Abigha bamapokera ekirimu kibuyirire

Enyuma sy’ebiro ikumi Yesu iniabirisuba elubula, abigha biwe mubapokera ekirimu kibuyirire. Kyabya oko mwaka 33 M.W., ekiro ky’efete ye Pentekoste. Abandu babya ibabirihika e Yerusalema bakaluira omo bihugho bingyi. Abigha ba Yesu nga 120 babya ibabirihindana haghuma omo kyumba ky’endata. Neryo, muhabya omwatsi owakaswekaya. Ekindu ekiri ng’ekirimi ky’omuliro mukyabya oko mutwe w’obuli mwigha, kandi abosi mubatsuka erikania omo mibughe mbiriri-mbiriri. Olukanda olwabya ng’erihunga rinene mulusula omo nyumba.

Abagheni ababya ibabiryasa e Yerusalema mubowa omulenge neryo mubatibita eyiri enyumba eyo eriyalebya nga mwamabyaki. Mubasweka kutsibu bakowa abigha bakakania emibughe yosi eyi. Mubabugha bati: ‘Aliwe abandu aba ka ni Banya Galilaya. Bamatoka bati erikania omo mibughe yetu?’

Neryo Petro n’abandi bakwenda mubimana embere sy’abandu. Petro mwakanirya abandu ngoko Yesu itawa kandi ngoko Yehova mwamulubukya oko baholi. Petro mwabugha ati: ‘Lino Yesu ane elubula oko luhande lw’amali lw’oMungu, kandi abirituma ekirimu kibuyirire ekyo alagha. Kyo kyamaleka imwalangira n’eriowa ebitiko-tiko ebi.’

Ebinywa bya Petro mubyatula oko mutima w’abandu neryo mubabulya bati: “Ritolere itwakolaki?” Petro mwabwirabo ati: ‘Muyisubeko n’obuli mughuma w’okw’inywe abatisibawe omo rina rya Yesu. Nenyu mukendihabwa ekirimu kibuyirire.’ Omo kiro ekyo, abandu nga 3000 mubabatisibwa. Eritsukira aho, emighanzo y’abigha muyakanya kutsibu omo Yerusalema. Busana n’obuwatikya bw’ekirimu kibuyirire, abakwenda mubatsukisya esyondeko nyingyi busana n’erikangirirya abigha ebyosi ebyo Yesu abahana.