Mubayisamambula oko Yehova

Habere halaba mughulu mulebe, Abaisraeli ibane omo mbwarara, Kora, Datani, Abiramu, n’abandi bandu 250 mubayisamambula oko Musa. Mubabugha bati: ‘Wamatuluhya di! Busanaki ni nawe musondoli wetu na Haruni muhereri wetu mukulu? Yehova ane netu itwe bosi, butsira iwe na Haruni basa.’ Yehova mwatatsema. Mwalangira in’iye yo bakayisamambulako!

Musa mwabwira Kora n’ababya oko luhande lwiwe ati: ‘Omungya omo tututu mwase oko tabernakulo, imune n’ebindu byenyu by’erihiramo omuliro imunaswire obukwa. Yehova akendikangania oyo abirisombola.’

Ekiro ekyakwama, Kora n’abalume 250 mubayahindana na Musa eyiri etabernakulo. Mubahisya obukwa nga ni bahereri. Yehova mwabwira Musa na Haruni ati: ‘Mulue hakuhi na Kora n’abandu biwe.’

Datani, Abiramu n’ebihanda byabo mubatakola nga Kora. Ibo mubataya eyiri etabernakulo. Yehova mwabwira Abaisraeli ati balue ahali esyohema sya Kora, Datani, na Abiramu. Abaisraeli mubalw’ibakola batya. Datani na Abiramu, n’ab’omo bihanda byabo mubimana ehihya w’esyohema syabo. Kitsumbukirania, ekitaka mukyatulika n’eribamera! N’oko tabernakulo kw’eyo, omuliro mwalua elubula, amatimya Kora n’abalume 250.

Neryo Yehova mwabwira Musa ati: ‘Wimaye oko bakulu b’obuli kihanda k’omutso. Uhandike erina ry’obuli mundu oko mutso wiwe. Aliwe ukendihandika erina rya Haruni oko mutso w’ekihanda kya Lawi. Ubikeyo omo tabernakulo, neryo omutso w’omulume oyo ngendisombola akendyasako omusanga.’

Ekiro ekyakwama, Musa mwahulukya emyutso yosi, amakanganiayo abakulu b’ebihanda. Omutso wa Haruni abya iniabiryasako omusanga, n’eryasako amatunda w’elozi aw’erire. Omo nzira eyo, Yehova mwakangania ngoko abirisombola Haruni eribya muhereri mukulu.