Obwikirirya bwiwe bwamalengwako

Abrahamu mwakangirirya mughala wiwe Isaka erianza Yehova n’eriyiketera esyondaghane syosi sya Yehova. Aliwe Isaka abere ayira emyaka nga 25, Yehova mwabwira Abrahamu ati akole omwatsi mughuma owabya akalire erikola. Ni mwatsi wahi?

OMungu mwabwira Abrahamu ati: ‘Wimaye omughala waghu, ekyusa kyaghu, uyamuherere mo buhere oko kitwa ekiri omo kihugho kye Moria.’ Abrahamu abya isyasi ekikaleka Yehova iniamubwira ati akole ekyo. Nomo byanabya bitya, mwowa Yehova.

Omo tututu bukanakya, Abrahamu mwaghenda haghuma na Isaka n’abaghombe biwe babiri, bamalola e Moria. Habere hakya biro bisatu ibanemughenda, mubalangirira ebitwa byo hali. Abrahamu mwabwira abaghombe biwe ati babalinde aho, iye na Isaka bakayaherera obuhere. Abrahamu mwahekya Isaka y’esyongwi, na Abrahamu mwaheka omuhamba. Isaka mwabulya tata wiwe ati: ‘Enyama eyo tukayaherera yiri hayi?’ Abrahamu mwasubirya ati: ‘Mughala waghe, Yehova akendituhayo.’

Neryo babere bahika oko kitwa, mubahimba ekiherero. Neryo Abrahamu mwaboha ebyala n’ebisando bya Isaka, amamuhira oko kiherero.

Abrahamu mwimya omuhamba. Oko ndambi eyo, omumalaika wa Yehova mwamubirikira erilua elubula ati: ‘Abrahamu! Isiwahutalaya omulwana! Lino namabiminya ngoko uwite obwikirirya omo Mungu, kusangwa sighutaghana eriherera omughala waghu.’ Abrahamu mwalangira embangale eyo amahembe w’ayo abya iniabirighoba omo kisaka. Neryo mwalw’iniabohola Isaka. Mwakolesya embangale eyo m’obuhere omo mwanya wa Isaka.

Eritsuka ekiro ekyo, Yehova mwahula Abrahamu mo mwira wiwe. Unasi nga ni busanaki? Abrahamu mwakola ekyosi-kyosi ekyo Yehova abya anzire iniakola, nomo abya isyasi ekikaleka Yehova iniamubwira ati akikole.

Yehova mwasuba omo mulaghe wiwe oko Abrahamu ati: ‘Ngendisyakutsumula n’erisyayira abana baghu mo banene.’ Ekyo mukyakangania ngoko Yehova akendisyatsumula abandu bosi babuya erilabira ekihanda kya Abrahamu.