Amabulyo erilua oko basomi betu
Ni “malengekania” wahi wo Yehova akendihira omo mitima y’abatabali mo lino-lino?
Oko mwatsi w’eritsuka ly’eryaghalwa rinene, Eribisulirwa 17:16, 17 ikabugha yiti: “N’amahembe ikumi agho ulyalangira, n’enyama y’omoli bikendisyapona omumbalaka oyo n’erimya ebindu biwe byosi, n’erimuyira ndumbu. Bikendisyalya omubiri wiwe, n’erimutimya iniahwererera. Bikendisyakola bitya kundi oMungu abirihira omo mutima wabyo mw’amalengekania w’erikola ekyo anzire, ni bugha ambu, ekyo nabo banzire erikola omwiha obwami bwabo enyama y’omoli.” Ebitsapo byetu ibikabugha biti “amalengekania” agho Yehova akendisyahira omo mitima y’abatabali ry’eritoghotya ebisomo by’amabehi.
Aliwe, litolere ihabya embinduka. “Amalengekania” agho Yehova akendihira omo mitima y’abatabali ry’eriha “obwami bwabo enyama y’omoli.” Eriminya omwatsi oyo ng’akendiberera ati, tusubiraye oko mabulyo owakwamire.
Ni bahi bo bakanibweko omo buminyereri obu? “Omumbalaka,” akatasyahulawa mo “Babiloni Mukulu.” Omumbalaka oyu akasosekanaya ebisomo byosi by’amabehi. “Enyama y’omoli y’erangyi y’omusasi eyihena-henirye” ikasosekanaya ekitunga ekikalandamirira obuholo ekyatsuka oko 1919, ikikahulawa mo Ekitunga ky’Ebihanda, lino kikahulawa mo Obughuma bw’Ebihanda. (Erib. 17:3-5) “Amahembe ikumi” akasosekanaya amatabali wosi awakawatikaya enyama y’omoli.
Hane obwira omo kati-kati k’omumbalaka n’enyama y’omoli y’erangyi y’omusasi eyihenirye? Omumbalaka abya “ikere oko” nyama y’omoli, ekyo ni bugha ambu, akawatikaya enyama eyo n’erisonda erisondolayo kutse eritabalayo.
Ni myatsi yahi yo ikendihikira omumbalaka? Enyama y’omoli n’amahembe ikumi awakawatikayayo, “bikendipona omumbalaka.” Neryo bikendihunga obuteke bwiwe bosi n’erikangya obubi bwiwe. Kandi bakendiberererya ebyo Yehova abiriyisogha erikola, ni bugha ambu eritoghotya omumbalaka oyo. (Erib. 17:1; 18:8) Eki kikendibya kyakoleka, ebisomo byosi by’amabehi bikendihwaho. Aliwe embere omwatsi oyo akoleke, Yehova akendikuna ebihanda erikola omwatsi ogho abatabali b’ekihugho batebatakola.
Yehova akendikuna ebihanda erikolaki? Akendihira “amalengekania” wiwe omo mitima y’amahembe ikumi, ni bugha ambu eriha “enyama y’omoli [y’erangyi y’omusasi eyihena-henirye] y’obutoki, n’akaghala kabo.” Enyama eyo ikasosekanaya Obughuma bw’Ebihanda. (Erib. 17:13) Ukalengekanaya uti ekyo kikamaanisayaki? Amatabali w’abandu anemwendiyisogha omw’anza lyagho eriha akaghala kagho n’obutoki bwagho enyama y’omoli? Iyehe! Obuminyereri bukakanganaya ngoko oMungu yukendikuna amatabali erikola atya. (Misyo 21:1; tasyalebya ne Isaya 44:28.) Banemwendiha enyama y’omoli y’akaghala kabo kika kwa kika? Iyehe! Kitokekene ekyo kikendibya kitsumbukirania. Neryo enyama y’omuli ikendibya yabihabwa obutoki, ikenditoghotya olosi ebisomo byosi by’amabehi.
Neryo kwesi, tulindirireki omo biro ebikasa ebiri hakuhi? Isitwalindirira tuti amatabali w’ekihugho akendighenda akawatikya kutsibu kika kwa kika Obughuma bw’Ebihanda. Aliwe, ekyo tutolere itwalindirira kya kino: Kitsumbukirania, Yehova akendikuna amatabali w’ekihugho eriha obughuma bwʼebihanda obutoki bwagho. Ekyo kikendibya kyakoleka, ngambe itwaminya ngoko eryaghalwa rinene rikisiya iryatsuka. Neryo tukalindirira ekyo, “isitwaghotsera ng’abandi. Aliwe, tuteghaye n’eriteya obwenge bwetu” kusangwa hano ho lino-lino emyatsi yikendibinduka kitsumbukirania!—1 Tes. 5:6.