Busanaki erina lya Yehova ryabya ly’omughaso munene oko Yesu?

1-2. (a) Yesu mwakolaki omw’igholo-gholo embere ahole? (b) Tukendikania okuki omo mwatsi ono?

KYABYA kiro kye Ine, omw’igholo-gholo, omo kiro 14 ky’omwisi we Nisani, oko mwaka we 33 M.W. Habya ihakisiya hake Yesu iniahoterwa, iniatswerwa, iniaghalibwa, n’eritibwa. Abya iniamabibugha erirya akalyo k’embaghane haghuma n’abakwenda biwe bataleghula. Mubalirako omo kyumba ky’endata. Babere babibugha erirya akalyo ako, Yesu mwabwira abakwenda biwe b’ebinywa by’omwiso-mwiso eby’erisikya mutima. Kandi mubabya bakasonda erilua omo kyumba ky’endata ekyo, mwakola omusabe w’omughaso munene. Omukwenda Yohana mwahandika omusabe oyo; akabanika omo Yohana esura 17.

² Omo mwatsi ono, tukendikania oko ebyo twangigha omo musabe ogho Yesu akola. Tukendikania oko myatsi eyabya ikaleka iniahangya-hangya embere ahole. Kandi tukendilangira ngoko omusabe oyo akakanganaya ekyabya ky’omughaso okw’iye omughulu abya akakola omubiiri wiwe oko kihugho.

“NABIRIMINYISYABO ERINA LYAGHU”

3. Yesu mwabughaki omo musabe wiwe, kandi abya akasonda eribugha atiki? (Yohana 17:6, 26)

³ Yesu mwabugha omo musabe wiwe ati: “Nabiriminyisyabo erina lyaghu.” Omo musabe oyo, mwabugha ngendo ibiri ati abiriminyisya erina lya Yehova oko bigha biwe. (Soma Yohana 17:6, 26.) Yesu asonda eribugha atiki? Ekyo ni bugha ambu abaminyisaya erina eryo batasi? Abigha ba Yesu babya Bayahudi, babya ibanasi erina ry’oMungu, ni bugha ambu, Yehova. Erina eryo irikabanika omo Masako w’Ekiebrania hakuhi ngendo 7000. Neryo si bugha ambu Yesu abya akasonda eribabwira ati oMungu akahulawa mo Yehova; aliwe abya akasonda eribakangania Yehova nga ni Mungu oyuli ati. Mwabawatikya eriminya Yehova yo ndeke, eriminya ebyo anzire erikolera ekihugho n’abandu, emibiiri yiwe, n’emibere yiwe. Sihabya oghundi oyo wangatokire eribabwira oko myatsi eyo ko ndeke-ndeke kulenga Yesu.

4-5. (a) Teka eky’erileberyako ekikakanganaya eriminya erina ry’omundu nga ni bugha ambu ki. (b) Yesu mwawatikya ati abigha biwe eriminya erina lya Yehova?

⁴ Twaterikania oko eky’erileberyako kino: Tubughe tuti omo ndeko yenyu muli omusyakulu w’endeko oyukahulawamo David kandi ni munganga. Ni musyakulu oyo wasi erilua kera. Aliwe kiro kighuma iwatoha, neryo ibakutibitya oko lupitali olo mughala wetu oyo akatumikirako. Mughala wetu oyo iniakolesya ebyo abirigha omo kinganga atoke erisabula engebe yaghu. Abikulamya, ighukenditasyamwanza kulenga kera, n’erina riwe irikendibya rikakwibukya ebyo akukolera. David akine musyakulu oyo wasi erilua kera, aliwe kandi ighukendimuminyamo munganga oyo wakulamaya.

⁵ Kutya, abigha ba Yesu babya ibanasi erina lya Yehova. Aliwe Yesu mwabawatikya erilangiraryo mo ry’omughaso munene n’eriminyaryo ndeke-ndeke. Twamabugha tutya kundi Yesu mwakangania emibere ya Tata wiwe omo myatsi yosi eyo abya akabugha n’erikola. Neryo erihulikirira ngoko Yesu abya akakangirirya n’erilangira ngoko abya akakolera abandu mulyawatikya abakwenda biwe ‘eriminya’ Yehova yo ndeke.—Yoh. 14:9; 17:3.

“ERINA LYAGHU ERYO WABIRIMBA”

6. Yesu abya akasonda eribugha atiki omughulu abugha ati Yehova abirimuha erina riwe? (Yohana 17:11, 12)

⁶ Yesu mwasabira abigha biwe. Mwabugha omo musabe oyo ati: “Uteghayebo busana n’erina lyaghu eryo wabirimba.” (Soma Yohana 17:11, 12.) Ekyo ni bugha ambu Yesu angabere akahulwa mo Yehova? Iyehe. Omughulu Yesu abya akakania oko rina rya Yehova omo musabe wiwe, mwabugha ati “erina ryaghu.” Neryo sitwangabugha tuti Yesu yo wangabere akahulwa mo Yehova. Neryo Yesu abya akamaanisayaki omughulu abugha ati oMungu abirimuha erina riwe? Eky’erimbere, Yesu atumawa na Yehova kandi abya mbuyi yiwe. Mwasa omo rina lya Tata wiwe kandi abya akakola ebitiko-tiko omo rina eryo. (Yoh. 5:43; 10:25) Ekindi, erina lya Yesu rikamaanisaya “Yehova ni mulamo.” Ekyo kikakanganaya ngoko amaana w’erina lya Yesu alimo erina lya Yehova.

7. Teka eky’erileberyako ekikakanganaya ngoko Yesu abya akabugha ebyo Yehova angabughire.

⁷ Yesu abya akabugha ebinywa ebyo Yehova angabwire abandu kundi Yehova yo wamutuma. Yesu abya ng’omuambasadere. Omutabali w’ekihugho kilebe akatuma omuambasadere wiwe omo kindi kihugho, neryo omuambasadere oyo anganabugha ebyo omutabali oyo angabughire. Busana n’ekyo, abandu bakalangira ebinywa by’omuambasadere mo binywa ebyo omutabali oyulyamutuma angabughire.—Mat. 21:9; Luka 13:35.

8. Busanaki Yehova mwabugha ati erina riwe ryabya omo Yesu nibya embere Yesu ase oko kihugho? (Eriluayo 23:20, 21)

⁸ Yesu akahulawa mo Kinywa ky’oMungu, kundi abya akabwira abamalaika n’abandu ebyo Yehova abya anzire ibaminya n’ebyo abya anzire ibakola. (Yoh. 1:1-3) Kitokekene Yesu yo mumalaika oyo Yehova atuma eriteya Abaisraeli omughulu babya bakalua e Misri. Omughulu Yehova abwira Abaisraeli ati bowe omumalaika oyo, mwabugha ati bamwowe ‘kundi erina riwe rine omw’iye.’a (Soma Eriluayo 23:20, 21.) Yehova mwabugha ati erina riwe ryabya omo Yesu kundi Yesu akabugha ebyo Yehova angabughire kandi kundi Yesu yo mundu oyukakanganaya kutsibu ngoko ebyosi ebyo Yehova akakola, akakolabyo ndeke kandi ngoko ni mubuyirire.

“TATA, UHE ERINA LYAGHU RY’OLUKENGERWA”

9. Niki kyo kikakanganaya ngoko erina lya Yehova ryabya ry’omughaso munene oko Yesu? Kanaya.

⁹ Twabirilangira ngoko, Yesu iniakalangira erina lya Yehova mo ry’omughaso munene kutsibu nibya n’embere ase oko kihugho. Busana n’ekyo, omughulu abya oko kihugho, mwakangania omo byosi ebyo abya akakola ngoko erina lya Yehova ni ry’omughaso munene okw’iye. Omughulu abya akasonda eribugha omubiiri wiwe oko kihugho, mwasaba Yehova ati: “Tata, uhe erina lyaghu ry’olukengerwa.” Aho n’aho, Tata wiwe mwamusubirya omo mulenge munene ati: “Nabiriharyo olukengerwa kandi ngendihalyo olukengerwa.”—Yoh. 12:28.

10-11. (a) Yesu mwakolaki eriha erina lya Tata wiwe ry’olukengerwa? (Ulebaye n’epitsa.) (b) Busanaki erina lya Yehova ryabya litolere eriyirwa mo libuyirire n’eryeribwa?

¹⁰ Yesu naye mwaha erina lya Tata wiwe ry’olukengerwa. Mwakola ekyo kyo ati? Mwakola atya omo nzira nguma, omw’ibwira abandi oko mibere eyuwene eyo Tata wiwe ali nayo n’emyatsi eyuwene eyo Tata wiwe akakolera abandi. Aliwe, habya ihane eyindi myatsi eyo Yesu abya atolere erikola atoke eriha erina lya Tata wiwe ry’olukengerwa. Yesu abya atolere iniakangania ngoko ebyosi ebyo Yehova akola byuwene kandi ngoko erina riwe ni libuyirire.b Yesu mwakangania ngoko omwatsi oyo ni w’omughaso munene omo binywa ebyo abugha omo Musabe wa Tata Wetu. Mwabugha ati: “Tata wetu oyuli elubula, erina lyaghu riyirawe mo libuyirire.”—Mat. 6:9.

¹¹ Busanaki erina lya Yehova ryabya litolere eriyirwa mo ribuyirire n’eryeribwa? Ni kundi Sitani mwatasikya Yehova Mungu kandi mwamubughako amabehi omo ririma rye Edeni. Sitani mwabugha ati Yehova ni mubehi kandi ati akakagha Adamu na Eva y’ekindu ekyuwene. (Enz. 3:1-5) Kandi Sitani mwakangania ngoko Yehova syalikola emyatsi omo nzira eyuwene. Amabehi wa Sitani mwatsandya erina lya Yehova. Emyaka yikalaba, omo biro bya Yobu, kandi Sitani mwabugha ati abandu abakakolera Yehova bakamukolera busana n’erimurondyako endundi risa. Kandi omubehi oyo, ye Sitani, mwabugha ati sihali omundu n’omughuma oyo oko kwenene anzire Yehova erihika oko kika ky’eritendileka erimukolera omughulu amahikirwa n’amaligho. (Yobu 1:9-11; 2:4) Kyabya kitolere ihalaba omughulu mulebe erikangania omubehi nga nindi, nga ni Yehova kutse Sitani.

“NGAHERERA ENGEBE YAGHE”

12. Kundi abya anzire Yehova, Yesu abya ayiteghekire erikolaki?

¹² Yesu abya anzire Yehova. N’ekyo mukyaleka iniayikasa eriyira erina lya Yehova mo ribuyirire n’eryeryalyo. Nibya Yesu abya ayiteghekire erihola busana n’erina lya Yehova.c Mwabugha ati: “Ngaherera engebe yaghe.” (Yoh. 10:17, 18) Abandu babiri b’erimbere, ye Adamu na Eva, ababya bahika-hikene mubalolerya oko Yehova k’omughongo, bamayighunga na Sitani. Aliwe Yesu mwatakola ng’ibo. Iye abya ayiteghekire eryasa oko kihugho n’erikangania ngoko anzire Yehova. Mwakangania ekyo omw’isikya Yehova erilabira ebyosi ebyo abya akakola n’eribugha. (Ebr. 4:15; 5:7-10) Mwabya mutaleghula omo ngebe yiwe yosi erihika omughulu aholera oko muti w’amaghali. (Ebr. 12:2) Omo nzira eyo, mwakangania ngoko anzire Yehova n’erina liwe.

13. Busanaki Yesu yo wabya atolere kutsibu erikangania ngoko Sitani ni mubehi? (Ulebaye n’epitsa.)

¹³ Ebyosi ebyo Yesu akola omo ngebe yiwe mubyakangania ndeke-ndeke ngoko Sitani yo mubehi, butsira Yehova! (Yoh. 8:44) Yesu abya asi Yehova yo ndeke kulenga oghundi mundu wosi-wosi. Ebyo Sitani abugha oko Yehova byangabere kwenene, Yesu angaminyire omwatsi oyo. Aliwe Yesu mwayisogha kundu erilwira oko rina rya Yehova. Nibya n’omughulu Yesu ayowa Yehova ng’abirimulekerania, abya ayiteghekire erihola omo mwanya w’erilolerya oko Tata wiwe k’omughongo oyo wabya amwanzire.—Mat. 27:46.d

‘NABIRIBUGHA OMUBIIRI OGHO WAMBA’

14. Yehova mwahemba Yesu yo ati busana n’eribya mutaleghula?

¹⁴ Omo musabe ogho Yesu akola embere ahole, mwabugha ati: ‘Nabiribugha omubiiri ogho wamba.’ Yesu abya iniayiketere ngoko Yehova akendimuhemba busana n’obutaleghula bwiwe. (Yoh. 17:4, 5) Yesu abya asingene eriyiketera Tata wiwe. Yehova mwatamuleka omo yisinda. (Emib. 2:23, 24) Mwamulubukya n’erimuyiramo mukulu kulenga abandi elubula. (Filip. 2:8, 9) Habere halaba emyaka milebe, Yesu mwabya Mwami w’Obwami bw’oMungu, neryo amatsuka eritabala. Obwami obo bukendisyakolaki? Ekitswe ky’akabiri ky’Omusabe wa Tata wetu kirimo ekisubiryo ky’eribulyo eryo. Kikabugha kiti: “Obwami bwaghu [ni bugha ambu obwa Yehova] bwase. Erisonda ryaghu rikoleke oko kihugho ng’omo lubula.”—Mat. 6:10.

15. Ni yindi myatsi yahi eyo Yesu akendisyakola?

¹⁵ Hakisiya hake Yesu inialwa n’esyonzighu sy’oMungu n’eritoghotya ababi oko Armagedoni. (Erib. 16:14, 16; 19:11-16) Mughulu muke enyuma sy’aho, akendisyaghusa Sitani omo “kyuna kiri-kiri,” ni bugha ambu akendisyabya isyangatoka erikola omwatsi wosi-wosi, akendisyabya ng’omuholi. (Erib. 20:1-3) Omughulu w’Obutabali bw’Emyaka Elfu, Yesu akendisyasubya obuholo oko kihugho n’eritasyayira abandu mo abahika-hikene; akendisyalubukya abaholi; akendisyayira ekihugho kyosi mo paradiso. Neryo ebyo Yehova abya anzire erikola bikendisyabererera!—Erib. 21:1-4.

16. Ni myatsi yahi yo yikendisyabya Obutabali bw’Emyaka Elfu bwa Yesu bwabihwa?

¹⁶ Ni myatsi yahi yo yikendisyabya Obutabali bw’Emyaka Elfu bwa Yesu bwabihwa? Erilolo rikendisyabya iryabirihwa n’abandu bakendisyabya ibamabihika-hikana. Abandu bakendisyabya isibakilaghire okw’isaba obughanyiri busana n’amalolo wabo erilabira embanulo; bakendisyabya isibakilaghire oko musangania; kandi bakendisyabya isibakilaghire oko Yesu eribya Muhereri wabo Mukulu n’oko bandu 144000 eribya bahereri babo batoke eribawatikya eribya n’obwira obuwene haghuma na Yehova. “N’enzighu eyikendisyaheribwa oko mwiso [ni bugha ambu oluholo olo Adamu atuletera]” ikendisyabya iyabiritoghotibwa. Amasinda syendisyabyamo mundu. Abaholi bakendisyabya ibarilubukibwa. Obuli mundu oko kihugho akendisyabya iniabirihika-hikana.—1 Kor. 15:25, 26.

17-18. (a) Ni myatsi yahi eyikendisyabya oko nduli y’Obutabali bw’Emyaka Elfu? (b) Yesu akendisyayira ati obutabali bwiwe bukasonda erihwa? (1 Abanya Korinto 15:24, 28) (Ulebaye n’epitsa.)

¹⁷ Ni yindi myatsi yahi eyikendisyabya Obutabali bw’Emyaka Elfu bwa Yesu bwabihwa? Oko mughulu oyo, hakendisyabya omwatsi w’embaghane kutsibu. Obuli mundu akendisyabya iniabiriminya ngoko Yehova abuyirire kandi ngoko atunganene. Busanaki tukabugha tutya? Omo ririma lye Edeni, Sitani mwabugha ati Yehova ni mubehi kandi ati syalitabala abandu b’omo lwanzo. Eritsuka aho, abamukengire n’erimusikya bo bakabya ibanemuyira erina lya Yehova mo ribuyirire. Neryo oko nduli y’Obutabali bw’Emyaka Elfu erina lya Yehova likendisyabya iryabiryeribwa ndeke. Ahate eritika-tika, Yehova akendisyabya iniamabikangania ngoko ni Tata w’olwanzo.

¹⁸ Oko mwiso, ebyo Sitani abugha bikendisyalangirika ngoko ni mabehi olosi. Neryo Yesu akendisyayira ati obutabali bwiwe bukasonda erihwa? Anemwendisyayiwata nga Sitani n’erighana obutabali bwa Yehova? Iyehe n’ahake! (Soma 1 Abanya Korinto 15:24, 28.) Yesu akendisyasubulirya Tata wiwe y’Obwami. Akendisyaligha eritabalwa na Yehova. Kundi syali nga Sitani, Yesu anayiteghekire erileka omwatsi wosi-wosi kundi anzire Yehova.

19. Yesu akalangira ati erina lya Yehova?

¹⁹ Butsir’itika-tika, Yehova abya anzire eriha Yesu yo rina riwe! Yesu mwakangania ndeke-ndeke ngoko Tata wiwe yo wamutuma. Yesu akalangira ati erina lya Yehova? Akalangiraryo mo ry’omughaso munene kulenga ebyosi. Abya ayiteghekire erihola busana n’erina eryo, kandi oko mwiso w’Obutabali bw’Emyaka Elfu akendisyasubulirya Yehova y’obuli mwatsi omwanza liwe. Omo mwatsi owakwamire, tukendisyigha ngoko twangakwama eky’erileberyako kya Yesu.