Yesu amatula engulu y’Obwami

Mughulu muke Yesu abibatisibwa, mwatsuka eritulira ati: ‘Obwami bw’oMungu buli hakuhi.’ Abigha biwe mubamukwama akatimba omo Galilaya ne Yudea. Omughulu Yesu asuba e Nazareti, eyo akulira, mwaya omo sinagogi, mwasoma ekitabu ky’erilinga kya Isaya omo mulenge muli ati: ‘Yehova abirimba ekirimu kibuyirire nitoke eritula engulu mbuya.’ Abya akasonda eribugha atiki? Abandu mubanza bati akole ebitiko-tiko. Aliwe ekikulu ekyaleka oMungu iniamuha ekirimu kibuyirire kyabya busana n’eritula engulu mbuya. Neryo mwabwira abahulikiriri biwe ati: ‘Munabwire obuminyereri obu bwamabererera.’

Enyuma sy’aho, Yesu mwaya oko Ngetse ye Galilaya, eyo asunga abasohi bani b’amahere, ababya bigha biwe enyuma w’aho. Mwababwira ati: ‘Munyikwame, ngendibayira mo basohi b’abandu.’ Babya Petro, Andrea, Yakobo, na Yohana. Mubasighania omubiiri wabo w’erisogha amahere w’aho n’aho n’erimukwama. Mubatimba omo Galilaya yosi bakatulaghania Obwami bwa Yehova. Mubatulira omo syosinagogi, omo syosoko, n’omo syonzira. Abandu bangyi ibakabakwama ehosi-hosi eyo babya bakaya. Engulu ya Yesu muyowibwa ehosi-hosi, nibya muyahika ne Siria.

Endambi muyahika, Yesu amaha abandi bigha biwe b’obutoki bw’erilamya abandu n’erihigha esyombinga. Abandi mubaghenda naye akatulira omo miyi n’omo milongo. Abakali bataleghula oko Mungu, nga Maria Magdalene, Jane, Suzana, n’abandi ibakakolera Yesu n’abigha biwe.

Yesu abere abibegherya abigha biwe, mwabatuma ati bayatulire omo Galilaya yosi. Abandu bangyi omo Galilaya mubabya bigha ba Yesu kandi mubabatisibwa. Abangyi mubanza eribya bigha biwe, neryo Yesu amabasosekania n’eririma eriri mw’eby’erigheswa. Yesu mwabugha ati: ‘Musabe Yehova atume abahingyi bangyi omw’ighesa.’ Enyuma w’aho, mwasombola abandi bigha 70, amabatuma mo babiri-babiri eriyatulira omo Yudea. Mubakangirirya abandu b’emihanda yosi oko Bwami. Omughulu abigha basubula, mubamubwira emyatsi yosi ngoko yiryabya. Sitani abya isyangakola kindu erikakirya omubiiri w’eritulira.

Yesu abya anzire abigha biwe ibalolya embere omubiiri mukulu oyu abisuba elubula. Yesu mwababwira ati: ‘Mutulire engulu mbuya omo kihugho kyosi. Mukangiriraye abandu b’Ekinywa ky’oMungu, n’eribatisyabo.’