Watikaya omwigha waghu w’eBiblia ayisoghe erikolera Yehova

1-2. (a) Busanaki abigha balebe b’eBiblia bakasagha eriyisogha erikolera Yehova? (b) Tukendikania okuki omo mwatsi ono?

HANE emyatsi eyikaleka iwatika-tika eribya Mwimiri wa Yehova? Kwa muhwa, unemusagha uti abo ukakola nabo omubiiri, abira baghu kutse ab’omo kihanda kyaghu banganakupona busana n’eribya Mwimiri wa Yehova. Kutse unemusagha uti siwangatoka erisikya ebyalayiro by’oMungu. Naghu wamabya ighukalengekanaye omo nzira eyo, wamabiminya ngoko abigha balebe b’eBiblia bakayowa kandi busanaki kikabakalako eriyisogha eribya Bimiri ba Yehova.

² Yesu mwaminya ngoko emyatsi eyiri ng’eyo yanganakakirya omundu erikolera Yehova. (Mat. 13:20-22) Aliwe, mwalola embere eriwatikya ababya bakatika-tika erimukwama. Omo mwanya w’ekyo, mwakangania abigha biwe ngoko bangawatikya abandu abalingabo, (1) eriminya ebikabakakiraya erimukwama, (2) erikulya olwanzo lwabo oko Yehova, (3) erihira Yehova y’embere omo ngebe yabo, na (4) mwakangiriryabo ebyo bangakola abandi bamabighalyabo. Twangakolesya tuti ebyo Yesu akangiriraya abigha biwe omughulu tunemukolesya ekitabu Tsemera engebe kera na kera! tukawatikya abigha betu b’eBiblia bayisoghe erikolera Yehova?

WATIKAYA OMWIGHA WAGHU W’EBIBLIA ERIMINYA EBIKAMUKAKIRAYA ERIKOLERA YEHOVA

3. Alinga ni kyahi ekyakakiraya Nikodemu eribya mwigha wa Yesu?

³ Nikodemu abya musondoli mukulu w’Abayahudi. Aliwe ihane myatsi eyikamukakiraya erikwama Yesu. Yesu abere abitulira hakuhi omo misi 6 misa, Nikodemu mwaminya ngoko Yesu yo wabya Masiya. (Yoh. 3:1, 2) Aliwe, Nikodemu mwayisogha eriyabana Yesu omo bubiso-biso busana n’“eryubaha Abayahudi.” (Yoh. 7:13; 12:42) Alinga mwalengekania ati akendiherya emyatsi mingyi amabiyisogha eribya mwigha wa Yesu.a

4. Yesu mwawatikya ati Nikodemu atoke eriminya ebyo oMungu anzire iniakola?

⁴ Nikodemu abya asi kutsibu Emighambo ya Musa, aliwe abya atolere eriwatikibwa atoke eriminya ebyo Yehova anzire iniakoka. Yesu mwamuwatikya ati? Yesu abya ayiteghekire erilabya endambi haghuma na Nikodemu, nibya nomo kiro. Kandi Yesu mwabwira Nikodemu butsir’ibisa ebyo atolere erikola atoke eribya mwigha wiwe, ni bugha ambu erighungama amalolo wiwe, eribatisibwa omo maghetse n’erikirirya mughala w’oMungu.—Yoh. 3:5, 14-21.

5. Wangawatikya ghuti omwigha waghu w’eBiblia atoke eriminya ebikamukakiraya erikolera Yehova?

⁵ Nomo omwigha wetu w’eBiblia anganabya inianasi ndeke Amasako, litolere itwamuwatikya eriminya ebyangamukakirya erikolera Yehova. Ng’eky’erileberyako, omubiiri wiwe anganabya iniakamulira endambi nene kutse ab’omo kihanda kiwe banganabya isibanzire iniabya Mwimiri wa Yehova. Neryo nga Yesu, ubye ukalabya naye endambi ukamuwatikya. Mwanganalendera haghuma naye kutse iwamubirikira eka waghu oko kalyo. Wamabya ukakola utya, kwa muhwa, anganakubwira ebyo anemulabamo, neryo naghu iwanganatoka erimuwatikya. Watikaya omwigha waghu w’eBiblia eriminya esyombinduka esyo atolere erikola n’erimwibukya ngoko akakola esyombinduka esyo kundi anzire eritsemesya Yehova butsir’iwe.

6. Wangawatikya ghuti omwigha waghu w’eBiblia erikolesya ebyo anemwigha? (1 Abanya Korinto 16:13)

⁶ Omughulu omwigha waghu w’eBiblia ayiketere ngoko Yehova akendimuwatikya erikola ebyuwene, ekyo kikendimuha akaghala k’erikolesya ebyo anemwigha. (Soma 1 Abanya Korinto 16:13.) Twanganasosekania omubiiri waghu ng’ow’omughalima w’akalasi. Terilengekania omughulu wabya ekalasi; ighukanza omughalima oyuli ati? Kwa muhwa, ighukatsemera omughalima oyo wabya akakukangania ngoko unawite obutoki bulebe bw’erikola emyatsi. Kutya, n’omukangirirya mubuya w’eBiblia, syalibwira lisa ebyo omwigha wiwe atolere iniakola, aliwe kutya akamukanganaya ngoko Yehova anganamuwatikya erikola esyombinduka esyo atolere iniakola omo ngebe yiwe. Wangakola ekyo kyo ghuti?

WATIKAYA OMWIGHA WAGHU W’EBIBLIA ERIKULYA OLWANZO LWIWE OKO YEHOVA

7. Yesu mwawatikya ati abahulikiriri biwe erikulya olwanzo lwabo oko Yehova?

⁷ Yesu abya asi ngoko eryanza oMungu kyanganakuna abigha biwe erikolesya ebyo banemwigha. Kangyi-kangyi, iniakakangiriraya abigha biwe ebyangabawatikya erikulya olwanzo lwabo oko Tata wabo w’elubula. Ng’eky’erileberyako, mwasosekania Yehova n’omulume oyukaha abana biwe b’emyatsi mibuya. (Mat. 7:9-11) Abaghuma b’oko bahulikiriri biwe, alinga sibabya n’abo baba ababya bakabakangania olwanzo. Terilengekania abahulikiriri biwe nga mubayowa bati omughulu Yesu akanirayabo oko musyo wa baba w’olwanzo oyo akokaya mughala wiwe oyo wabya iniabirikola emyatsi mingyi eyituwene. Yesu mwawatikya abandu abo erilangira ngoko Yehova abanzire kutsibu kandi anzire eribawatikya.—Luka 15:20-24.

8. Wangawatikya ghuti omwigha waghu erikulya olwanzo lwiwe oko Yehova?

⁸ Naghu kutya, wanganawatikya omwigha waghu w’eBiblia erikulya olwanzo lwiwe oko Yehova omw’ihira omuwato oko mibere eyuwene y’oMungu ukamukangirirya. Omughulu mukigha n’omwigha waghu ubye ukamuwatikya erilangira ngoko ebyo anemwigha nga bikakanganaya biti ngoko Yehova atwanzire. Omughulu mukakanaya oko mbanulo watikaya omwigha waghu eriminya ngoko Yehova mwatateka embanulo kundi anzire abandu bosi lisa, aliwe mwatekayo kundi amwanzire iye. (Rom. 5:8; 1 Yoh. 4:10) Omughulu omwigha akaminya ngoko Yehova amwanzire kutsibu, ekyo kikamuwatikaya eritasyanza Yehova yo kutsibu.—Gal. 2:20.

9. Ekyawatikaya Michael eribindula engebe yiwe niki?

⁹ Tukanaye oko Michael owe Endonezi. Mwakulira omo kwenene, aliwe mwatabatisibwa luba. Omughulu abya n’emyaka 18, mwahumira omo kindi kihugho busana n’omubiiri wiwe w’eryendya omutoka. Aho nyuma, mwalunga, aliwe mwasigha ekihanda kiwe e Endonezi, amasuba omo kihugho ekyo abya akakolera mo. Mwabya hali oko mukali wiwe n’omumbesa wiwe. Iniane eyo, omukali wiwe n’omumbesa wiwe mubatsuka erigha eBiblia n’erikolesya ebyo babya bakigha. Mama wiwe abere abihola, Michael mwayisogha erisuba eka wabo atoke erisulubirira tata wiwe, kandi mwaligha erigha eBiblia. Bakigha esomo 27 y’ekitabu Tsemera engebe kera na kera! omo katsweka “Wighe bingyi,” ebyo igha mubyatula kutsibu oko mutima wiwe. Akalengekania ngoko Yehova abya akayowa omughulu Yesu, Omughala wiwe abya akaghalwa, Michael mwatsuka erilira. Abere abiminya ngoko Yehova na Yesu bamwanzire kutsibu, mwasima kutsibu, amakola esyombinduka omo ngebe yiwe n’eribatisibwa.

WATIKAYA OMWIGHA WAGHU ERIHIRA YEHOVA Y’EMBERE OMO NGEBE YIWE

10. Yesu mwawatikya ati abigha biwe erikola esyombindula batoke erikolera Yehova? (Luka 5:5-11) (Ulebaye n’epitsa.)

¹⁰ Abigha b’erimbere mubalw’ibaminya ngoko Yesu yo wabya Masiya oyo alaghawa, aliwe babya batolere eriwatikibwa eriminya ngoko batolere eribya n’omuhwa w’eritula engulu mbuya. Embere Yesu abwire Petro na Andrea ati bamukwame mughulu wosi, babya ibabiribya bigha oko mughulu mulebe. (Mat. 4:18, 19) Babya bakasoha esyosamaki haghuma na Yakobo na Yohana, n’omubiiri wabo oyo abya iniakaleka ibabana esyofranga nene. (Mar. 1:16-20) Aliwe Petro na Andrea “mubalw’ibasigha amatimba wabo,” n’erikwama Yesu mughulu wosi. Omughulu bakola batya, sibangabya imubabula erikola omwatsi mulebe owangawatikirye erisulubirira ebihanda byabo bakakwama Yesu. Ni kyahi ekyabawatikaya erilangira omubiiri w’eritulira mo w’omughaso kulenga eribana esyofranga nene? Ekitabu kya Luka kikakanganaya ekitiko-tiko ekyo Yesu akola eriwatya obwikirirya bwabo omo butoki bwa Yehova bw’erihabo ebyo balaghireko.—Soma Luka 5:5-11.

11. Twanganabwiraki omwigha wetu w’eBiblia eriwatya obwikirirya bwiwe?

¹¹ Sitwangakola ebitiko-tiko nga Yesu, aliwe twanganakanirya abandi oko bandu abo Yehova awatikaya busana n’erimuhira embere omo ngebe yabo. Ng’eky’erileberyako, ukinibukire ngoko Yehova akuwatikaya omughulu watsuka erihindana haghuma netu? Kwa muhwa, muwakania n’omukulu waghu w’omubiiri ngoko siwendibya ukakola enyuma sy’endambi y’omubiiri ekiro ky’emihindano. Ukakania n’omwigha waghu w’eBiblia, mukanganaye ngoko obwikirirya bwaghu mubwawata kutsibu wabilangira ngoko Yehova akuwatikaya busana n’erihira eriramya liwe ry’embere omo ngebe yaghu.

12. (a) Busanaki tutolere eribya tukaghenda n’abaghala n’abali betu mbiriri-mbiriri tukayasondola efunzo? (b) Ni kindi kyahi ekyo wangakolesya eriwatikya omwigha waghu erihira Yehova y’embere? Teka eky’erileberyako.

¹² Kandi kyuwene oko baghala n’abali betu eribya bakakanirya omwigha waghu oko myatsi eyo bakola batoke erihira Yehova y’embere omo ngebe yabo. Neryo ubye ukaghenda n’abaghala n’abali betu mbiriri-mbiriri eriyasondola efunzo. Ubwirebo uti bakaniraye omwigha waghu ngoko babana ekwenene n’ebyo bakola batoke erihira Yehova y’embere omo ngebe yabo. Kandi mubye mukakwama haghuma n’omwigha waghu esyovideo sy’omo kitswe “Wighe bingyi” kutse sy’omo kitswe “Ebindi eby’eriminya” esiri omo kitabu Tsemera engebe kera na kera! Ng’eky’erileberyako, omughulu mukigha esomo 37 n’erikwama evideo Yehova akendituha ebyo tulaghireko, mukaniranaye oko video eyo, kandi watikaya omwigha waghu erilangira ngoko Yehova akendisyamuwatikya amabimuhira embere omo ngebe yiwe.

WATIKAYA OMWIGHA WAGHU ERIMINYA EBYO ANGAKOLA BAMABIMWAGHALYA

13. Yesu mwateghekania ati abigha biwe okw’ighalibwa?

¹³ Yesu iniabeghere eribwira abigha biwe ati bakendisyaghalibwa n’abandi, nibya n’abatunga babo. (Mat. 5:11; 10:22, 36) Mughulu muke embere Yesu ahole, mwabwira abigha biwe ngoko banganasy’itibwa busana n’eriramya Yehova. (Mat. 24:9; Yoh. 15:20; 16:2) Mwasababo eriyilandeko omughulu bane omo mubiiri w’eritulira. Ng’eky’erileberyako, mwahanabo ati isibakuba obuhaka n’omundu oyukabugha muhanda oko ebyo bikirirye, kandi ati babye bakalebya ndeke ebyo bakasonda eribugha n’erikola.

14. Twangawatikya tuti omwigha wetu eribya inianayiteghekire okw’ighalibwa? (2 Timoteo 3:12)

¹⁴ Nga Yesu, twanganakangania omwigha wetu ebyo abaghuma b’oko abo akakola nabo omubiiri, abira biwe, kutse abatunga biwe banganamubughako kutse ebyo banganamukolera busana n’erigha eBiblia. (Soma 2 Timoteo 3:12.) Abaghuma b’oko abo akakola nabo mubiiri banganamusekererya kundi anemuyikasa erikolesya ebyo akigha omo Biblia. Abandi, nibya n’abatunga biwe ba hakuhi, banganaghana erilighirana naye oko ebyo anemwigha omo Biblia. Twamabiteghekania luba abigha betu okw’ighalibwa, ekyo ikikendisyabawatikya erilwa ndeke n’amaligho ayo.

15. Ekyangawatikya omwigha w’eBiblia eriyiyina abatunga biwe bamabimwaghalya niki?

¹⁵ Omwigha waghu amabighalibwa n’abatunga biwe, umuwatikaye erilengekania nga ni busanaki bakahitana akigha eBiblia haghuma n’Abimiri ba Yehova. Kwa muhwa, abatunga biwe bakalengekanaya bati Abimiri ba Yehova bakakangiriraya amabehi kutse bati ni bandu babi. Nibya n’abaghuma b’omo kihanda kya Yesu mubapona ebyo abya akalola. (Mar. 3:21; Yoh. 7:5) Ukangiriraye omwigha waghu eribya n’omutima w’erilindirira kandi abye akakania ndeke n’abatunga biwe n’abandi bandu.

16. Twangawatikya tuti omwigha w’eBiblia erikania oko bwikirirya bwiwe omo nzira y’amenge?

¹⁶ Nibya n’omughulu abatunga bamanza eriminya bingyi oko Biblia, omwigha syatolere erilw’iniabwirabo emyatsi mingyi. Amabikola atya, abatunga biwe ibanganaluha, n’ekyo ikyanganaleka ibatanza eritasyakania naye oko ebyo ikirirye. Neryo watikaya omwigha waghu erikania oko bwikirirya bwiwe omo nzira eyangaleka ibanza eritasyamuhulikirira ekindi kiro. (Kol. 4:6) Kwa muhwa, anganasaba abatunga biwe eriya oko site yetu ye jw.org. Ekyo kyanganabawatikya eriminya bingyi oko Bimiri ba Yehova oko ndambi yosi-yosi eyo banzire, kandi banganasombola nga bakendisoma bingahi.

17. Twangabegherya tuti omwigha wetu erisubirya oko mabulyo agho banganamubulya oko Bimiri ba Yehova? (Ulebaye n’epitsa.)

¹⁷ Wanganakolesya emyatsi eyiri oko jw.org omo kitswe “Ebyo bandu babeghere eribulya oko Bimiri ba Yehova” eriwatikya omwigha waghu atoke eriteghekania ebisubiryo oko mabulyo agho abatunga biwe n’abo akakola nabo banganamubulya. (2 Tim. 2:24, 25) N’oko mwiso w’obuli somo, mukaniranaye oko katswe “Abandu balebe bakabugha bati” akali omo kitabu Tsemera engebe kera na kera! Watikaya omwigha waghu abughe omo binywa biwe ngoko angakanirya omundu ebyo ikirirye. Isiwatika-tika eriha omwigha waghu y’amahano awangamuwatikya eryuwania ebisubiryo biwe. Wamabya ukakola utya ighukendiwatikya omwigha waghu abye akakanirya abandi oko bwikirirya bwiwe butsira obuba.

18. Wangayira ghuti eriwatikya omwigha waghu eribya akakanirya abandi oko ebyo ikirirye? (Matayo 10:27)

¹⁸ Yesu mwasaba abigha biwe eritulaghania engulu mbuya oko bandu. (Soma Matayo 10:27.) Omwigha waghu amabitsuka luba eritulira n’endeko, ekyo ikikendileka inigha eritasyayiketera Yehova yo kutsibu. Wangawatikya ghuti omwigha waghu ayihirireho omuradi oyo? Omughulu endeko yenyu ikendikola akambanye, uwatikaye omwigha waghu alangire ebyo atolere iniakola eribya mutuliri. Umukanganaye busanaki abangyi kikabalobera eritsuka eritulira oko mughulu wa kambanye. Oghundi muradi ogho anganayihiriraho ry’eribya akalabya oko bihindi by’abakolo oko muhindano w’omo kati-kati k’eyenga. Akayikasa erilabya ebihindi omo nzira eyuwene, ekyo kikendimuwatikya erikanirya abandi omo nzira eyuwene oko bwikirirya bwiwe.

UKANGANAYE NGOKO UYIKETERE OMWIGHA WAGHU

19. Yesu mwakangania ati ngoko ayiketere abigha biwe, netu twangakwama tuti eky’erileberyako kiwe?

¹⁹ Embere Yesu asube elubula, mwabwira abigha biwe ati kiro kighuma bakendisyasyabya haghuma. Mubataminya ngoko Yesu abya akababwira ngoko bakendisyaghenda elubula. Nomo abigha ba Yesu mubataminya amaana w’emyatsi milebe eyo abya akabwirabo, aliwe Yesu abya asi ngoko banzire erimukwama. (Yoh. 14:1-5, 8) Abya asi ngoko balaghire oko ndambi batoke eriminya eyindi myatsi, ng’amaha wabo w’elubula. (Yoh. 16:12) Nga Yesu, netu twanganakangania abigha betu ngoko tuyiketera ngoko bakenditsemesya Yehova.

20. Mwali wetu we Malawi mwakangania ati ngoko ayiketere omwigha wiwe?

²⁰ Twanganayiketera ngoko omwigha wetu anzire erikola ebyuwene. Tukanaye oko ky’erileberyako kya mwali wetu Chifundo owe Malawi. Mwatsuka erigha ekitabu Tsemera engebe kera na kera! n’omumama Mukatoliki oyukahulawamo Alinafe. Babere babibugha esomo 14, mwali wetu Chifundo mwabulya omwigha wiwe oyo ng’akalengekanayaki okw’ikolesya esyosanamu omw’iramya. Alinafe mwahitana n’erinibwira ati, “Ebyo binilebirye!” Enyuma sy’aho, Chifundo mwalengekania ati Alinafe akendileka erigha. Aliwe mwalola embere erigha na Alinafe, inianayiketere ngoko akendisyaminya ngoko erikolesya esyosanamu ni kibi. Habere habilaba emisi milebe, mwali wetu Chifundo mwamubulya eribulyo eriri omo somo 34: “Erigha eBiblia n’eriminya oMungu w’ekwenene Yehova, lyabirikuletera endundi yo liti?” Chifundo ati: “Alinafe mwakania oko myatsi mingyi eyuwene, omughuma w’oko myatsi eyo mwakangania ngoko Abimiri ba Yehova sibalikola omwatsi wosi ogho eBiblia ikaghanisaya.” Enyuma hake, Alinafe mwaleka erikolesya esyosanamu, neryo mwabatisibwa.

21. Twangawatikya tuti omwigha wetu atoke eriyisogha erikolera Yehova?

²¹ Nomo Yehova ‘yukalasaya,’ netu twanganawatikya omwigha erikola esyombinduka. (1 Kor. 3:7) Situlimukangiriraya lisa ebyo Yehova anzire iniakola, aliwe tukakola ebingyi okw’aho. Tukamuwatikaya erikulya olwanzo lwiwe oko Yehova. Kandi tukamuwatikaya akanganaye ngoko anzire Yehova omw’imuhira embere omo ngebe yiwe. Kandi tukamukangiriraya ngoko abandi bamabimwaghalya busana n’obwikirirya bwiwe anganayiketera ngoko Yehova akendimuwatikya. Omughulu tukayiketera omwigha wetu ngoko anganatsemesya Yehova, aho tukabya itwamamuwatikya eribya n’omuhwa w’erisombola erikolera Yehova.