Abapelelezi 12

Abaisraeli mubalua ahali Ekitwa kye Sinai, bamalaba omo mbwarara ye Parani erihika omo kiharo ekikahulawa mo Kadeshi. Eyo, Yehova mwabwira Musa ati: ‘Utume abalume 12, erilua omo buli kihanda, eriyalebya ekihugho kye Kanana nga kiri kiti, ekyo ngendiha Abaisraeli.’ Neryo Musa mwasombola abalume 12 n’eribabwira ati: ‘Mughende e Kanana, eriyalebya nga nina kihugho ekyuwene ekyangabya mw’ebyalya. Muyalebaye abandu bayo nga banawite akaghala kutse iyehe kandi nga bikere omo mahema kutse omo miyi minene-minene.’ Abapelelezi 12, Yosua na Kalebu ibaneko, mubaya e Kanana.

Habere habilaba ebiro 40, abapelelezi mubasubula, bamasa n’emizabibu, amakomamanga, n’esyotini. Abapelelezi mubabugha bati: ‘Ni kihugho ekyuwene, aliwe abandu bayo bali n’akaghala, n’emiyi yabo yiriko esyombimbo nyiri-nyiri.’ Neryo Kalebu mwabugha ati: ‘Twanganasingabo. Tulutuyeyo!’ Unasi ekyaleka Kalebu iniabugha atya? Kundi iye na Yosua babya bayiketere Yehova. Aliwe abandi bapelelezi 10 mubabugha bati: ‘Iyehe! Abandu b’eyo ni bali-bali kutsibu, bawite akaghala! Mutwabere ng’emisyenene embere syabo.’

Abaisraeli mubahwamo akaghala. Mubatsuka eriyilungumula n’eribwirana bati: ‘Tuyisombolere oghundi musondoli, tusube e Misri. Busanaki tughende omo kihugho ekyo busana n’eriyakwa?’ Yosua na Kalebu mubabugha bati: ‘Isimwayisamambula oko Yehova, simubahe. Yehova akendituteya.’ Aliwe Abaisraeli sibabya bakabahulikirira. Nibya mubanza eriita Yosua na Kalebu!

Yehova mwakolaki? Mwabwira Musa ati: ‘Abaisraeli, abo nabirikolera ebindu bingaha, erihika lino bakaghana erinyowa. Busana n’ekyo bakendisyaghanga-ghanga omo mbwarara omo myaka 40, n’eriholeramo. Abana babo basa na Yosua na Kalebu bo bakendisyingira omo kihugho ekyo nalagha eribaha.’