Yakobo mwahabwa omwandu

Isaka abya n’emyaka 40 omughulu atahaya Rebeka. Abya anzire Rebeka yo kutsibu. Endambi muyahika bamabuta abana babiri b’obulume ababya bahasa.

Omukulu mwahulwa mo Esau, n’omulere mwahulwa mo Yakobo. Esau inianzire erisiba omoli, kandi iniasi erihigha esyonyama. Aliwe Yakobo inianzire erisiba eka.

Omo biro ebyo, omwana mukulu iyukahabawa ekitaka kinene n’esyofranga nene, tata wiwe abihola. Ibakahula ekyo mo mwandu. Omo kihanda kyabo Isaka, omwandu oyo abyamo n’erisyabya oko abakendisyaberererya esyondaghane esyo Yehova alagha Abrahamu. Esau mwatatsomana esyondaghane esyo, aliwe Yakobo iye abya asi ngoko ni sy’omughaso munene.

Kiro kighuma Esau mwasuba eka iniabiriluha kutsibu akalua omo buhiyi. Mwowa ekikumbo ekyuwene eky’akalyo ako Yakobo abya akahuka, neryo mwabugha ati: ‘Nikwire enzala! Umba oko mboka eyo, eye ruje.’ Yakobo mwabugha ati: “Tsuka wanighulya obukulu bwaghu!” Esau mwamusubirya ati: ‘Ingye sinitsomene obukulu bwaghe! Obukulu bukendimbaki! Wimayebo. Akalyo ko nilaghireko.’ Ukalengekanaya uti ekyo Esau akola kyanabya ky’amenge? Iyehe n’ahake. Busana n’emboka buyira, Esau mwahitya ekindu ky’obughuli bunene.

Isaka abere abibya musyakulu, endambi muyahika ey’eritsumula omughala wiwe mukulu. Aliwe Rebeka mwawatikya Yakobo, omwana mulere, eribana omuyisa oyo. Esau abere aminya, mwahitana kutsibu kandi mwasondekania eriita mughala wabo. Isaka na Rebeka mubanza eriteya Yakobo, neryo mubamubwira bati: ‘Ughende, uyikale na muyomba waghu, ye Labani, erihika aho Esau asyahumulikanira.’ Yakobo mwahulikirira ababuti biwe, neryo mwaghenda busana n’erisabula engebe yiwe.