Amabulyo erilua oko basomi betu

Ebihanda bikendisyabugha mughulu wahi biti “hamabibya obuholo n’embolere”?

Ngoko twanalangira omo katswe “Amabulyo erilua oko basomi betu” omo Akaleberyoa ka lino-lino, hano sesene Yehova akendihira omo mitima ‘y’amahembe ikumi’ (amatabali wosi) “mw’amalengekania w’erikola ekyo anzire.” Amalengekania ayo ly’erihererya obutoki n’ehamuli yagho “enyama y’omoli y’erangyi y’omusasi eyihenirye” ni bugha ambu ekitunga ky’Obughuma bw’Ebihanda. Enyama eyi ikatasyahulawa mo “sanamu y’enyama y’omoli.” (Erib. 13:14, 15; 17:3, 16, 17) Neryo “amahembe ikumi” haghuma n’enyama y’omoli eyikendisyabya iyamabihabwa obutoki bikendisyalusya omo kihugho kyosi mw’ebisomo by’amabehi. Neryo, ebihanda bikendisyabugha biti “hamabibya obuholo n’embolere”b embere kutse enyuma ebisomo byʼamabehi bitoghotibawe​—1 Tes. 5:3.

Oko kwenene, sitwasi ndeke-ndeke nga ni mughulu wahi ebihanda bikendisyatulagho biti “hamabibya obuholo n’embolere.” Tulue twasi emyatsi yosi nga ikendisyabya yiti, ngambe situlaghire okw’iteya n’eribya itunalolire. Omo mwanya w’ekyo, Yesu mwahana abigha bo kangyi-kangyi ati: “Mubye imunateghirye.” (Mat. 24:42; 25:13; 26:41) Neryo tutsopolaye obuminyereri obo omukwenda Paulo akasondolwa n’ekirimu kibuyirire ahira omo baruha eyo ahandikira Abanya Tesalonika.

Paulo mwahandika ati: “Omughulu bakendisyabugha bati: ‘Hamabibya obuholo n’embolere!’ neryo bakendisyalw’ibatoghotibwa aho n’aho.” (1 Tes. 5:2, 3) Kangyi-kangyi ebitsapo byetu ko byabiribugha bitya oko binywa bya Paulo: Ebihanda bikendisyatulaghania ngoko “hamabibya obuholo n’embolere” mughulu muke embere eryaghalwa rinene ritsuka. Eryaghalwa rinene eryo rikendisyatsuka n’eritoghotibwa lya Babiloni Mukulu, ni bugha ambu ebisomo by’amabehi by’ekihugho kyosi. Kandi ebitabu byetu byabiribugha kangyi-kangyi biti eritulaghania eri lyo rikendisyakangania ngoko eryaghalwa rinene rikisiya iryatsuka.

Aliwe enyuma w’eritsopolya ndeke, alinga hane n’eyindi nzira ngoko obuminyereri obu bwangabererera. Ebihanda byanganasyabugha biti “hamabibya obuholo n’embolere” enyuma w’eritoghotibwa ly’ebisomo by’amabehi. Busanaki itwabugha tutya? Busana n’ebisubiryo by’oko mabulyo awali ahikwa hano.

Ebisomo by’amabehi byabirisangira biti oko myatsi y’amalwa? EBiblia ikabugha yiti: “Omusasi w’abosi . . . abitibawa oko kihugho mwasungika omw’iwe [“omumbalaka mukulu,” Babiloni Mukulu].” (Erib. 17:1, 5; 18:24) Eritsuka kera, ebisomo by’amabehi byabirisighika amalwa, obwiti nibya n’eriita amamilioni w’abandu. Neryo ebisomo by’amabehi byabirileta omo kihugho mw’amalwa n’obwiti, omo mwanya w’eriletamo obuholo n’embolere. Neryo ekyo kyamaleta eribulyo lino: Mbino ebihanda bikendisyatsuka eritoghotya Babiloni Mukulu imo byabugha biti “hamabibya obuholo n’embolere”? Ekyo kinatokekene, aliwe sitwangalw’itwabugha tuti ko bikendisyabya bitya.

Enyuma w’ebihanda eritulaghania biti “hamabibya obuholo n’embolere,” ekikendisyakwama niki? Paulo mwabugha ati: “Neryo bakendisyalw’ibatoghotibwa aho n’aho.” (1 Tes. 5:3) E note d’etude y’Embindula y’ekihugho kihya-kihya y’Ekingereza ikabugha bino oko mulondo oyu: “Hano Paulo akakanganaya ngoko hakendisyabya katambi kake kutse nibya ihatabya n’akatambi omo kati-kati k’omughulu w’eritulaghania ‘obuholo n’embolere’ n’eritoghotibwa erikendisyahika oko bakendisyatulaghania omwatsi oyo. Eritoghotibwa eryo likendisyabya ly’ekitsumbukirania kandi sihendisyabya oyukabala.” Abatabali b’ekihugho bamabisyatulaghania bati “hamabibya obuholo n’embolere” enyuma w’eritoghotibwa ly’ebisomo by’amabehi, eryo kwesi eritoghotibwa ly’ebihanda byosi ebyo irikendisyakwamako omw’itsumbukania.

Abandu ba Yehova bakendisyayiwata bati bakalangira emyatsi eyo ikabererera? Paulo ati: “Baghala betu, inywe simuli omo mwirima. Neryo ekiro ekyo sikyendisyabasisirya ngoko ekyakakala kikasisiraya abibi.” (1 Tes. 5:4) Terilengekania oko kino: Eritulaghanibwa ‘ly’obuholo n’embolere’ lyamasyabya enyuma w’eriheribwa ry’ebisomo by’amabehi, abandu ba Yehova ibakendisyalw’ibaminya ngoko hakisiya hake ebihanda ibyatoghotibwa. Aliwe oko bihanda, eritoghotibwa eryo rikendisyasa ng’omwibi​—rikendisyatsumbukaniabyo, isibyasi.

Neryo tulindirireki? Hano sesene, “amahembe ikumi” haghuma n’enyama y’omoli eyikendihabwa obutoki bunene, bikenditoghotya ebisomo by’amabehi. Eyo y’enzuko y’eryaghalwa rinene. Kandi tunasi ngoko endambi ikendihika, ebihanda ibyabugha biti “hamabibya obuholo n’embolere.” Ekyo kikendisyabya mughulu wahi? Eritulaghania ly’obuholo n’embolere lyanganasyabya embere ebisomo byʼamabehi bitoghotibawe. Aliwe na kino kinatokekene: Eritulaghania eryo lyanganasyabya amatabali abitoghotya ndeke-ndeke ebisomo byʼamabehi. Tukendisyaminya ndeke-ndeke bikabererera, tuhange awabiri. Kangyi-kangyi tukowa ndeke obuminyereri bw’eBiblia bukabererera kutse bwabibererera.​—Lebaya n’omo Yohana 12:16.

Omwatsi mukulu lino siry’eriminya endambi eyo ebihanda bikendisyabughirako biti “hamabibya obuholo n’embolere.” Iyehe; omwatsi mukulu ly’eritendileghula oko Mungu. “Isitwaghotsera.” Omo mwanya w’ekyo, “tuteghaye n’eriteya obwenge bwetu,” neryo itwabya itunayiteghekire oko myatsi eyikisiya iyahika, nomo yangahika omo nzira eyiri yiti.​—1 Tes. 5:6.