Yesu amasuba elubula

Yesu mweya abigha biwe e Galilaya. Mwabalayira omwatsi w’omughaso munene. Mwabugha ati: ‘Mughende muyire abigha erilua oko bandu b’ebihanda byosi. Mukangirirayebo ebyosi ebyo nabiribakangirirya, neryo mubatisayebo.’ Kandi mwabalagha ati: ‘Ngendisyabya inine haghuma nenyu ebiro byosi.’

Omo biro 40 ebyo Yesu abugha iniabirilubukibwa, mwahulukira abigha biwe bangyi e Galilaya ne Yerusalema. Mwabakangirirya esyosomo sy’omughaso kandi mwakola ebitiko-tiko bingyi. Neryo mwahindana n’abakwenda biwe engendo y’omwiso oko Kitwa ky’Emizeituni. Yesu mwabugha ati: “Isimwalua e Yerusalema, kandi simuleke erilindirira ekyo Tata abirilagha.”

Abakwenda biwe mubataminya ng’abya akasonda eribugha atiki. Neryo mubamubulya bati: ‘Lino mo ukendibya Mwami we Israeli?’ Yesu mwasubiryabo ati: ‘Endambi ya Yehova y’erinyiyira mo Mwami siyiriyahika. Omo biro bike, mukendihabwa obutoki erilua oko kirimu kibuyirire, kandi mukendibya bimiri baghe. Mughende muyatulire e Yerusalema, e Yudea, e Samaria, n’omo biharo by’ehali by’ekihugho.’

Neryo Yesu mwasumbwa omo kyanya, amabulirana omo bitu. Abigha biwe mubasighala ibanasamalire omo kyanya, aliwe abya iniaghendire.

Abigha mubalua oko Kitwa ky’Emizeituni, bamaya e Yerusalema. Mughulu wosi ibakahindana haghuma omo kyumba ky’endata n’erisaba. Babya bakalindirira Yesu abahe obundi busondoli.