Yehova n’omutima wosi haghuma n’abandu b’ebihanda byosi, abandu abakahulawa omo rina ryaghe, Yehova atya.” (Emib. 15:14-18) Ekyo kikakanganaya ngoko abigha bahya-bahya abo babya ibatolere eriminya erina lya Yehova ‘n’eryahulwa omo rina liwe.’ Ekyo ni bugha ambu bangaminyisirye abandi b’erina ry’oMungu, kandi abandu bangaminyirebo omo rina eryo.
Abalume bataleghula b’omo kyaghanda ekikasondola ky’oko karne k’erimbere bane omo muhindano. Omo muhindano oyo, bamalangira ngoko Abakristo batolere ibahulwa omo rina ry’oMungu (Ulebaye enungu 5)
6-7. (a) Busanaki Yesu mwasa oko kihugho? (b) Kandi mwasa busana n’oghundi mwatsi wahi w’omughaso munene?
6 Erina lya Yesu rikamaanisaya “Yehova ni mulamo,” kandi Yehova mwakolesya Yesu erisabula abandu bosi abakikiriraya. Yesu mwasa oko kihugho atoke eriherera engebe yiwe busana n’abandu. (Mat. 20:28) Omughulu Yesu aherera engebe yiwe, mwasabula abandu n’eribaha akanya k’erisyabana engebe y’erikota.—Yoh. 3:16.
7 Aliwe busanaki kyabya kitolere Yesu iniaholera abandu? Ni busana n’emyatsi eyalaba omo ririma rye Edeni. Ngoko tulyalangira omo mwatsi owalyahwa, ababuti betu b’erimbere, ye Adamu na Eva, mubatowa Yehova, n’ekyo mukyaleka ibaherya akanya k’eribyaho kera na kera. (Enz. 3:6, 24) Aliwe Yesu mwasa oko kihugho busana n’erikola omwatsi w’omughaso munene kulenga erisabula abandu b’amalolo. Sitani abya iniabirilegha Yehova yo kutsibu. (Enz. 3:4, 5) Neryo abandu babya ibatolere ibaminya ngoko Yehova mwatakola kibi, kandi ngoko erina liwe ni ribuyirire. Yesu yo wabya atolere erikangania ngoko Yehova mwatakola kibi kundi Yehova yo wamutuma kandi kundi mwakola ndeke-ndeke ebyosi ebyo Yehova abya anzire iniakola.
Omundu anganabugha ati ni mwigha wa Yesu isyasi kutse isyalikolesaya erina lya Tata wa Yesu?
8. Abigha bosi ba Yesu batolere ibaminyaki?
8 Abosi abikiriraya Yesu, bangabya Bayahudi kutse abate Bayahudi, babya batolere ibaminya ngoko Tata wa Yesu, ni bugha ambu ye Yehova Mungu, yukabasabula. (Yoh. 17:3) Kandi, babya batolere ibahulwa omo rina lya Yehova nga Yesu. Kandi babya batolere ibaminya ngoko ni ky’omughaso eriyira erina lya Yehova mo ribuyirire. Ekyo kyo kyangalekire ibasabuka. (Emib. 2:21, 22) Neryo abigha bosi ba Yesu bataleghula batolere ibaminya Yehova na Yesu bo ndeke. Kyo kyaleka Yesu abibugha erisaba omusabe owali omo Yohana 17, amabugha ebinywa bino: “Nabiriminyisyabo erina lyaghu, kandi ngendiminyisyaryo, olwanzo olo wanikanganaya lubye omo mitima yabo naghe omo bughuma nabo.”—Yoh. 17:26.
“MULI BIMIRI BAGHE”
9. Niki kyo kyangakangania ngoko tukalangira erina lya Yehova mo ry’omughaso munene?
9 Neryo kwesi, abigha bosi b’ekwenene ba Yesu batolere ibayira erina lya Yehova mo ribuyirire. (Mat. 6:9, 10) Batolere ibalangira erina liwe mo ry’omughaso munene kulenga awandi wosi. Batolere ibakangania ekyo omo mikolere yabo. Aliwe twangakangania tuti omo mikolere yetu ngoko tunemuyira erina lya Yehova mo ribuyirire, ni bugha ambu ngoko tunemulusya kulyo kw’amabehi ogho Sitani ahira kulyo?
10. Esura ye 42 erihika oko sura ye 44 y’ekitabu kya Isaya ikakanaya oko tribinali yahi y’omufano? (Isaya 43:9; 44:7-9) (Ulebaye n’epitsa.)
10 Esura ye 42 erihika oko sura ye 44 y’ekitabu kya Isaya ikakanganaya ekyo twangakola tutoke eriyira erina lya Yehova mo ribuyirire. Esyosura esyo sikakanaya oko tribinali y’omufano. Omo tribinali eyo, Yehova akabwira abandu abatemuramaya ati bakanganaye emiungu yabo nga nina y’ekwenene. Kandi akabulaya nga hane omwimiri oyo wangakangania emiungu eyo nga nina y’ekwenene. Aliwe sihali oyo wangatoka!—Soma Isaya 43:9; 44:7-9.
Tukakanganaya omo byosi ebyo tukabugha n’erikola ngoko sihali oghundi Mungu ate Yehova (Ulebaye enungu 10-11)
11. Ngoko kiri omo Isaya 43:10-12, Yehova mwabwira abandu biwe b’atiki?
11 Soma Isaya 43:10-12. Yehova akabwira abandu biwe ati: “Muli bimiri baghe, . . . naghe niri Mungu.” Yehova akabasaba ati basubiraye oko ribulyo lino: “Hane oghundi Mungu ate in’ingye?” (Isa. 44:8) Netu tuli n’olusunzo lw’erisubirya oko ribulyo eryo. Ebinywa n’emikolere yetu bitolere ibyakangania ngoko Yehova musa y’oMungu w’ekwenene. Erina liwe rilengire awandi mena wosi. Ebyo tukakola omo ngebe yetu bitolere ibyakangania ngoko kwenene-kwenene twanzire Yehova kandi ngoko tuli bataleghula okw’iye, nomo Sitani angatukalako ati. Twamabikola ebyo, itukendiyira erina lya Yehova mo ribuyirire.
12. Obuminyereri obuli omo Isaya 40:3, 5 mubwabererera buti?
12 Kandi Isaya mwabugha ati hangabere omundu oyukendyuwania kutse eriteghekanirya Yehova y’enzira. (Isa. 40:3) Ebyo mubyabererera biti? Mubyabererera omughulu Yohana Mubatisya ateghekaniraya Yesu y’enzira. Yohana mwabya ng’amateghekanirya Yehova y’enzira kundi Yehova yo watuma Yesu, kandi kundi Yesu yo wabya akabugha ebyo Yehova angabughire. (Mat. 3:3; Mar. 1:2-4; Luka 3:3-6) Kandi obuminyereri bughumerera obo mubwabugha buti: “Olukengerwa lwa Yehova lukendisyabisulwa.” (Isa. 40:5) Ebinywa ebyo mubyanabererera? Inga. Mubyabererera kundi omughulu Yesu asa oko kihugho, mwabugha n’erikola ebyo Tata wiwe angabughire n’erikola. Neryo mubyabya nga ni Yehova iyuwene-wene yulyasa oko kihugho. (Yoh. 12:45) Omughulu tukayira erina lya Yehova mo ribuyirire, tukabya itukakola nga Yesu Kristo.
13. Tukakwama tuti eky’erileberyako kya Yesu?
13 Netu tuli Bimiri ba Yehova nga Yesu. Tukahulawa omo rina lya Yehova kandi tukabwira obuli mundu oyo tukasangana naye oko myatsi ya Yehova eyuwene nga. Erikola ekyo kyo ndeke-ndeke, tutolere itwabwira abandu ebyo Yesu akola atoke eriyira erina lya Yehova mo ribuyirire. (Emib. 1:8) Yesu yo Mwimiri mukulu wa Yehova, netu yo tukakwama. (Erib. 1:5) Ni yindi myatsi yahi eyo obuli mughuma w’okw’itwe angakola atoke erikangania ngoko akalangira erina lya Yehova mo ry’omughaso munene?
EBINDI EBYO TWANGAKOLA ERIKANGANIA NGOKO TUKALANGIRA ERINA LYA YEHOVA MO RY’OMUGHASO
14. Ngoko kiri omo Esyonyimbo 105:3, tukayowa tuti busana n’eriminya erina lya Yehova?
14 Tukayihalambira erina lya Yehova. (Soma Esyonyimbo 105:3.) Yehova akatsema kutsibu omughulu tukayihalambira erina riwe. (Yer. 9:23, 24; 1 Kor. 1:31; 2 Kor. 10:17) “Eriyihalamba omo Yehova” ni yihalamba busana n’eriminya ngoko Yehova y’oMungu wetu. Tukalangira erisikya erina riwe n’eryeryaryo mo lusunzo lunene. Silitolere n’ahake tukakwa esisoni sy’eribwira abandu abo tukakola nabo, abo tukasoma nabo, abahimbani betu, n’abandi bandu ngoko tuli Bimiri ba Yehova! Diabolo anzire itwaleka eribwira abandi b’oko rina rya Yehova. (Yer. 11:21; Erib. 12:17) Oko kwenene, Sitani n’abaminyereri biwe b’amabehi banzire abandu ibibirirwa erina lya Yehova. (Yer. 23:26, 27) Aliwe kundi twanzire erina lya Yehova, ekyo kikaleka itwayisyandira “omo musibo wosi.”—Esy. 5:11; 89:16.
15. Eribirikira erina lya Yehova ni bugha ambuki?
15 Sitwetwataleka eribirikira erina lya Yehova. (Yoe. 2:32; Rom. 10:13, 14) Eribirikira erina lya Yehova si ry’eriminyaryo n’erikolesyaryo risa. Kihiriremo n’eriminya ngoko Yehova ni Mungu oyukayowa ng’itwe, kandi awite emibere eyuwene, kandi ngoko twanganabya n’obwira haghuma naye. Tukayiketera iye, n’erimusaba obuwatikya n’obusondoli. (Esy. 20:7; 99:6; 116:4; 145:18) Kandi kihiriremo eribwira abandi oko rina riwe n’emibere yiwe, n’eribabwira tuti bayisubeko n’erikola emyatsi eyikendileka Yehova iniabatsemera.—Isa. 12:4; Emib. 2:21, 38.
16. Twangakangania tuti ngoko Sitani ni mubehi?
16 Tunayiteghekire eryaghalwa busana n’erina lya Yehova. (Yak. 5:10, 11) Omughulu tukabya bataleghula oko Yehova itunemwaghalwa, tukakanganaya ngoko Sitani ni mubehi. Oko mughulu wa Yobu, Sitani mwabugha atya oko bosi abakakolera Yehova: “Omundu akendisyateka obuli kindu kyosi ekyo awite busana n’engebe yiwe.” (Yobu 2:4) Sitani mwabugha ati abandu bakakolera Yehova omughulu emyatsi ikabaghendera ndeke risa, kandi ati bamabihikirwa n’amaligho ibakendilw’ibalekerania Yehova. Omundu mutaleghula ye Yobu mwakangania ngoko ebyo Sitani abugha ni mabehi. Netu tuli n’olusunzo lw’erikangania ngoko sitwangalolerya oko Yehova k’omughongo, nomo Sitani angatulengako ati. Twikirirye ngoko Yehova syendisyaleka erituteya busana n’erina riwe.—Yoh. 17:11.
17. Ngoko kiri omo 1 Petro 2:12, ni kindi kyahi ekyo twangakola eriha erina lya Yehova ry’olukengerwa?
17 Tusikirye erina lya Yehova. (Misyo 30:9; Yer. 7:8-11) Ebyo tukakola byanganaleka abandu ibapipa erina lya Yehova kutse ibatasikyaryo kundi batwasi mo Bimiri biwe. (Soma 1 Petro 2:12.) Busana n’ekyo, tukayikasa eripipa Yehova omo byosi ebyo tukabugha n’erikola. Twamabikola ekyo, itukendiletera erina lya Yehova ry’olukengerwa nomo tutahika-hikene.
18. Ni kindi kyahi ekyo twangakola erikangania ngoko tukalangira erina lya Yehova mo ry’omughaso munene? (Ulebaye n’ebinywa by’eyikwa.)
18 Tukalangira erina lya Yehova mo ry’omughaso munene kulenga ngoko bandu bakatulangira. (Esy. 138:2) Busanaki ekyo ni ky’omughaso munene? Kundi eryanza erina lya Yehova ryanganaleka abandu abatutimbireko ibatubughako muhanda.a Yesu abya tayari erihola oluholo olukahemula kandi ng’omubandi atoke eriletera erina lya Yehova ry’olukengerwa. “Mwatalangira erihemuka mo kindu.” Ni bugha ambu, mwatayowa muhanda kutse eritsomana ebyo bandu babya bakamubughako. (Ebr. 12:2-4) Iye mwayikasa erikola erisonda ly’oMungu.—Mat. 26:39.
19. Tukalangira tuti erina lya Yehova, kandi busanaki?
19 Tukayihalamba busana n’erina lya Yehova kandi tukalangira ini lusunzo lunene eryahulwa mo Bimiri ba Yehova. Busana n’ekyo, tunayiteghekire erihanda omutima nomo bangatubughakoki. Tukalangira erina lya Yehova mo ry’omughaso munene kulenga ngoko abandu bakatulangira. Neryo tuyisoghe kundu eribya tukapipa erina lya Yehova nomo Sitani angatulengako ati. Twamabikola tutya, itukendikangania ngoko tukalangira erina lya Yehova mo ry’omughaso munene nga Yesu Kristo.
OLWIMBO 10 Tupipe Yehova, oMungu wetu!
a Nibya na Yobu, omulume mutaleghula, mwayowa muhanda omughulu abira biwe basatu bamubughako amabehi. Embere sy’aho, omughulu abana biwe bahola, n’omughulu ebindu biwe byosi byamuhwako, “Yobu mwatakola erilolo kutse erihandikirirya oMungu ati akolire nabi.” (Yobu 1:22; 2:10) Aliwe omughulu batsuka eribugha oko Yobu kw’amabehi, mwatsuka ‘eribugha butsir’ilengekania.’ Mwayilwirako omo mwanya w’erilwira oko rina ry’oMungu.—Yobu 6:3; 13:4, 5; 32:2; 34:5.