Wighe eryubaha oMungu, nga Obadia

Obadia abya muhanganiri w’enyumba y’omwami mubi ye Ahabu. Ahabu mwalighira abandu erikanyirirya eriramya esyosanamu omo Israeli. Nomo bine, “erilua omo bulwana,” Obadia iniasaghire oMungu. (1 Ab. 18:1-13) Neryo omughulu Omughole Yezebeli alayira ati abaminyereri bosi ba Yehova bitawe, Obadia mwabya mutubaha, amakola omwatsi mulebe sibitawe. Eribisa omunyereri mughuma, ikikahira engebe y’omo bwiko; aliwe ibwa iye mwabisa abaminyereri 100 kandi amabya akahabo akalyo nomo oko mughulu oyo omo kihugho ekyo mwabya enzala eyikalire kutsibu! Oyo syabya mwatsi mwolo. Kundi omo kihugho mwabya amamia w’abaminyereri b’amabehi ababya bakakolera omwami n’omughole wiwe, neryo ibanganafumbula Obadia.​—1 Ab. 18:19.

Eky’erileberyako ky’omulume oyu, oyo wabya akubaha oMungu kyangatwighisyaki? Nomo Obadia abya asaghire Ahabu, abya akubaha oMungu kwilaba eryubaha Ahabu. Ekyo mukyaleka iniahira engebe yiwe y’omo bwiko atoke eriteya abaghala babo. Netu litolere itubaha oMungu yo kutsibu, kutsibu-tsibu omughulu eriramya lyetu lyamaghanisibwa eyo twikere. Ekyo ikikendileka itwabya n’akaghala k’eriwatikya balikyetu abali omo maligho.