Mwibuke omukali wa Loti

Loti abya ikere na Abrahamu, omughala w’abo tata wiwe, omo kihugho kye Kanana. Abrahamu na Loti mubahikira okw’ibya n’esyonyama nene bamahika n’oko kika ky’eritendibya n’ekitaka ekitosire eky’erilisiryamo. Abrahamu mwabwira Loti ati: ‘Sitwangatasyikala omo kiharo kighuma. Ngakusaba usombole ekiharo ekyo wanzire eriyamo, naghe ngendighenda omo kindi.’ Abrahamu isyaliyitsomana iyuwene, ko bite bitya?

Loti mwalangira ekiharo ekiri hakuhi n’omuyi we Sodomo kyuwene. Yabya amaghetse manene n’ebiti bibisi. Neryo mwasombola ekiharo ekyo, amahumirayo n’ekihanda kiwe.

Abandu be Sodomo n’ab’omo ghundi muyi wa hakuhi owe Gomora babya babi kutsibu. Oko kwenene, babya babi kutsibu erihika oko kika Yehova mwabugha ati akenditoghotya emiyi ibiri yosi eyo. Aliwe oMungu abya anzire erisabula Loti n’ekihanda kiwe, neryo mwatuma abamalaika biwe eriyababwira bati: ‘Mwanguhe! Mulue omo muyi ono! Yehova akenditoghotyagho.’

Loti mwatalw’inyaghenda. Mwayitimbya-timbya. Neryo abamalaika mubatwala Loti, omukali wiwe, n’abali biwe babiri ibanabahambire oko byala, n’eribalusya omo muyi oyo ibanemubugha bati: ‘Mutibite mukasyahola! Kandi isimwakebera enyuma. Mwamakebera enyuma, imukendihola!’

Babere bahika omo muyi owakahulawa mo Zoari, Yehova mwawisya embula y’ekibiriti n’omuliro oko Sodomo ne Gomora. Emiyi ibiri eyo muyatoghotibwa haghuma. Eritendiowa Yehova mulyaleka muka-Loti iniakebera enyuma, neryo mwabya enduyi y’omunyu! Aliwe Loti na bali biwe mubasabuka kundi mubowa Yehova. Twanganabugha tuti mubakwa obulighe kundi muka-Loti mwatowa. Aliwe, mubatsema kundi mubakwama obusondoli bwa Yehova.