Yehova amasombola Yosua

Musa mwasondola ekihanda kye Israeli oko myaka mingyi. Neryo abya iniakisiya iniahola. Yehova mwamubwira ati: ‘Siwe ukendisyingirya Abaisraeli b’omo Kihugho Ekyalaghawa. Aliwe ngendikukangania ekihugho ekyo.’ Neryo Musa mwasaba Yehova ati asombole omusondoli muhya. Yehova mwamubwira ati: ‘Ughende eyiri Yosua, n’erimubwira uti yukendisondola.’

Musa mwabwira ekihanda ngoko akisiya iniahola kandi ngoko Yehova abirisombola Yosua m’oyukendibasondola erihika omo Kihugho Ekyalaghawa. Neryo Musa mwabwira Yosua ati: ‘Sighubahe. Yehova akendikuwatikya.’ Enyuma w’aho, Musa mwaghenda amahetukira oko Kitwa kye Nebo, eyo yo Yehova amukanganiraya ekihugho ekyo alagha Abrahamu, Isaka, na Yakobo. Musa mwahola iniawite emyaka 120.

Yehova mwabwira Yosua ati: ‘Usoke Olusi Yordani, ughende omo kihugho kye Kanana. Ngendikuwatikya ngoko nanawatikaya Musa. Litolere iwabya ukasoma Emighambo yaghe obuli kiro. Sighubahe. Ubye mutubaha. Neryo ukole ebyo namakusaba erikola.’

Yosua mwatuma abapelelezi babiri omo muyi we Yeriko. Omo mwatsi owakwamire, tukendilangira emyatsi nga muyabya yiti e Yeriko. Omughulu basubula, mubabugha bati eyo y’endambi eyuwene y’eriya e Kanana. Ekiro ekyakwama, Yosua mwabwira ekihanda ati basenge ebindu byabo. Neryo mwatuma abahereri ababya bahekire erisanduku ly’endaghane b’embere oko Lusi lwe Yordani. Olusi lwabya ilwabiryusula. Aliwe abahereri mubabya babinalyata omo lusi, mulwimana n’eribyamo enzira! Abahereri mubaghenda bamayimana omo kati-kati k’olusi erihika aho Abaisraeli bosi basokera. Ahate eritika-tika, ekitiko-tiko eki mukyabibukya ekyo Yehova abya iniabirikola oko Ngetse y’Engula!

Oko nduli, enyuma sy’emyaka yosi eyi, Abaisraeli mubahika omo Kihugho Ekyalaghawa. Kyabya kitolere ibahimba amanyumba n’emiyi, ibahera amalima, ebinyu, n’emiti y’amatunda. Kyabya kihugho ekikasendamo amasabu n’obuki.