Etabernakulo y’eriramiryamo

Musa abere ane oko Kitwa kye Sinai, Yehova mwamubwira ati akokotaye ehema y’embaghane eyikahulawa mo tabernakulo, aho Abaisraeli bangabere bakaramirya Yehova. Ibakahekayo bakahuma.

Yehova mwabugha ati: ‘Ubwire abandu uti balete ebyo bawiteko eriwatikya erikokotya etabernakulo.’ Abaisraeli mubaleta ehoro, efeza, ekwivre, amabwe w’obughuli, n’emiseghe. Kandi mubaleta obweya bw’embuli, ekitani, esyongobi sy’esyonyama, n’ebindi bindu bingyi. Mubaleta ebindu binene kutsibu erihika oko kika Musa amababwira ati: ‘Ebindu byabiribya binene kutsibu! Mulete bingaho.’

Abalume n’abakali bangyi abasi ndeke omubiiri mubawatikya okw’ikokotya etabernakulo eyo. Yehova mwabaha amenge w’erikola omubiiri oyo. Abandi ibakalinga esyouzi, erisiluka n’erisidesa. Abandi ibakatonda amabwe, eritumika n’ehoro, n’eribatsa emiti.

Abandu mubakokotya etabernakulo ngoko Yehova anababwira. Mubakokotya erido eryuwene eryabya rikatwa etabernakulo mo bisenge bibiri, Ahabuyirire n’Ahabuyirire kutsibu. Ahabuyirire kutsibu ho habya erisanduku ry’endaghane, erikokotibwe omo muti w’olughando n’ehoro. Ahabuyirire ho habya ekindu ky’erihirako etala eky’ehoro, emesa, n’ekiherero ky’obuhere bw’eryokererya. Omo butala mwabya ekibeseni ky’ekwivre n’ekiherero kinene. Erisanduku ry’endaghane irikibukaya Abaisraeli b’endaghane yabo y’eribya bowa oko Yehova. Unasi endaghane nga niki? Ni yilagha ery’embaghane.

Yehova mwasombola Haruni n’abaghala biwe eribya bahereri abakakolera oko tabernakulo. Ibakasughayo n’erihereraho obuhere oko Yehova. Haruni musa, omuhereri mukulu, yo wabya n’ehamuli y’eringira Ahabuyirire Kutsibu. Iniakakola atya kaghuma obuli mwaka akaherera obuhere busana n’amalolo wiwe, amalolo w’ekihanda kiwe, n’aw’ekihanda kyosi kye Israeli.

Abaisraeli mubabugha erikokotya etabernakulo eyo omwaka mughuma ibabirilua e Misri. Mubayira oko mwanya w’eriramiryamo Yehova.

Yehova musulya oko tabernakulo eyo k’olukengerwa lwiwe, n’ekitu mukyabya endata kuyo. Abaisraeli isibalihuma aho bali ekitu ekyo kyamabya ikikine endata oko tabernakulo. Aliwe ikikabya kyaluako, ibakaminya ngoko batolere ibatasyahuma. Ibakasambula etabernakulo eyo neryo ibakwama ekitu ekyo.