Ebyangatuwatikya erisighala bataleghula omughulu obwikirirya bwetu bwamalengwako

1-2. Kiro kighuma Yesu inianemukangirirya e Kapernaumu, emyatsi muyaghenda yiti?

KIRO kighuma Yesu inianemukangirirya e Kapernaumu, mwabugha ati: “Mwamatendirya omubiri w’Omughala w’omundu n’erinywa omusasi wiwe, isimuwite engebe emwisi syenyu.” Mwasyatomekako ati: “Oyukalya oko mubiri waghe n’erinywa oko musasi waghe, awite engebe y’erikota, kandi ngendisyamulubukya oko kiro ky’enduli.” (Yoh. 6:53, 54) Abangyi b’oko bigha ba Yesu babere bowa ebinywa ebyo mubabugha bati: “Ekinywa eki kikalire; oyo wangahulikirirakyo nindi kwe?”​—Yoh. 6:60.

² Abahitana busana n’ebyo Yesu abugha mubaleka erimukwama. Mbino bakola batya kundi sibabya bamwikirirye? Alinga ko bite bitya; kundi embere Yesu abughe ebinywa ebi, abandu balebe ba kubo erihirako n’abigha ba Yesu mubasweka busana n’ebyo Yesu akola, erihika oko kika bamabugha bati: “Kwenene, oyu yo muminyereri oyo Amasako abugha ati akendisyasa omo kihugho.” (Yoh. 6:14) Okw’ekyo kilangirikire ndeke-ndeke ngoko abigha abo babya ibanikirirye Yesu oko lulengo lulebe. Aliwe, obwikirirya bwabo bwabere bwalengwako, mubaleghula okw’iye.

3. Abakwenda babere bowa ebinywa bya Yesu mubayiwata bati, kandi busanaki? (Ulebaye n’epitsa.)

³ Abakwenda ibo babere bowa ebinywa bya Yesu, mubatayiwata ng’abandi abahitana. Omughulu Yesu abulayabo ati nabo ng’abananzire erighenda, Petro mwasubirya ati: “Mukama, tukendighenda okundi? Iwe, uwite ebinywa by’engebe y’erikota. Twabirikirirya n’eriminya ngoko uli Mubuyirire w’oMungu.” (Yoh. 6:68, 69) Petro n’abandi bakwenda banganabya imubatowa ndeke-ndeke amaana w’ebinywa bya Yesu omughulu abugha ati batolere ibalya omubiri wiwe n’erinywa omusasi wiwe. Nomo bine bitya, mubayisogha erilola embere erimukwama. Busanaki? Kusangwa obwikirirya bwabo bwabya buseghemere oko mwatsi w’ekwenene, babya bikirirye ndeke-ndeke ngoko Yesu ni “Kristo w’oMungu.”​—Luka 9:20, 35.

4. Ni myatsi yahi eyangaleka ikyatukalako erisighala bataleghula oko Yehova?

⁴ Hane emyatsi mingyi eyangaleka ikyatukalako eribya bataleghula oko Yehova. Ng’omughulu endondeka yamabindula ngoko twabya twasi erisako rilebe, kutse iyabindula enzira yetu y’eritulira. Kutse kyanganatukalako eryowa ekikaleka Yehova inialeka amaligho atuhikire. Ekindi ekyangaleka ikyatukalako erisighala bataleghula oko Yehova, w’omughulu Omukristo mulikyetu kandi mwira wetu wa hakuhi amatuhitania, kutse omughulu omundu mulebe oyutusikirye amatukolera muhanda.

5. Busanaki litolere itwabya n’obwikirirya obuwatire? Teka eky’erileberyako. (Abanya Kolosai 1:23)

⁵ Litolere obwikirirya bwetu ibwabya n’emyatsi eyisikire eyo buseghemereko. Erituwatikya eriminya ngoko ekyo ni ky’omughaso, tukanaye oko ky’erileberyako kighuma. Enyumba eyihimbire omo kiharo ekikalabamo emisiki, kikatolera iyabya n’efondasyo eyisikire ikasyatera. Netu kutya, eritoka erisighala bataleghula omughulu obwikirirya bwetu bukalengawako n’emyatsi eyiri ng’eyo tulyalangira omo nungu y’akani, litolere obwikirirya obo ibwabya n’efondasyo eyisikire. Erilola embere eriwatya obwikirirya bwetu omughulu tukahikirawa n’amaligho kikendituwatikya erilola embere erikolera Yehova butaleghula.​—1 Kor. 15:58; soma Abanya Kolosai 1:23.

6. Ekyawatikaya abakwenda erisighala bataleghula oko Yesu niki?

⁶ Ekyawatikaya abakwenda erisighala bataleghula oko Yesu omughulu abandi bamusighanaya niki? Abakwenda babya bikirirye kundu ngoko Yehova yutolere eriramibwa kundi iye yo wahangyika ebindu byosi. Kandi babya bikirirye ngoko Yesu ni Mughala w’oMungu, kandi ngoko iye awite “ebinywa by’engebe y’erikota.” N’ekindi, babya balighire ngoko Yehova ane haghuma na Yesu omo myatsi yosi. Aliwe, omo mwatsi ono sitwenditondoghola emyatsi yosi eyangalenga oko bwikirirya bwetu; omo mwanya w’ekyo, tukendikania oko myatsi isatu eyangatuwatikya erisighala bataleghula omughulu twamalengwako. Emyatsi eyo y’eno: (1) Yehova yo Muhangyiki w’ebindu byosi. (2) Yehova yo wahandikisaya eBiblia. (3) Yehova anemukolesya endondeka yiwe munabwire. Twamabikirirya kundu emyatsi isatu eyi, itukendisighala bataleghula oko Yehova nomo twangalengwako tuti.

YEHOVA YO MUHANGYIKI W’EBINDU BYOSI

7. Eribisulirwa 4:11 ikatwibukayaki, aliwe twamatendikirirya ekyo emyatsi iyanganabya yiti omughulu obwikirirya bwetu bwamalengwako?

⁷ Soma Eribisulirwa 4:11. Erisako eri rikatwibukaya ngoko Yehova yo wahangyika ebindu byosi. Busana n’ekyo atolere eriramibwa. Kandi tukabya twalengekania oko kaghala kiwe akakaswekaya, kikaleka itwikirirya kundu ngoko akendituwatikya omo maligho wetu wosi. Aliwe, Sitani abirisulya omo kihugho mw’amabehi mangyi. Abirikola atya abandu batoke eribya bakatika-tika oMungu ng’ane. Nibya n’abandu balebe b’esiase bakabugha bati sihali Omuhangyiki. Twamatendikirirya kundu ngoko Yehova yo Muhangyiki kandi ngoko atwanzire, netu itwanganatsuka eribya tukatika-tika ng’ane, kandi ng’anganatuwatikya omughulu obwikirirya bwetu bwamalengwako.​—Ebr. 11:6.

8-9. Wamabitsuka eritika-tika Yehova nga yo Muhangyiki w’ebindu byosi, utolere iwakolaki? (Ulebaye n’epitsa.)

⁸ Kyamabihika iwatsuka eritika-tika Yehova nga yo wanahangyika ebindu byosi, aho n’aho utolere iwakola omwatsi mulebe. Litolere iwalw’iwakwesa-kwesa omo bitsapo byetu mw’emyatsi eyikakanganaya ngoko Yehova yo wahangyika ebindu byosi. Wanganabana emyatsi mingyi eyangawatya obwikirirya bwaghu omo katabu Uhai​—Ulitokana na Muumba? n’omo katabu Vitu Vyenye Uzima Vilianza Namna Gani?​—Maulizo Tano ya Kujiuliza. N’eyindi myatsi yine oko jw.org. omo katswe “Kyahangyikawa kutse kyayibutukira?” Mwali wetu owe Amerika oyukine mumbesa ye Jessica, akabugha ati: “Nabere nasoma emyatsi eyiri omo katabu Vitu Vyenye Uzima Vilianza Namna Gani, emyatsi eyo muyaleka inikirirya ngoko hane omundu w’amenge oyo wahangyika ebindu. Nabya ininasi ekyo, aliwe eritasyasoma emyatsi eyiri omo katabu ako, muryaleka inatasyikirirya ekyo kyo kutsibu.” N’abandi babiribana endundi omw’itasyasoma ekitabu Je, Kuna Muumba Anayekujali? Wanganabya iwabirisoma ebitsapo ebi, neryo ibwa wamalangira ghuti eritasyasomabyo?

⁹ Omo programe yaghu y’eriyighisya wanganatasyigha emyatsi eyikakanganaya ngoko oMungu ane. Emyatsi eyo ukendikwesa-kwesa ikendikuwatikya erikirirya kundu ngoko Yehova ane, aliwe kandi ikendikuwatikya eriminya emibere yiwe yo ndeke. (Rom. 1:20) N’ekindi, emyatsi eyo ikendileka iwatoka eriwatikya abandi abakatika-tika oMungu ng’ane. Enzumwa y’eno: Yehova abirikangania ngoko yo Muhangyiki erilabira ebindu bingyi ebyo ahangyika.

Nebula: IAC/​RGO/​David Malin Images; esamaki n’omutoka: Mercedes-Benz USA; erisu (e avion): Kristen Bartlett/​University of Florida

YEHOVA YO WAHANDIKISAYA EBIBLIA

10. Busanaki eBiblia ky’ekitabu ky’omughaso munene omo ngebe yetu? (2 Timoteo 3:16, 17)

¹⁰ Soma 2 Timoteo 3:16, 17. EBiblia ni mulaghe ogho Yehova atumira abandu. Ikasubiraya oko mabulyo w’omughaso agho tukayibulaya omo ngebe, kandi ikatuwatikaya eriminya erisonda rya Yehova n’ebyo anzire itwakola. Twikirirye ngoko Yehova yo wahandikisaya eBiblia. Busana n’ekyo, eBiblia ky’ekitabu ky’omughaso munene omo ngebe yetu. Twanzire erikola ekyosi-kyosi ekyo twangatoka tutoke eryowa ebyo tukasoma omo Biblia n’erikolesyabyo.

11. Busanaki wikirirye ngoko oMungu yo wahandikisaya eBiblia?

¹¹ Hane myatsi mingyi eyikaleka itwikirirya ngoko Yehova yo wahandikisaya eBiblia. Ni myatsi yahi? Ebyo eBiblia ikabugha oko myatsi ya kera ni by’ekwenene. (Luka 3:1, 2) Kandi omughulu ikakanaya oko kihugho ekyo twikereko, ebyo ikabugha bikabya by’ekwenene. (Yobu 26:7) N’ekindi, eBiblia ni kitabu ekikaswekaya kundi nomo Sitani abirikola ekyosi-kyosi eribuliraniayo, eBiblia ky’ekitabu ekyabirisomwa kutsibu kandi ekiri omo mibughe mingyi. EBiblia yahandikawa n’abalume nga 40, omo myaka nga 1 600; nomo bine bitya, ebyo bahandika bihambene. Nomo eBiblia yahandikawa kera, amahano awali muyo anemuwatikya amamilioni w’abandu munabwire. (Misyo 13:20; 15:21; Mat. 7:12) Oghundi mwatsi owakaleka eBiblia iyabya kitabu ky’eriyiketerwa ni kundi amaminyereri mangyi awali muyo abiribererera. (Yos. 23:14) Oko kwenene, oMungu yo wahandikisaya eBiblia!

12. Twamabitsuka eritika-tika oMungu nga yo wanahandikisaya eBiblia, litolere itwakolaki?

¹² Twamabitsuka eritika-tika oMungu nga yo wanahandikisaya eBiblia, litolere itwakolaki ? Litolere itwahira omwatsi oyo omo musabe n’erikola erikwamana n’omusabe wetu. Tukanaye oko ky’erileberyako kya mughala wetu oyukine mulwana, oyukahulawa mo Jordan. Mwakulira omo kihanda ky’Abimiri ba Yehova. Akabugha ati: “Sindikiriraya emyatsi kundi tu ababuti baghe kutse abandi bandu mubakabugha bati ni y’ekwenene. Ngayikasa eriyitsopolerya emyatsi ingyuwene-wene. Oko kwenene, hakanayira inatika-tika. Aliwe omughulu ekyo kikanihikira, ngayikasa erikwesa-kwesa emyatsi omo bitsapo byetu nitoke eribana ebisubiryo oko myatsi eyikaleka inatika-tika, neryo eritika-tika ryaghe iryahwa.” Omughulu tukayikasa erikirirya kundu ngoko Yehova yo wahandikisaya eBiblia, aho tukabya itwamawatya efondasyo y’obwikirirya bwetu.​—1 Kor. 3:12, 13.

YEHOVA ANEMUKOLESYA ENDONDEKA YIWE MUNABWIRE

13. Twamabitsuka eritika-tika Abimiri ba Yehova nga ni nabo endondeka eyo oMungu anemukolesya munabwire, litolere itwakolaki?

¹³ Twamabitsuka eritika-tika Abimiri ba Yehova nga ni nabo endondeka eyo Yehova anemukolesya munabwire, isitwalighira eritika-tika eryo erilola embere. Omo mwanya w’ekyo amabulyo ano awakwamire anganatuwatikya eritenditasyatika-tika: ‘Ni bahi bo banemuyikasa eriyighendya ngoko eBiblia ikabugha? Ni bahi abanemuyikasa erihambania amakangirirya wabo n’ebyo eBiblia ikabugha?’ (2 Tim. 4:3, 4) ‘Munabwire, ni bahi bo banemuyikasa erikola erisonda rya Yehova?’​—Mat. 7:20, 21.

14. Abimiri ba Yehova babiriberererya bati erisako rye Matayo 24:14?

¹⁴ OMungu anzire abandu b’ehosi-hosi ibowa engulu mbuya embere abugheho ekihugho kibi kino. Neryo twanganayibulya tuti, ‘Munabwire, ni bahi bo banemutulaghania engulu mbuya eyo?’ (Mat. 24:14) Ekisubiryo kilangirikire ndeke-ndeke. OMungu anemukolesya abandu biwe, Abimiri ba Yehova, erikola omubiiri w’eritula engulu mbuya. Abanemutula engulu mbuya y’Obwami bw’oMungu omo bihugho ebilabire oko 240 n’itwe basa, itwe Bimiri ba Yehova. Erilua omughulu Obwami bw’oMungu bwatsuka eritabala, twamabikola omubiiri oyu omo emyaka eyilabire oko 100. Omubiiri w’erihubirya n’ow’erikangirirya wo bandu b’oMungu bakahira embere omo ngebe yabo.​—Mat. 28:19, 20.

15. Munabwire, Abimiri ba Yehova banemupipa bati erina ry’oMungu? (Matayo 6:9; Isaya 43:10)

¹⁵ Soma Matayo 6:9 na Isaya 43:10. Tukahulawa omo rina ry’oMungu, Yehova. N’olo ni lusunzo lunene eryahulwa mo Abimiri ba Yehova. Abandu bangyi omo kihugho nomo sibatsomene erina eryo, itwe twabirisubyaryo omo mwanya waryo omo Biblia aho litolere iryabya. Rikabanika omo EBiblia​—Embindula y’ekihugho kihya-kihya mo ngendo nyingyi oko 7 000.

16. Busanaki twanganabugha tuti Abimiri ba Yehova banemusikya ekyalayiro ekiri omo Yohana 13:34, 35? (Ulebaye n’epitsa.)

¹⁶ Soma Yohana 13:34, 35. Munabwire, omo kihugho abandu bangyi baponene kandi baghabene. Aliwe itwe Bimiri ba Yehova twanzene kandi tuli omo bughuma. Oko kwenene, ekyo ni kitiko-tiko kundi tukasira omo biharo mbiriri-mbiriri kandi sitwakulira omo mibere mighumerera. Aliwe nomo bine bitya, tukayikasa eryanzana n’eribya omo buholo. Wanabirihindana omo yindi ndeko y’omo kindi kiharo? Byamabya iko biri bitya, ahate eritika-tika wabiriyilangirira ngoko abaghala n’abali betu ehosi-hosi eyo bangabya, bakanzana n’eribya omo bughuma. Eki kikakanganaya ndeke-ndeke ngoko oko kwenene Yehova anemukolesya Abimiri biwe erikola erisonda riwe munabwire. Eribya itunibukire eki, kikendituwatikya erisighala bataleghula oko Yehova omughulu obwikirirya bwetu bwamalengwako.

ISIWANATALEKA ERIKOLERA YEHOVA

17-18. Twanganahikirwa n’emyatsi yahi eyikalire, aliwe twanganabugha tutiki butsir’itika-tika?

¹⁷ Ebiro by’enduli y’ekihugho kibi kino bikaleka emyatsi iyatukala-kalako. (2 Tim. 3:1, 13) Eritomeka okw’ekyo, twanganahikirwa n’eyindi myatsi eyangaleka itwahangya-hangya. Ng’eky’erileberyako, endondeka y’oMungu yanganasoha emyatsi, aliwe ikyatukalako eryowayo kutse erikwamayo. Kutse kyanganahika omughala kutse mwali wetu iniatwowa muhanda kutse iniatubuna mutima. Kyanganatukalako erisoha olubanza lulebe, kutse itutaminya ekikaleka omwatsi mulebe iniatuhikira.

¹⁸ Emyatsi ng’eyi yanganaleka itwahangya-hangya kutse itwayowa muhanda. Aliwe nomo bine bitya, twanganalola embere eribya bataleghula oko Yehova twamabikirirya ngoko Yehova yo Muhangyiki, ngoko eBiblia ni Kinywa kiwe, kandi ngoko Abimiri ba Yehova ni bandu biwe. Ngoko Petro anabwira Yesu, netu itwanganabwira Yehova tuti: “Tukendighenda okundi? Iwe, uwite ebinywa by’engebe y’erikota.”